Na Cakacaka ni Kaulotu: Wasea na Veika e Tu e Yalomu
Se vanua cava ga o tu kina e vuravura oqo, e levu tu na madigi me da wasea na itukutuku vinaka ni kosipeli i Jisu Karisito.
Ena vula sa oti a sureti keimami na Le Tinikarua na noda parofita lomani, o Peresitedi Russell M. Nelson, me keimami lako vata kaya ki na vakatabui ni Valetabu mai Roma e Itali. Ni keimami lako tiko au vakasamataka na iApositolo o Paula kei na nona veilakoyaki. Ena nona gauna, me lako mai Jerusalemi ki Roma ena rawa ni taura e 40 na siga. Nikua, ena dua na noqu waqavuka taleitaki, e lailai mai na 3 na auwa.
O ira na vuku vakaivolatabu era vakabauta ni a tiko voli mai Roma o Paula ena nona vola e vica na nona ivola, ka idola ni nodra vaqaqacotaki na lewe ni Lotu ena gauna ko ya vakakina na gauna oqo.
O Paula kei ira tale na vo ni lewe ni Lotu makawa, o ira na Yalododonu Taumada, e matau ka ra dau taleitaka na solibula. E vuqa era a vakacacani vakaca sara, me yacova ni ra mate.
Ena 200 na yabaki sa oti, o ira na lewe ni Lotu vakalesui mai i Jisu Karisito, o ira na Yalododonu Edaidai, era sa sotava talega e vuqa na veimataqali veivakacacani. Ia e dina ni yaco tiko na veivakacacani oqori (ka so na gauna ena vuku ni veivakacacani), sa toso tikoga na tubu ni Lotu i Jisu Karisito ni Yalododonu Edaidai ka sa kunei edaidai e vuravura taucoko.
E se Levu na ka Me Da Vakayacora
Ia, ni se bera ni da vavia e dua na keke, kaburaki na tikitiki lalai ni pepa taliva, ka vakacaucautaki keda ena rawaka vakasakiti oqo, ena vinaka me da dikeva mada na tubu oya.
E rauta vakacaca ni vitu veimama na bilioni na tamata e vuravura, ni vakatauvatani ki na 16 na milioni na lewe ni Lotu i Jisu Karisito ni Yalododonu Edaidai—e dua na qelena lailai sara.1
Ena gauna oqo, sa lailai tiko mai na vakabauta Vakarisito ena so na yasai vuravura.2
Ena nona Lotu vakalesui mai na Turaga—ni tubu tiko na iwiliwili ni lewenilotu—sa rui lewe levu era sega ni mai taura tiko me nodra na veivakalougatataki ni vakaitavi e veigauna ena Lotu.
E dua tale na kena itukutukuni, se evei ga na vanua o tu kina ena vuravura oqo, e levu tu na madigi mo wasea na itukutuku vinaka3 ni kosipeli i Jisu Karisito vei ira na tamata o sotava, vuli vata, vakaitikotiko vata se cakacaka, ka veimaliwai kaya.
Ena yabaki sa oti qo, a noqu na madigi taleitaki meu vakaitavi vakatitobu ena cakacaka ni kaulotu ena Lotu e vuravura raraba. Au sa dau vakananuma vakatitobu ena vuqa na gauna na ilesilesi cecere ni iVakabula vei iratou na Nona tisaipeli: “O koya mo dou qai lako ka vakalotutaki ira na lewe ni veivanua kecega ka papitaisotaki ira ena yaca ni Tamamudou, kei na Luvena, kei na Yalo Tabu.”4
Au sa vakasamataka vakalevu na taro oqo “Ena rawa vakacava, me vaka ni da lewenilotu ka tisaipeli i Karisito, me da qarava vakavinaka duadua na ilesilesi cecere oya ena noda bula e veisiga?”
Nikua au sureti kemuni mo ni vakananuma vakatitobu e yalomuni kei na nomuni vakasama na taro oya.5
E Dua na iSolisoli ni Cakacaka ni Kaulotu
Era sa dau vakabibitaka na iliuliu ni Lotu na kaci kaukauwa “Na lewenilotu yadua e daukaulotu!” ena veitabayabaki.6
O ira na lewe ni Lotu i Jisu Karisito—ena veigauna sa oti kei na noda oqo—era a dau wasea na kosipeli ena igu kei na reki vei ira na itokani kei na nodra veikilai. E caudre tu e lomadra na ivakadinadina kei Jisu Karisito, ka ra gadreva dina me ra vakila na tani na reki vata era sa kunea ena nona kosipeli na iVakabula.
