Pukfel
Enos 1
me mwan mwirin

Ewe Puken Enos

Sopun 1

Enos a ennetin iotek me a angei omusomusen an kewe tipis—Ewe mongungun ewe Samon a feitiw ngeni an ekiek, a pwonei amanau ngeni ekkewe chon Leiman non ekkewe ran mwach—Ekkewe chon Nifai ra achocho ne siwinisefani ekkewe chon Leiman—Enos a pwapwa non an we Chon Angasano. Arap ngeni 420 Ier Mwen Kraist.

1 Nengeni, non ewe fansoun ngang, Enos, ua sinei semei we pwe i emon mwan mi pung—pun i a aitiei usun kapasen fonuan, me pwan usun tumun me kapasen fon an ewe Samon—iwe epwe feioch iten ai Kot pokiten ena—

2 Upwe erenikemi usun ewe aunap minne ua ani me mwen mesen Kot, me mwen ai upwe angei omusomusen ai kewe tipis.

3 Nengeni, ua feino ai upwe kut man mwacho nein ekkewe petewen; iwe ekkewe kapas minne ua sou rong an semei we a apasa usun manau esemuch, me ewe pwapwan ekkewe souneng, a ureno non netipei.

4 Iwe nguni a echik; iwe ua fotopukutiw me mwen ai Chon For, iwe ua sio ngeni i non iotek mi pochokun me tingor ren tipetekison fan iten pwisin nguni; iwe unusen ewe ran ua sio ngeni i; ewer, iwe nupwen nepwin a feito ngang mi chok atekiata mongungui iwe a tori ekkewe nang.

5 Iwe a feito ew mongungu ngeniei, a apasa: Enos, om kewe tipis a museno senuk, iwe kopwe feioch.

6 Iwe ngang, Enos, ua sinei pwe Kot esap tongeni chofona; ina minne, ai tipis a tottonuno.

7 Iwe ua apasa: Samon, ifa usun a fis?

8 Iwe a apasa ngeniei: Pokiten om nuku non Kraist, ewe kesamo rongorong usun akkom are kuna. Iwe chommong ier epwe no me mwen an epwe pwarano inisin non pekin aion; ina minne, feino, om nuku a enimenimochukeno.

9 Iei, non ewe fansoun nupwen ua rongorong ekkei kapas ua poputa ne mefi ew mochen fan iten tufichin pwi kewe, ekkewe chon Nifai; ina minne, ua wau unusen nguni ngeni Kot fan iter.

10 Iwe nupwen ua fokkun attures non pekin ngun, nengeni, mongungun ewe Samon a tonong sefan non ai ekiek, a apasa: Upwe churi pwium kewe anongonong won ar achocho ne aneasochisi ai kewe annuk. Ua fen ngeni ir ei fonu, iwe a ew fonu mi pin; iwe use anumamaua tiwenon chok ika epwe pokiten angangangaw; ina minne, upwe churi pwium kewe anongonong won met ua fen apasa; iwe ar kewe attai annuk upwe waretiw fiti netipengaw won pwisin mokurer.

11 Iwe mwirin ngang, Enos, ua rongorong ekkei kapas, ai nuku a poputa ne pochokununo non ewe Samon; iwe ua iotek ngeni i fiti chommong attures mi nangatam fan iten pwi kewe, ekkewe chon Leiman.

12 Iwe non ewe fansoun mwirin ua iotek me angang ren unusen ai achocho, ewe Samon a apasa ngeniei: Upwe ngonuk anongonong won om kewe mochen, pokiten om nuku.

13 Iwe iei nengeni, iei ewe mettoch minne ua mochen seni i—pwe ika epwe ina, pwe nei kewe aramas, ekkewe chon Nifai, repwe turunong non napanapen attai annuk, me ren och popun repwe ninnino, iwe ekkewe chon Leiman resap ninnino, pwe ewe Samon Kot epwe isoni ew uruon nei kewe aramas, ekkewe chon Nifai; ika mwo epwe seni manamanen poun mi pin, pwe epwe pwarano non ekkoch ranin fansoun mwach ngeni ekkewe chon Leiman, pwe, ita, repwe tongeni tonong non amanau—

14 Pokiten atun ei fansoun am kewe angang weires ra namotmwan ne aniwini ir ngeni ewe nuku mi ennet. Iwe ra pwon non ar ningeringer pwe, ika epwe tufich, repwe atakemino me am kewe uruo, me pwan ereenien semem kewe meinisin.

