Sautu ena Veivakalougatataki
E levu na veivakalougatataki e gadreva tu na Kalou me solia vei keda, e gadrevi kina na noda cakacaka—na cakacaka e vu mai na noda vakabauti Jisu Karisito.
Sa gadreva tu na Tamada Vakalomalagi kei Jisu Karisito me vakalougatataki keda yadua.1 Na taro ni sala me rawati kina na veivakalougatataki oqori e sa ka ni veitalanoa ni vurevakasama tu me vica vata na yabaki.2 Eso e nanuma ni ra sa rawati vakataucoko na veivakalougatataki; eda ciqoma duadua ga mai na noda cakacaka. Era veibataka eso ni sa digitaka oti tu na Kalou Okoya me vakalougatataka kei na kena sala—ka sa sega ni veisau rawa na veinakinaki oqo. Na itutu ruarua oqo e sa yavutaki cala. E sega ni rawati na veivakalougatataki mai lagi ena sokomuni rekitaki ni “vakatakilakila ni caka vinaka,” se na kena waraki guce voli kevaka eda sa winitaka na loteri ni kalougata. Sega, na dina e sa duidui vakalevu cake ia sa veiganiti vakalevu cake ki na veiwekani ni loloma ni Tamada Vakalomalagi kei ira na Nona era rawa ni taukena—o keda. Sa vakatakila na dina vakalesui mai ni ra sa sega ni rawati na veivakalougatataki, ia na cakacaka eda cakava ena veivakauqeti ni vakabauta, oqo ka lako yani, sa ra veiganiti.3
Ni da navuca na sala eda ciqoma kina na veivakalougatataki mai vua na Kalou, meda sa vakatauvatana na veivakalougatataki mai lagi ki na dua na ibinibini kau vakaitamera. Raitayaloyalotaka e loma donu toka e dua na ibinibini lailai ni vakawaqa, ka biu e cake eso na icivicivi ni kau. Tarava mai na kau eso, tolo ni kau lalai, qai tolo ni kau levu sara. Sa koto ena ituva kau oqo e dua na waiwai levu sara, e rawa ni vakavure rarama kei na katakata me vica na siga. Raitayaloyalotaka ni toka tarava na ituva kau e dua ga na masese, na kena mataqali e dau kama totolo na matana.4
Me vagalalataki rawa na kaukauwa e tiko ena ituva kau, sa dodonu me na waqa na masese ka vakamai na ivakawaqa. Ena kama totolo na ibinibini lailai ka vakavuna me kama na veitiki ni kau lelevu. Na gauna ga sa tekivu kina na ivakarau ni kama oqo, e sa na lako tiko me yacova ni sa kama taucoko na kau se sa lailai na icegu ni buka.
E ka lailai sara na waqa ni masese kei na vakamai ni vakawaqa e yaco kina me vagalalataki na kaukauwa e rawati mai na kau.5 Me yacova sara ni waqa na masese, e sega na ka e yaco, se vakacava sara na ivakarau ni tuva kau. Kevaka sa waqa na masese ka sega ni dulaki ki na ibinibini lailai, na ivakarau ni rarama kei na katakata e vagalalataki mai na masese ga e sa vovodea ka sega ni vagalalataki rawa na kaukauwa ni vakarau ni kama ena kau. Kevaka e sega na cagi ena dua na gauna, ena tarovi na kena kama.
