Pukfel
Omnai 1
me mwan mwirin

Ewe Puken Omnai

Sopun 1

Omnai, Amaron, Kemis, Apinatom, me Amalekai, emon me emon non an fansoun, ra sopweno ekkewe uruo—Mosaia a kuna ekkewe aramasen Saraemla, ekkewe ra feito seni Jerusalem non ekkewe ranin Zedekiah—Mosaia a kefinita pwe epwe emon king ne nemenem wor—Ekkewe mwirimwirin Mulek me non Saraemla ra fen kuna Koriantumer, ewe amuchunon aramas me nein ekkewe chon Jared—King Benjamin a siwini Mosaia non wiisan—Aramas repwe fangeno ngunur pwe repwe ew asor ngeni Kraist. Arap ngeni 323–130 Ier Mwen Kraist.

1 Nengeni, non ewe fansoun ngang, Omnai, pokiten ua annuk me ren semei we, Jerom, pwe upwe makkei ekis won ekkei seleich, pwe upwe sopweno am kewe uruo—

2 Ina minne, non rani kewe, ua mochen pwe oupwe sinei pwe ua fiu fan chommong ren ewe ketinas ai upwe tumunu nei kewe aramas, ekkewe chon Nifai, pwe resap turunong ne poun ekkewe chon koum ngeni ir, ekkewe chon Leiman. Nge nengeni, ngang pwisin won inisi ngang emon aramas mi ngaw, iwe use aneasochisi ekkewe annuk kisikis ekkewe annukun ewe Samon usun ita met upwe fen fori.

3 Iwe non ewe fansoun ruepuku fik me wonu ier a no, me a wor chommong am fansoun kinamwe; me a wor chommong am fansoun efeiengawen maun me assuku cha. Ewer, iwe amuchunon, ruepuku wanik me ru ier a no, me ngang mi isoni ekkei seleich anongonong won ekkewe annukun semei kewe; iwe ua wareno ngeni nei we Amaron. Iwe ua osopwano.

4 Iwe iei ngang, Amaron, ua makkei ekkewe mettoch meinisin minnei ua makkei, minne ra chok chokukkun, non puken semei we.

5 Nengeni, non ewe fansoun wunupuku rue ier a no, me ewe kinikinin ekkewe chon Nifai a kon ngaw ra ninnino.

6 Pun ewe Samon esap mutata, mwirin i a fen emmwenireu seni ewe fonuen Jerusalem me isoni ir me tumunur pwe resap turunong ne poun ekkewe chon koum ngeni ir, ewer, i esap mutata pwe ekkewe kapas resap punguno, minne i a fen apasa ngeni semem kewe, a apasa pwe: Ukukun ami ousap aneasochisi ai kewe annuk ami ousap feioch me won ewe fonu.

7 Ina minne, ewe Samon a churi ir ren kapung mi pochokun; nge inamo, i a amanaua ekkewe mi tupwon pwe resap mano, nge a angasereno seni ne poun ekkewe chon koum ngeni ir.

8 Iwe non ewe fansoun ua wano ekkewe seleich ngeni pwi we Kemis.

9 Iei ngang, Kemis, ua makkei ekkewe ekkoch mettoch ua makkei, non ewe chok puk ren pwi we; pun nengeni, ua kuna ewe amuchunon met a makkei, pwe i a makkei ren pwisin poun; iwe i a makkei non ewe ran minne i a wareto ngeniei. Iwe non ei napanap am aua sopweno ekkewe uruo, pun a anongonong won ekkewe annukun semem kewe. Iwe ua osopwano.

10 Nengeni, ngang, Apinatom, ngang ewe noun Kemis. Nengeni, non ewe fansoun ua kuna chommong maun me anini fengen nefinen nei kewe aramas, ekkewe chon Nifai, me ekkewe chon Leiman; me ngang, ren pwisin nei ketinas, ua fen angeiano manauen chommong me nein ekkewe chon Leiman nupwen ai eppeti pwi kewe.

11 Iwe nengeni, ewe uruon ekkei aramas a makketiw won ekkewe seleich minne a nom ren ekkewe king, anongonong won ekkewe tappin fansoun; iwe use sinei usun ew pwarata tiwenon chok ekkewe minne ra fen makketiw, use pwan sinei usun ew osini; ina minne, ewe minne a naf a makketiw. Iwe ua osopwano.

12 Nengeni, ngang Amalekai, ewe noun Apinatom. Nengeni, upwe kapas ngenikemi ekis usun Mosaia, ewe a kefinita pwe epwe emon king ne nemeni ekkewe fonuen Saraemla; pun nengeni, i a fen aurour me ren ewe Samon pwe i epwe su seni ewe fonuen Nifai, iwe meinisin ekkewe ra aneasochis ngeni mongungun ewe Samon repwe pwan fiti i ne tou seni ewe fonu, ngeni ewe fonu pon—

13 Iwe non ewe fansoun i a fori anongonong won met ewe Samon a annuku ngeni i. Iwe ra tou seni ewe fonu ngeni ewe fonu pon, meinisin ekkewe ra aneasochis ngeni mongungun ewe Samon; iwe ra emmwen me ren chommong afanafan me osini. Iwe ra soposopono ne kaeo seni ewe kapasen Kot; iwe ra emmwen me ren manamanen poun, me non ewe fonu pon tori ar ra feitiw ngeni ewe fonu minne a iteni ewe fonuen Saraemla.

