Vakasaqarai ni Kilaka ena Yalotabu

Mai vei Elder Mathias Held

Ena Vitusagavulu

Sa dodonu meda vulica ni tugana na dina sega ga ena noda vakasama matau ia mai na domo rogo lailai sara ka malumu ni Yalotabu.

Kemuni na taciqu kei na ganequ lomani, e sa tukuna tu ga vei keda na Turaga meda “segata na kilaka, io ena vuli kei na vakabauta.”¹ Sa rawa ni da ciqoma na rarama kei na kila matata sega ga mai na noda vakasama navuci, ia mai na veituberi kei na veivakauqeti talega ni Yalo Tabu.

Na ikuri ni vurevure ni kilaka oqo e sega ni dau mai tiki tu ni noqu bula.

Keirau lewena na Lotu kei na watiqu lomani, o Irene, ena 31 na yabaki sa oti ni keirau se qai vakawati vou. Keirau a tubu cake e Colombia, ia ni oti e vula vica na neirau vakawati, a vakauti au na noqu cakacaka me keirau laki tiko e Jamani. Keirau a se gone sara ka tiko na vakanuinui kei na nanamaki levu sara; e sa dua dina na gauna taleitaki ka totoka vei keirau.

iVakatakilakila

Sister kei Elder Held

Ni’u vagolei au tu ki na noqu cakacaka, a vakila tu o Irene ni keirau na ciqoma e dua na itukutuku mai lagi, ka sega ni kilai na gauna kei na sala cava. Sa mani tekivu o koya ni vakacurumi ira ki vale na dauvolivolitaki e veivale na enisaikolopidia, misini ni sasamaki cerumi, ivola ni vakasaqa, iyaya ni valenikuro, kei na so tale, ni waraki tu na itukutuku vakasakiti oya.

Dua na bogi a tukuna vei au o koya ni rua na cauravou vakaisulu vinaka a tukituki ena neirau katuba ka vakila o koya e dua na veivakauqeti matata sara me vakacurumi rau. Rau kaya ni rau via tukuna tiko vua me baleta na Kalou ia rau na lesu tale mai ni’u sa tiko talega e vale. E rawa li ni o koya oqo na itukutuku e namaki tiko?

Rau sa tekivu sikovi keirau, mai na nodrau veituberi, keirau a wili ivolanikalou ka mai kila vakamatata na itavi bibi i Jisu Karisito me mai noda iVakabula ka Dauveivueti. Keirau mai veivutunitaka ni keirau a papitaisotaki vaka gone dramidrami, ka sega tu ni dua na veiyalayalati matata. Ia, na papitaiso tale sa kena ibalebale talega na mai lewena na Lotu vou oqo, imatai sa gadrevi sara me keirau kila vakamatata na veika taucoko e vakatavuvulitaki kina.

Ia e rawa vakacava ni keirau kila ni sa dina taucoko sara na ka erau tukuna tiko vei keirau na daukaulotu me baleta na iVola i Momani, o Josefa Simici, kei na yavu ni veivakabulai? Ia, keirau sa kila vakamatata tu mai na vosa ni Turaga ni rawa me keirau na “kilai ira ena vuadra.”² Ia, ena dua na ivalavala maqosa sara, keirau sa tekivu vakadikeva voli na Lotu ena kena vakaraici na vuanikau oya ena mata ni neirau vakasama momona duadua. Na cava keirau raica? Io, keirau raica:

Na tamata era mamarau ka veikauwaitaki kei na matavuvale totoka ka kila vakamatata tu ni sa nakiti meda na reki voli ena bula oqo ka sega walega ni sotava tiko na leqa kei na rarawa.
E dua na Lotu e sega ni ra saumi na kena italatala ia e dua era tauri lesilesi ka veiqaravi kina vakaiira na lewenilotu.
E dua na Lotu e mai lutua kina ni veika kecega o Jisu Karisito kei na matavuvale, era lolo na lewenilotu vakadua ena veivula ka cau mera vukei kina na dravudravua kei na vakaleqai, e vaqaqacotaki kina na ivakarau ni tiko bulabula, na veivakavulici ena vakuwai ni veika gaga.