Ena sala vata ga, e levu na veivakalougatataki e gadreva tu na Kalou me solia vei keda sa gadrevi kina na noda cakacaka—na cakacaka e vu mai na noda vakabauti Jisu Karisito. Na vakabauti ni iVakabula e sa dua na ivakavuvuli ni cakacaka kei na kaukauwa.6 Matai eda cakacaka ena vakabauta; qai basika mai na kaukauwa—vakatau ki na loma kei na gauna ni Kalou. Sa ka bibi na kena veitaravi.7 Sa dau lailai na cakacaka e gadrevi ni vakatauvatani ki na veivakalougatataki eda dau qai ciqoma.8
Navuca na ka a yaco ni ra sotava na Isireli eliu na gata bukawaqa veisiriyaki ena nodra ilakolako ki na vanua yalataki. Sa veivakamatei na ikati ni gata gaga. Ia sa rawa ni vakabulai e dua na tamata sa laukati ena nona raica na gata parasa a cakava o Mosese ka vauca ki na dua na kau.9 E vakacava tu mada na kena dredre me raici e dua na ka? Sa rawata o ira kece na raica na kaukauwa mai lagi ka sa vakabulai. Na Isireli tale eso ka laukati, era sega ni raica na gata parasa ka mani mate. De dua e lailai na nodra vakabauta mera raica.10 De dua era sega ni vakadinata ni dua na ka rawarawa vaya e rawa ni vakavurea na veivakabulai yalataki. Se dua era sa vakaukauwataka ga na lomadra ka cata na ivakasala ni parofita ni Kalou.11
Na ivakavuvuli ni tekivu ni veivakalougatataki e drodro mai vua na Kalou sa tawamudu. Vakataki ira na Isireli oya eliu, sa dodonu meda cakacakataka talega na noda vakabauti Jisu Karisito meda vakalougatataki kina. Sa vakaraitaka na Kalou ni “dua na lawa ena sega ni vakasukai sa virikotori tu mai lomalagi ni se bera ni buli na vuravura oqo, ia sa vakayavutaki kina na veivakalougatataki kecega—ia ni da sa rawata e dua na veivakalougatataki mai vua na Kalou, sa rawa ena vuku ni da sa talairawarawa ki na lawa sa vakayavutaki kina.”12 Ni tukuni tu oya, o sega ni rawata e dua na veivakalougatataki—sa cala na nanuma oya—ia sa dodonu mo cakacakataka. Sa rawa duadua ga na noda vakabulai ena caka vinaka kei na loloma soli wale i Jisu Karisito.13 Na cecere ni Nona veisorovaki cabori sa kena ibalebale ni sa sega ni yalani na ituva kau; na noda cakacaka malumalumu sa vakatauvatani ki na saiva. Ia era sa sega ni saiva, ka ra sega ni tawaveiganiti; ena butobuto sa rawa ni raici vakayawa na masese e vakawaqari. Vakaidina, e sa rawa ni raici mai lagi baleta sa gadrevi na cakacaka lalai ni vakabauta me utura na veiyalayalati ni Kalou eso.14
Me ciqomi e dua na veivakalougatataki gadrevi mai vua na Kalou, cakacaka ena vakabauta, ni vakawaqari na masese bulabula e dei tu kina na veivakalougatataki vakalomalagi. Me ivakaraitaki, e dua na vu ni masu oya me tauri na veivakalougatataki sa nanuma tu na Kalou me solia ia sa vakatauki ga ki na noda kerea.15 A tagicaka o Alama na loloma veivueti, ka sa wali na nona mosi; sa sega tale ni qai cukiraki ena nanumi ni nona ivalavala ca. Na nona reki sa vakadruka na nona mosi—baleta ga ni a tagici Jisu Karisito ena vakabauta.16 Na igu ni vakabulabulataki e gadrevi vei keda oya me veirauti nona vakabauti Karisito meda masuta kina na Kalou ena yalomalua ka vakadonuya na Lomana kei na kena isau ena Nona gauna.
Vakavuqa, na kaukauwa cakacakataki e gadrevi kina na veivakalougatataki sa vinakata e levu cake mai na vakararai se kerekere tu ga; sa gadrevi na vakabauta cakacakataki e tomani voli ka tokaruataki. Ena loma ni ka 19 ni senituri, a lesia o Brigham Young e dua na ilawalawa Yalododonu Edaidai me dikevi ka tikori Arizona, e dua na yasa dravuisiga ena Vualiku kei Amerika. Ni ra sa yacovi Arizona, sa lailai na medra wai ka ra sa leqataka na nodra mate. Era sa kerea na veivuke ni Kalou. Sa mani lutu na uca kei na wai cevata, ka rawa vei ira mera vakatawana nodra dramu ena wai ka qarava na nodra manumanu. Era a lesu ki Salt Lake City ena yalovakamuduo kei na bula vakacegu ka rekitaka tu na vinaka ni Kalou. Ena nodra lesu mai, era ripotetaka sara na macala ni nodra ilakolako kivei Brigham Young ka tukuna na ka era sa duavata kina ni sega ni dodonu me vakatawani o Arizona.