14 Iwe ra kuna ew mwichen aramas, ekkewe ra iteni ekkewe aramasen Saraemla. Iei, a wor watte pwapwa me nein ekkewe aramasen Saraemla; me pwan Saraemla a fokkun pwapwa, pokiten ewe Samon a tinato ekkewe aramasen Mosaia fiti ekkewe seleichen brass minne a masoweni uruon ekkewe chon Jew.

15 Nengeni, non ewe fansoun Mosaia a kaeo pwe ekkewe aramasen Saraemla ra feito seni Jerusalem atun Zedekiah, ewe kingen Judah, a emmwenino non fotek non Babylon.

16 Iwe ra sai non ewe fonu pon, me ra emmwen me ren poun ewe Samon ngeni epekin ekkewe matau; ngeni ewe fonu ikewe Mosaia a kuner; iwe ra nonnom ikena seni ena fansoun feino.

17 Iwe atun ewe fansoun Mosaia a kuner, ra fen fokkun chommongono. Nge inamo, a chommong ar maun me efeiengawen anini fengen, me ra ninnino me ren ewe ketinas seni fansoun ngeni fansoun; iwe kapasen fonuer a ngaweno; iwe ese wor uruo ra uwei ngeni ir; iwe ra amam ewe nonnomun ewe Chon Fori; iwe Mosaia, me ekkewe aramasen Mosaia, rese tongeni weweiti ir.

18 Nge non ewe fansoun Mosaia a fori pwe repwe kaeo kapasen fonuan. Iwe non ewe fansoun mwirin ar ra kaeo kapasen fonuen Mosaia, Saraemla a awora ew uruon seman kewe, anongonong won an chechemeni; iwe ra makketiw, nge esap won ekkei seleich.

19 Iwe non ewe fansoun ekkewe aramasen Saraemla, me ekkewe aramasen Mosaia, ra chufengen; iwe Mosaia a kefinita pwe epwe nour king.

20 Iwe non ewe fansoun non ekkewe ranin Mosaia, mi wor efou watten foun fau a kekito ren mi wor mak won; iwe a awewei ekkewe mak seni ewe niffangen me ewe manamanen Kot.

21 Iwe ra masoweni ew uruon emon Koriantumer, me ninninon noun kewe aramas. Iwe ekkewe aramasen Saraemla ra kuna Koriantumer; iwe i a nonnom rer ren ukukun tiu maram.

22 A pwan apasa ekkoch kapas usun seman kewe. Me aewin seman me inan kewe ra tou seni ewe tower, atun fansoun ewe Samon a aruka kapasen ekkewe aramas; me ewe tichikin niwinin tipis an ewe Samon a feitiw wor anongonong won an kewe kapung, minne mi pung; iwe chur a kon fetan non ewe fonu ennefen.

23 Nengeni, ngang, Amalekai, ua uputiw non ekkewe ranin Mosaia; iwe ua fen manau tori ai ua kuna an mano; me Benjamin, noun we, a siwini ne nemenem non wisan we.

24 Iwe nengeni, ua fen kuna, non ekkewe ranin king Benjamin, ew efeiengawen maun me chommong assuku cha nefinen ekkewe chon Nifai me ekkewe chon Leiman. Nge nengeni, ekkewe chon Nifai ra angei watten ar pochokun wor; ewer, ina popun king Benjamin a asureno seni ewe fonuen Saraemla.

25 Iwe non ewe fansoun ngang ua poputa ne chinnapeno; iwe, pokiten ese wor mwirimwiri, me pokiten ua sinei king Benjamin pwe i emon mwan mi pung me mwen ewe Samon, ina minne, upwene wano ekkei seleich ngeni i, me ua pesei aramas meinisin pwe repwe feito ngeni Kot, ewe Emon mi Fel re Israel, me nuku non osini, me non pwarata, me non ewe angangen chon nang, me non ewe niffangen kapas ren kapasen ekis, me non ewe niffangen awewen kapas, me non mettoch meinisin minne mi och; pun ese wor och mettoch minne mi öch tiwenon chok ika a feito seni ewe Samon; iwe mettoch minne mi ngaw a feito seni ewe tefin.

26 Iwe iei, pwi achengicheng, ua mochen pwe oupwe feito ngeni Kraist, i ewe Emon mi Fel re Israel, me angei seni an amanau, me ewe manamanen an ngaseno. Ewer, feito ngeni i, me fangeno unusen ngunumi pwe epwe ew asor ngeni i, me soposopono non echikipin me iotek, me nikitu tori nesoponon; iwe usun ewe Samon mi manau iwe oupwe manau.

27 Iwe iei ua mochen ekis kapas usun ew chochon aramas ra feita ngeni non ewe fonu pon pwe repwe niwin ngeni ewe fonuen Nifai; pun mi fen wor ew watten chochon aramas ra mochen pwe repwe fonueni ewe fonuen ar kewe neuo.

28 Ina minne, ra feita ngeni non ewe fonu pon. Iwe nour we sou emmwen i emon mwan pochokun me napanap, me emon mwan mi nukumach, ina minne i a poputani ew anini fengen nefiner; iwe ir meinisin ra ninnino, tiwenon chok nime, non ewe fonu pon, iwe ra niwin sefan ngeni ewe fonuen Saraemla.

29 Iwe non ewe fansoun ra pwan angei ekkoch ekkewe ra choni ew watten chochon aramas, me ra sai sefan ngeni non ewe fonu pon.

30 Iwe ngang, Amalekai, a wor emon pwi, ewe a pwan fiti ir; iwe use sinei usur seni ena fansoun. Iwe upwene konetiw non peiasei; iwe ekkei seleich ra ureno. Iwe ua osopwano ai kapas.