Me kena ikuri:

Keirau a taleitaka na vakadreti ni tubucake vakaikoya, ena vuli, cakacaka vakaukauwa kei na bula rawati koya.
Keirau a vulica na parokaramu vakasakiti ni veivuke raraba.
Ka keirau kurabui saraga ena koniferedi raraba kei na sereivakatagi totoka vakakina na ivakavuvuli vakayalo momona era wasei kina.

Ni raici kece oqo, keirau a sega ni raica e dua na cala ena Lotu. Ena yasa kadua, keirau sa taleitaka saraga na ka kece keirau raica. Ia, keirau se sega ni navuca rawa me keirau papitaiso baleta ni keirau via kila tu na ka kece sara ni bera ni yaco.

Ia, ena neirau vakatulewa madaga, a sa vakarautaki keirau vakamalua tu na Turaga, e a moici keirau voli, ka vukei keirau tu ni dikeva ni sa dodonu me vulici me keirau vakila dei tu na dina sega walega ena neirau vakasama momona ia mai na domo rogo lailai sara talega ni Yalo, ka dau vosa vakabibi ki na lomada.

Na domo oya kei na vatuka ni kena vakilai a basika ena dua na bogi ni oti e 10 na vula ni vuli kosipeli, ni keirau wilika ena Mosaia 18, “Me vaka ni dou sa gadreva mo dou … colata vata na nomudou icolacola, …ka vakacegui ira era sa gadreva na veivakacegui, … ke sa vakaoqo na gagadre ni lomamudou, ia na cava sa tarovi kemudou mo dou papitaisotaki ena yaca ni Turaga?”³

A curuma na utoi keirau kei na yagoi keirau na tikina oya mai na iVola i Momani, ka keirau vakila ka kila deivaki ni sa sega ni vakainaki soti me keirau kua ni papitaiso. Keirau vakila na gagadre eso e tukuni tiko ena veitikina oqo e sa salavata na vakanuinui ni lomai keirau ka sai koya na veika e vakaibalebale vakalevu. Era sa bibi sara mai na kena kilai matata na ka kecega baleta ni sa veirauti tu na ka keirau kila. Keirau a dau vakanuinui tu ga ki na liga veituberi loloma ni Tamada Vakalomalagi ka nuidei tu ni na tomana voli o Koya me tuberi keirau.

Ia, ena siga vata oya, sa vakarautaki kina e dua na siga ni papitaiso, ka keirau mani mai papitaiso, sara!

iVakatakilakila

Nodrau papitaiso o Elder kei Sister Held

Na cava keirau sa vulica mai na ka a yaco oya?

Ai matai, keirau vulica ni sa rawa me keirau vakararavi vakaoti kivua na Tamada Vakalomalagi lomani, ka sa dau tovolea tu me vukei keda ni vakataka na tamata e kila o Koya eda rawa ni vakataka. Keirau vakadeitaka na dina momona ni Nona vosa ni a tukuna: “Au na solia vei ira na luve ni tamata na vosa ena vosa, na ivunau ena ivunau, vakalailai eke ka vakalailai e kea; ia sa kalougata o ira sa vakarorogo ki na noqu ivunau, … ni ra na vulica na yalomatua; ia kivei koya sa ciqoma au na solia vakalevu cake vua.”⁴

Ai karua, keirau vulica, me ikuri ni noda vakasama momona, e dua tale na ivakarau ni kena rawati na kilaka sa rawa ni tuberi ka soli vakasama vei keda. Sai koya na domo lailai ka malumu ni Nona Yalo Tabu e vosa tiko ki na lomada kei na noda vakasama.

Au via vakatauvatana na ivakavuvuli oqo ki na noda itovo ni rai. E sa solia vei keda na Tamada Vakalomalagi e sega ni dua ga ia e rua na mata vakayago. Sa rawa ni da rai vakarauta ga ena dua na mata, ia sa vakarautaka vei keda nai karua ni mata e dua tale na raiyawa. Ni sa biu ki na noda mona na raiyawa ruarua vata oya, rau sa vakavurea e dua na ivakatakilakila yalani tolu ki na veika e wavoliti keda.