15 Ina minne, pokiten ngang mi sinei pwe ewe Samon Kot a tongeni isoni am kewe uruo, ua soposopono ne sio ngeni i, pun i a fen apasa ngeniei: Met chok mettoch kopwe tingor non nuku, ika ka nuku pwe kopwe angei non iten Kraist, kopwe angei.

16 Iwe a wor ai nuku, iwe ua sio ngeni Kot pwe epwe isoni ekkewe uruo; iwe a fori ew pwon mi pin ngeniei pwe i epwe uweiareto ngeni ekkewe chon Leiman non pwisin an fansoun.

17 Iwe ngang, Enos, ua sinei pwe epwe fis anongonong won ekkewe pwon mi pin minne i a fen fori; ina minne nguni a asoso.

18 Iwe ewe Samon a apasa ngeniei: Semom kewe ra fen pwan tingor seniei ekkei mettoch; iwe epwe fis ngeni ir anongonong won ar nuku; pun ar nuku a chok usun om.

19 Iwe iei non ewe fansoun pwe ngang, Enos, ua fetan fein nein ekkewe aramasen Nifai, ua osini usun mettoch epwe feito, me pwarata usun ekkewe mettoch minne ua fen rongorong me kuna.

20 Iwe ua pwarata pwe ekkewe aramasen Nifai ra wesewesen achocho ne aniwini ekkewe chon Leiman ngeni ewe nuku non Kot mi ennet. Nge am kewe angang ra namotmwan; ar koput a fen pochokununo, me ra fen emmwen me ren nonnomur mi ngaw pwe ra winiti aramas mwacho, me orochongaw, me ew aramas mi mochen nii manau, ra uren ar fen ngeni niosun anu muan me nimengaw; ra mwongo seni watten man ir mi ninni ekkoch man; nonnom non imw mangaku, me tawan fetan non ewe fonu pon ren echo mwochun achawar mi rokopwani nukanaper me mokurer mi raisono; me ra angangoch non nikappich, me non ekkewe tok, me ewe kouk. Iwe chommong me neir rese mwongo och mettoch tiwenon chok futuk mi amas; me ra soposopono ne sotuni ar repwe nikemino.

21 Iwe non ewe fansoun ekkewe aramasen Nifai ra anganga ewe fonu, me ra amari sokopaten grain, me sokopaten foun ira, me ekkewe penen pwin man, me ekkewe penen sokopaten man ese nifinifin sokkun, me sike, me sike mi mwacho, me pwan chommong oris.

22 Iwe mi fen fokkun chommong soufos me neim. Iwe ekkewe aramas ir aramas nukumach, a weires ar repwe weweiti.

23 Iwe ese wor och mettoch tiwenon chok ika a fokkun pochokun, afanafan me osini usun maun, me anini fengen, me kiteter, me soposopono ne achema ngeni ir usun mano, me usun ewe nangatamen fansoun esemuch, me ewe kapung me ewe manamanen Kot, me ekkei mettoch meinisin—a soposopono ne amwasangereta ar repwe nonnom non nuokusun ewe Samon. Ua apasa pwe ese wor och mettoch mi kis seni ekkei mettoch, me fokkun chommongun fatafatochun kapas, epwe tongeni akkounor seni ar repwe mwitir feitiw ngeni kiteter. Iwe mwirin ei napanap ua mak usur.

24 Iwe ua kuna ekkewe maun nefinen ekkewe chon Nifai me ekkewe chon Leiman non unusen rani kewe.

25 Iwe non ewe fansoun ngang ua poputa ne chinnapeno, iwe ipuku fik me tiu ier a no seni ewe fansoun semach we Liai a tou seni Jerusalem.

26 Iwe ua sinei pwe upwene mwitir feitiw ngeni peiasei, ua fen engino ngeni ewe manamanen Kot pwe upwe fokkun afanafan me osini ngeni ekkei aramas, me affatano ewe kapas anongonong won ewe ennet minne mi nom non Kraist. Iwe ua fen affatano non unusen rani kewe, me ua fen pwapwa non nap seni ewe minen fonufan.

27 Iwe a arapakkan upwene feino ngeni ewe nenien ai asoso, ren ai Chon Angasano; pun ngang mi sinei pwe non i upwe asoso. Iwe upwene pwapwa non ewe ran nupwen inisi we mi tongeni mano epwe pwinitanong ewe inis ese tongeni mano, iwe upwe uta me mwen i; iwe upwene kuna mesan ren pwapwa, iwe i epwe apasa ngeniei: Feito rei, ka feioch, mi wor ew neni a monneta fan itom non ekkewe imwen Semei we mi watte. Amen.