Eso na lewenilotu e vaka e tu vei ira e dua na isolisoli ni ka oqo. Era taleitaka me ra matataka na kosipeli. Era veiqaravi ka liu ena cakacaka vakalewenilotu daukaulotu ena yalo doudou ka mamarau.
Ia, eso tale vei keda eda dau tuvakasuka. Ni veivosakitaki ena veisoqoni ni Lotu na cakacaka ni kaulotu, sa dau cuva sobu vakamalua na ulu me yacova ni sa yali yani ena yasa ni dabedabe, sa coba na mata ena ivolanikalou se bobo ena vakanananu titobu me kua ni sota na mata kei ira na vo ni lewenilotu.
Baleta na cava? Baleta beka ni da kilaiyalodataka tu ni da sega ni cakava tiko eso na ka me da wasea na kosipeli. Eda sega beka ni kila na kena icakacaka. Se da rere beka ni biuta na veivanua eda logaloga vinaka toka kina.
Au kila qo.
Ia nanuma, e sega vakadua ni gadreva na Turaga na sasaga vakaulotu kenadau, ka sega na kena cala. Ia, “Sa gadreva na Turaga na yalo kei na vakasama sa vakarau tu.”7
Kevaka o sa cakava tiko ena yalo mamarau na cakacaka ni kaulotu, yalovinaka kitaka tikoga, ka tu mo ivakaraitaki vei ira tale eso. Ena vakalougatataki iko na Turaga.
Kevaka, o nanuma ni o vakasavuliga voli ga ena wasei ni kosipeli, au vakatura mada e lima na ka ena sega kina na kilaiyaloda ka rawa ni cakava na tamata kecega me vakaitavi ena nona veilesi cecere na iVakabula me vukea na vakasoqoni kei Isireli?
Lima na Vakatutu Rawarawa
iMatai, toro voleka vua na Kalou. Na imatai ni vunau cecere mo lomana na Kalou.8 Oqo na inaki taumada eda tiko kina e vuravura oqo. Tarogi iko, “Au vakabauta dina beka na Tamada Vakalomalagi?”
“Au lomani Koya beka ka nuitaki Koya?”
Na voleka ni nomu toro yani vua na Tamada Vakalomalagi, na levu ni kena cila mai vei iko na Nona rarama kei na reki. Era na raica vei iko na tani e dua na ka e duatani ka talei. Ka ra na tarogi iko kina.
iKarua, vakasinaita na yalomu ena lomani ira na tani. Oqo na ikarua ni vunau levu.9 Tovolea mo raici ira vakaidina na tu wavoliti iko ni ra luvena na Kalou. Qaravi ira—veitalia ke tiko na yacadra ena nomu yacalesi ni veiqaravi ni marama se turaga.
Dredre vata kei ira. Reki vata kei ira. Tagi vata kei ira. Rokovi ira. Vakabulai, laveti, ka vaqaqacotaki ira.
Segata mo vakatotomuria na loloma i Karisito ka yalololoma ena vukudra na tani—vei ira mada ga era caka cala vei iko, era vakalialiai iko ka vinakata me ra vakamavoataki iko. Lomani ira ka raici ira ni da luvena vata na Tamada Vakalomalagi.
iKatolu, segata mo lakova na salatu ni bula vakatisaipeli. Ni sa titobu cake nomu lomana na Kalou kei ira na Luvena, sa na vakakina nomu yalayala mo muri Jisu Karisito.
Eda vulica na Nona sala ena noda kanamagiti ena Nona vosa ka tugana qai bulataka na nodra ivakavuvuli na parofita kei na iapositolo ni gauna oqo. Ena tubucake nomu yalodei kei na yaloqaqa mo muria Nona sala ni o veivosaki kei Tamada Vakalomalagi ena yalo e vakarau tu me vakavulici.
Na lakovi ni salatu ni bula vakatisaipeli e ka ni vakatovotovo—e veisiga, vakalalai, “na iloloma soliwale ki na iloloma soliwale,”10 “na vunau ena vunau.”11 Ena so na gauna rua na ikalawa i liu ka dua i muuri.