Ni sa rogoca oti na ripote, a taroga e dua na turaga ena rumu o Brigham Young ena ka e nanuma me baleta na ilakolako kei na cakamana. A sauma malua mai na turaga oya, o Daniel W. Jones, “Sa rawa vei au me’u tawana vakalevu, tomana, ka masu tale.” A kubeti Brother Jones o Brother Brigham ka kaya, “Oqo na turaga ka na liutaka na ilakolako ka tarava ki Arizona.”17
Eda rawa ni nanuma lesu na gauna eso eda a toso tikoga kina ka masu tale—ka yaco na veivakalougatataki. Na veika a sotava o Michael kei Marian Holmes e vakamacalataka na veivakavuvuli oqo. Au a veiqaravi tu vata kei Michael vaka Vitusagavulu ni iWasewase. Au dau marau ena veigauna e kacivi kina o koya me masu ena neimami soqoni baleta ni sa kilai tani tu na titobu ni nona bula vakayalo; sa kila o koya na ivakarau ni veivosaki kei na Kalou. Dau talei me’u rogoci koya ni masu. Ni se vou tu na nodrau vakawati, a sega ni dau masu voli o Michael kei Marian se laki lotu. Rau a vakaogai tu ena tolu na gone lalai kei na dua na kabani ni taravale rawaka tu. E sega ni nanumi koya o Michael me dua na tamata lotu. Dua na bogi, a basika ki na nodratou itikotiko na nodratou bisopi ka veivakayaloqaqataki me ratou tekivu daumasu.
Ni sa lesu o Bisopi, sa navuca o Michael kei Marian me rau sa na tovolea na masu. Ni bera na moce, rau a tekiduru ena yasa ni loga ka, tavariri voli, sa tekivu sara o Michael. Ni oti e vica na vosa ni masu baya, a cegu vakasauri o Michael, ka kaya, “Marian, au sega ni rawa ni cakava.” Ni sa duri ka tekivu me vakasuka, a taura na ligana o Marian, dreti koya lesu ki duruna, ka kaya, “Mike, o iko rawa ni cakava. Tovolea tale!” Ena veivakayaloqaqataki oqo, a vakacavara o Michael e dua na masu lekaleka.
Rau sa tekivu masu vaka wasoma tu na Holmes. Rau a ciqoma na veisureti ni dua na weka me laki lotu. Ni rau curu yani ki na valenilotu ka rogoca na sere idola, a vakasolokakana vei rau na Yalotabu, “Ka dina oqo.” E muri, ni tawaraici ka tawakerei, a veivuke o Michael ena vagalalataki benu mai na valenisoqoni. Ni cakava vakakina, a vakila o koya e dua na rai matata, “Oqo na Noqu vale.”
A vakadonuya na veikacivi ena Lotu o Michael kei Marian ka veiqaravi ena tabanalevu kei na iteki. Rau sa vauci vata ka sa vauci vei rau na 3 na luvedrau. E muri tale mai e levu na gone, ka sa 12 taucoko. Rau a veiqaravi vaka iliuliu ka veitokani ni kaulotu na Holmes—vakarua.
A dua na cakacaka lailai ka tawani vakabauta tu na matai ni masu rogo mamada oya ka vakavurea na veivakalougatataki mai lagi. Era a vakania na Holmes na yameyame ni vakabauta ena nodra laki lotu ka veiqaravi. Na nodrau veiqaravi vakatisaipeli ena veiyabaki e sa vaka tu e dua na vakamakama ka veivakauqeti tu edai.