Sa vakakina, e sa soli vei keda e rua na ivurevure ni tukutuku, mai na noda rawaka vakayago ka vakayalo. Sa vakavurea e dua na vakanananu na noda vakasama mai na noda kilakilaka vakayago kei na noda vakasama veivaqaqai. Ia mai na isolisoli ni Yalo Tabu, e sa vakarautaka talega vei keda na Tamada e dua nai karua ni raiyawa, ka sa bibi vakalevu sara ka dina tu, baleta ni sa lako vakadodonu mai Vua. Ia me vaka ni sega ni dau vakamacalataki rawarawa na vakasolokakana ni Yalotabu, era sa sega ni kila rawa kina e vuqa na tamata na ikuri ni vurevure oya.

Ni rau qai mai vakasotari vata na raiyawa e rua oqo ena noda bula, sa vakaraitaka vakataucoko e dua na yaloyalo na veika dina sara ni kedra ituvaki donu. Na dina oqo, mai na ikuri ni raiyawa ni Yalo Tabu, sa rawa ni vakatakilai eso na “veika dina,” e votu dei mai ena noda vakasama, me veicavilaki se cala. Nanuma na vosa i Moronai: “Ia ena kaukauwa ni Yalo Tabu dou na kila kina na dina ni veika kecega.”⁵

Ena 31 na yabaki ni noqu lewe ni Lotu tu, au sa sotakaya e vuqa na gauna ni kevaka eda vakanuinui duadua ga ki na noda vakasama momona ka cakitaka se beca na kila matata vakayalo eda rawa ni ciqoma mai na vakasolokakana kei na veivakauqeti ni Yalo Tabu, e sa na vaka eda lako curuma mata i dua tu ga na bula. Ia ena vosa vakatauvatani, e sa soli dina vei keda e rua na mata. Na vakasotari vata duadua ga ni rai ruarua sa rawa ni vakaraitaka vei keda na iyaloyalo dina ka taucoko ni veidina kece kei na veika kecega eda sotava ena noda bula, vakakina na kila momona vakaoti ni keda ivakatakilakila kei na inaki vaka na luvena na Tamada Vakalomalagi.

Au nanuma lesu na ka a vakatavulici keda kina o Peresitedi Nelson ena yabaki sa oti ni kaya “ena veisiga mai oqo, ena sega ni rawa tu meda bula vakayalo ke sega na veituberi, veidusimaki, veivakalomavinakataki, kei na veivakayarayarataki dei ni Yalo Tabu.”⁶

Au sa mai kila tu vakaidina sara ni:

E tiko e dua na Tamada dauloloma mai Lomalagi, ka da sa vakadonuya taucoko meda lako mai ki na vuravura oqo ka tiki ni dua na ituvatuva vakalou.
Sa Karisito o Jisu; e bula tiko ka sa noqu iVakabula ka Dauveivueti.
E dua na gonetagane mai na vanua ni teitei, yalomalua o Josefa, ka yaco tu me parofita qaqa ka tekivutaka oqo, na [vakaoti] kecega [ni] gauna sa lokuci, vata na kena idola taucoko, kaukauwa, kei na dodonu ni lewa ni matabete tabu ni Kalou.
Au kila ni sai karua ni ivakadinadina i Jisu Karisito na iVola i Momani ka ra sa nakiti na matavuvale mera tiko vata ka tawamudu.
Na noda Turaga, o Jisu Karisito, e liutaka oqo, na Nona Lotu vakalesui mai, mai vua na noda parofita bula, o Peresitedi Russell M. Nelson, edai.

Oqo kei na vuqa tale na dina vakasakiti sa yaco mera ituvatuva vakayalo ni ka e sa vukei au tiko kina na Kalou meu rawata. Ka’u sa vakanamata ki na vuqa na ivakavuvuli vou e se vinakata tu o Koya vei au—kei iko—me daru ciqoma ni da lako curuma na bula totoka oqo ka “kilaka … io ena vuli kei na vakabauta.”

Au kila ni sa dina na veika oqo ka’u vakadinadinataka ena yaca i Jisu Karisito, emeni.