Na ka bibi sai koya ni o sega ni soro; o na tovolea tikoga me donu. Ena yaco mo vinaka cake, mamarau, ka kadina cake. Ena yaco me matau ka itovonibula na veivosaki kei ira na tani baleta nomu vakabauta. Ia, sa na yaco na kosipeli me dua na tiki bibi ka taleitaki ni nomu bula ka na dragali na bula ni sega ni veivosakitaka kei ira na tani. Ena sega beka ni yaco vakatotolo oqo—e sasaga ni bula taucoko. Ia ena yaco ga.
Kena iKava, wasea na veika e tu e yalomu. Au sega ni kerea tiko mo laki duri tu ena dua na tutu ni sala kei na dua na gusunivosa ka kaila vaka tu na veitiki ni iVola i Momani. Na ka au kerea tiko mo vaqara na madigi eso mo vakacilava cake nomu vakabauta ena veitalanoa dau caka e veigauna kei ira na tamata—ruarua ena matanavotu kei na initaneti. Au kerea tiko mo “tu ka vakadinadinataka”12 na mana ni kosipeli ena veigauna kecega—vakakina ena gauna e veiganiti, vosa ga.13
Baleta “na kosipeli i Karisito … sai koya na kaukauwa ni Kalou me [ia na veivakabulai],” e rawa ni o yalodei, yaloqaqa, ka yalomalumalumu ni o wasea.14 E vaka eratou itovonibula veisaqasaqa na yalodei, yaloqaqa, kei na yalomalumalumu, e sega sara ni vakakina. Eratou vakaraitaka na nona veisureti na iVakabua me kua ni vunitaki na yaga kei na ivakavuvuli ni kosipeli ena ruku ni ivakarau ni sila ia mo vakacaudreva na nomu rarama, me rawa ni vakacaucautaki na Tamada mai Lomalagi ena nomu caka vinaka.15
E vuqa tu na ivakarau matau dau caka e veisiga me caka kina, mai na caka vinaka e veisiga ki na ivakadinadina yadua ena YouTube, Facebook, Instagram, se Twitter kei na veitalanoa rawarawa ga kei ira na tamata o sotava. Ena yabaki oqo eda vuli tiko mai na Veiyalayalati Vou ena noda veivale kei na Matawilivola ni Sigatabu. Sa dua na madigi taleitaki me ra sureti mai na itokani kei na veiwekani ki lotu kei na nomuni veivale me da vulica me baleta na iVakabula. Wasea vata kei ira na Gospel Library app, me ra raica kina na Lako Mai, Mo Muri Au. Kevaka o kilai ira na itabagone kei na nodra matavuvale, solia vei ira na ivolalailai ni Me iSakisaki ni iTabagone ka sureti ira me ra lako mai ka raica na ivakarau era segata kina na noda itabagone me ra bulataka na veivakavuvuli oqori.
Kevaka e dua e taroga baleta na ka o cakava ena mua ni macawa, kakua ni vakataratutu mo tukuna na veika o sotava ena lotu. Tukuna me baleti ira na gonelalai era dau tu e matadra na ivavakoso ka lagata ena yalo vakanuinui ni ra tovolea tiko me ra vakataki Jisu. Tukuna me baleti ira na ilala itabagone era dau vukei ira na qase ena veivanua ni veiqaravi me vakasokumuna na kedra itukutuku makawa. Tukuna na veisau vou ena noda soqoni ni Sigatabu kei na kena veivakalougatataki ki na nomu matavuvale. Se vakamacalataka na vuna eda vakabibitaka kina ni oqo na Lotu i Jisu Karisito ka ni o keda na Yalododonu Edaidai, me vaka ga era a vakatokai talega kina na lewe ni Lotu makawa ni ra Yalododonu.
Se na ivakarau cava ga e matau ka rawarawa vei iko, wasea vei ira na tamata na vuna e bibi kina vei iko o Jisu Karisito kei na Nona Lotu. Sureti ira me ra “lako mai ka raica.”16 Qai vakayaloqaqataki ira me ra lako mai ka veivuke. E levu tu na madigi me ra veivuke kina na tamata ena noda Lotu.
Masulaka me kunei o ira na digitaki era sa vakarau tu o ira na daukaulotu. Masuta mai vuniyalomu e veisiga mo kunei ira era na lako mai ka mai raica, veivuke, ka tiko dei. Nanuma mo okati rau tiko na daukaulotu tudei. O rau erau vaka na agilosi, tuvakarau me veivuke.