Ia na kama, sa dodonu me rawata e dua na ivakarau matau ni cagi me rawa ni yaco nona sereka vakaoti kina na ka e rawata. Me vaka e vakaraitaka o Michael kei Marian Holmes, na vakabauti Karisito sa gadrevi kina na cakacaka tu ga me tomani voli na kama. E vukea na noda sasaga ni lako tu ena salatu ni veiyalayalati na cakacaka lalai eso ka sa muataki ki na veivakalougatataki levu duadua e rawa ni solia na Kalou. Ia e drodro ga na cagi ke da yavalata toka vakamatau na yavada. So na gauna eda gadreva meda cakava e dua na dakaititi kei na gasau ni bera ni basika na vakatakila se vei na vanua meda laki vaqara kakana kina.18 So na gauna eda gadreva meda cakava eso na iyaya ni cakacaka ni bera ni basika na vakatakila se me tara vakacava e dua na waqa.19 So na gauna, ena veidusimaki ni parofita ni Kalou, sa gadrevi meda bulia e dua na keke lailai mai na ivovo ni waiwai kei na falawa e tiko vei keda me ciqomi tawacala kina e dua na tavaya ni waiwai kei na saqa ni falawa.20 Ka so na gauna sa gadrevi meda “tiko lo ka kila ni [sa Kalou] na Kalou” ka nuitaka na Nona gauna.21
Ni ko ciqoma e dua na veivakalougatataki mai vua na Kalou, sa rawa ni o vakadeitaka ni ko sa taura matua e dua na lawa tawamudu e vakatulewataka na ciqomi ni veivakalougatataki oya.22 Ia nanuma na lawa “virikotori ena sega ni vakasukai” e sa vagauna, kena ibalebale ni dau basika na veivakalougatataki ena gauna ga ni Kalou. O ira mada ga na parofita eliu ka vaqara tu na nodra itikotiko vakalomalagi era23 “mate ena vakabauta, ka sa sega ni nodra dina na veika sa yalataki, era sa raica vakayawa … ka ciqoma.”24 Ke se bera ni ciqomi e dua na veivakalougatataki gadrevi mai vua na Kalou—oqo—sega ni dodonu mo tavariri, ni vakananuma voli na cava tale mo kitaka. Ia, taura na ivakasala i Josefa Simici mo “kitaka na veika kecega [o] rawata ena yalomarau; ka qai … tudei sara, ka nuitaka tu, ni [ko] na raica … na liga [ni Kalou] … ni sa vakaraitaka mai.”25 Sa tauri vakawawa tu eso na veivakalougatataki, vei ira talega na luve ni Kalou yaloqaqa.26
Ena ono na vula sa oti, a vakatakilai kina e dua na ituvatuva vakatabakiduataki e vale, ka tokoni vaka Lotu ena vulici ni vunau, vaqaqacotaki ni vakabauta, kei na taqomaki ni tamata yadua kei na matavuvale. Sa yalataka o Peresitedi Russell M. Nelson ni na rawa ni vukea meda bula tu vakayalo, vakalevutaka na rekitaki ni kosipeli, ka vakatitobutaka na noda saumaki kivua na Tamada Vakalomalagi kei Jisu Karisito na veisau eso oqo.27 Ia sa vakatau tu vei keda na rawati ni veivakalougatataki oqo. Sa vakatautaki vei keda yadua meda dolava ka vulica na Lako Mai, Mo Muri Au—Me Baleta na Tamata Yadua kei na Matavuvale, vakakina na ivolanikalou kei na ivola Lako Mai, Mo Muri Au tale eso.28 Sa gadrevi meda veivosakitaka vaka matavuvale kei na veitokani ka vakarautaka na noda Siga ni Vakacecegu me uturaka e dua na kama veiganiti. Se rawa ni da laiva tu na ivurevure eso me veitenetenei tu ena noda itikotiko ni sogoti tu eloma na kaukauwa e rawa mai kina.
Au sureti iko mo cakacakataka na kaukauwa vakalomalagi ena vakabauta mo ciqoma vakatabakidua na veivakalougatataki ni Kalou. Cakacakataka na vakabauta mo waqaca na masese ka vakacaudreva na kama. Solia na cagi e sa gadrevi ni o waraka tu na Turaga ena yalomalua. Ena veisureti oqo, sa noqu masu ni na tuberi ka dusimaki iko na Yalo Tabu me rawa ni o, vakataka na tamata yalodina e vakamacalataki ena Vakaibalebale, “vakalougatataki vakalevu.”29 Au vakadinadinataka ni bula tiko na Tamamu Vakalomalagi kei na Luvena Daulomani, o Jisu Karisito, rau sa kauwaitaka na nomu tiko vinaka, ka taleitaka me vakalougatataki iko, ena yaca i Jisu Karisito, emeni.