Ni o wasea na itukutuku vinaka, na kosipeli i Jisu Karisito, kitaka ena loloma kei na vosota. Kevaka eda veitaratara tiko kei ira na tamata ka noda nanamaki vakatabakidua ni sega ni dede era na dara e dua na ovarola vulavula ka taroga na sala ki na tobu ni papitaiso voleka duadua, e cala na ka eda cakava tiko.
Eso era lako mai me ra raica, e rairai, ni ra na sega ni lewena na Lotu, eso ena dua beka na gauna e muri. Oya na nodra digidigi. Ia oqori ena sega ni veisautaka nomu lomani ira. Ka na sega talega ni veisautaka noda sasaga gugumatua me da veisureti tikoga vei ira na tamata yadua kei na matavuvale me ra lako mai ka raica, lako mai ka veivuke, ka lako mai ka tiko dei.
Na iKalima, vakabauta na Turaga me vakayacora Nona cakamana. Me da kila ni sega ni noda cakacaka me da veisautaka na tamata. Oqori na itavi ni Yalo Tabu. Nomu itavi mo wasea na veika e tu e yalomu ka bulataka dei tu na nomu vakabauta.
Kakua ni yalolailai kevaka e dua e sega ni ciqoma na itukutuku ni kosipeli ena gauna vata ga. E sega ni nomu druka.
Oqori e nodrau ga na tamata oya kei na Tamada Vakalomalagi.
E nomu itavi, mo lomana na Kalou kei na wekamu, o ira na Luvena.
Vakabauta, lomana,ka kitaka.
Mo muria na salatu oqo, ena cakamana na Kalou ena vukumu mo vakalougatataki ira na Luvena taleitaki.
Ena vukei iko na lima na vakatutu oqo mo cakava na veika era a cakava na tisaipeli i Jisu Karisito ena veigauna makawa. Sa tiki bibi sara ni nomu bula vakakina na kemu ituvaki kei na veika o cakava na Nona kosipeli kei na Nona Lotu. Sureti ira na tani me ra lako mai ka raica ka lako mai me veivuke, ena vakayacora na Kalou na Nona cakacaka ni veivakabulai, era na qai lako mai ka tiko dei.
Ia Vakacava Kevaka e Dredre?
“Ia,” o na taroga beka, “vakacava kevaka au cakava na veika kece oqo ka sega ni ra malele mai na tamata? Vakacava kevaka era besetaka na Lotu? Vakacava kevaka era sa sega ni via veitokani kei au?”
Io, e rawa ni yaco oqori. Me tekivu mai na veigauna makawa, era a dau vakacacani na tisaipeli i Jisu Karisito.17 A kaya na iApositolo o Pita, “Ia dou reki ga … ni [da] sa vakaivotavota talega ena veivakararawataki i Karisito.”18 Era a reki na Yalododonu taumada oya “ni sa yaga me ratou vakacacani ena vuku ni yacana.”19
Nanuma tiko, na Turaga e dau cakacaka ena veisala vuni. E rawa ni yaco ena nomu sotava na biliraki ena yalo Vakarisito ena rawa ni vakamalumutaki kina e dua na yalo kaukauwa.
Niu dua na iApositolo i Jisu Karisito, au vakalougatataki kemuni ena yalodei mo ni ivakadinadina bula ni veika uasivi ni kosipeli, kei na yaloqaqa me da dau kilai tikoga ni da lewe ni Lotu i Jisu Karisito ni Yalododonu Edaidai, kei na yalomalumalumu me da veivuke ena Nona cakacaka me ivakaraitaki ni nomu lomana na Tamada Vakalomalagi kei ira na Luvena.
Kemuni noqu itokani lomani, ko ni na reki ena nomuni kila ni ko ni sa tiki ni nodra vakasoqoni vata na Isireli sa tukuni makawa tu mai, ka vakarautaka nona lako mai na Karisito ena “kaukauwa kei na lagilagi levu; vata kei ira na agilosi yalosavasava.”20
E kilai kemuni na Tamada Vakalomalagi. E lomani kemuni na Turaga. Ena vakalougatataki kemuni na Kalou. E vakavuna o Koya na cakacaka oqo. Sa rawa ni ko cakava. Eda sa duavata tiko ena ka oqo.
Au sa vakadinadinataka oqo ena yaca i Jisu Karisito, emeni.