Vakaukauwataka Nomu Masela Vakayalo
Me vaka ni sega ni rawa ni taracake na masela na noda wilika se vulica na veika e baleta, na vulici kei na wiliki ni veika e baleta na vakabauta ka sega ni vakuri yani ena cakacaka e sega ni rawa ni tara cake na vakabauta.
Au vakavinavinakataka na veivakalougatataki ni vakayago, e dua na isolisoli veivakurabuitaki mai vei Tamada Vakalomalagi. E tu ena yagoda e sivia ni 600 na masela.1 E levu na masela e gadreva me vakaukauwataki me tuvakarau kina me qarava na itavi ni veisiga. E rawa ni da vakayagataka e levu na igu ni vakasama me da wilika vulica na veika e baleta noda masela, ia kevaka eda nanuma ni ra na vakaukauwataki kina, eda na yalorarawa sara. Ena tubu na noda masela ni da vakayagataka.
Sa yaco meu kila ni ra vakakina na isolisoli vakayalo. Era gadreva talega me ra vakaukauwataki me ra tubu. Na isolisoli vakayalo ni vakabauta, me kena ivakaraitaki e sega ni dua ga na ka e vakilai se ivakarau ni yalo; oqo e dua na ivakavuvuli ni cakacaka ka dau basika wasoma ena ivolanikalou ni semati ki na vosa na cakacaka.2 Me vaka ni sega ni rawa ni taracake na masela na noda wilika se vulica na veika e baleta, na vulici kei na wiliki ni veika e baleta na vakabauta ka sega ni vakuri yani ena cakacaka e sega ni rawa ni tara cake na vakabauta.
Ena gauna au yabaki 16 kina, a lako mai vale ena dua na siga na tuakaqu qase duadua, o Ivan, ka yabaki 22 tiko ena gauna oya, ka mai wasea e dua na itukutuku ki na matavuvale. Sa lewa me sa na papitaiso ki na Lotu i Jisu Karisito ni Yalododonu Edaidai. Erau vakaraici koya na neirau itubutubu ka vaka me rau sega ni vakabauta, kau nanuma na noqu sega sara ga ni kila na veika e yaco tiko. Ena dua na yabaki i muri, a kauta mai vei keitou eso tale na itukutuku veivakidacalataki: sa lewa me sa na veiqaravi vakadaukaulotu ni Lotu, kena ibalebale ni keitou na sega ni raici koya ena rua na yabaki. Erau a sega ni marautaka noqu itubutubu na itukuutuku oya; ia, au raica na dei ni yalona ka vakalevutaka na noqu qoroi koya kei na lewa sa vakatauca.
Ni oti e vica na vula, ni sa kaulotu tiko o Ivan, A noqu na madigi meu vakarautaka e dua na vakacagicagi kei na so noqu vulivata. Keimami via marautaka ni sa mai cava na neimami vuli torocake ka gade me vica na siga e baravi.
Au volavola vei tuakaqu daukaulotu ka tukuna noqu ituvatuva ni vakacagicagi ena vulaikatakata. A volavola lesu mai, ni tauni e veiqaravi tiko kina e tiko ena gaunisala keimami na lakova. Au mani nanuma ni na vinaka meu cegu e kea ka sikovi koya Au qai kila e muri ni sega ni dodonu me ra dau sikovi na daukaulotu mai vei ira na nodra matavuvale.
Au veivosakitaka na veika kece. Au nanuma lesu na noqu dabe toka ena basi ka vakasamataka na neirau na veilasamaki kei Ivan ena siga totoka oqo. Keirau na katalau, veitalanoa, qito e veinuku, vakacilavi siga—sa na dua na gauna taleitaki vei keirau!
Ni yaco yani na basi ena vanua dau kele kina, au raici Ivan ni rau duri vata tu kei na dua na cauravou, erau vakasote vulavula kei na neketai. Au sobu yani keirau veimokomoko, ka vakaveikilaitaki au vei nona itokani. Au sega tale ni qai vakalusia e dua na miniti ena noqu sa tuva vei tuakaqu na noqu ituvatuva me baleta na siga oya, ia au sega tiko ni kila ni sa tuvaka oti tu o Ivan. A raici au mai, matadredre, ka kaya, “Donu! Ia, me keirau qarava mada eso na itavi. O via lako vata kei keirau?” Au vakadonuya, niu nanuma ni levu tu na gauna me keitou qai qito kina e baravi ni oti oya.
Ena siga oya, e sivia ni 10 na auwa, neitou taubaletaka tu na veigaunisala ena tauni oya kei tuakaqu kei nona itokani. Au matadredre yani vei ira na tamata ena siga taucoko. Au kidavaki ira na tamata au sega ni se raica vakadua ena noqu bula. Keitou vosa vei ira na tamata kecega, tukituki e nodra katuba na tamata keitou sega ni kila, ka sikovi ira na tamata erau vakavulica tiko o tuakaqu kei na nona itokani.
Ena dua na veisiko oya, erau a vakavulica tiko o tuakaqu kei nona itokani na veika baleti Jisu Karisito kei na ituvatuva ni veivakabulai. Vakasauri nona cegu vakalailai o Ivan ka raici au mai. Au kidacala, nona kerei au mai vakamalua meu wasea noqu nanuma baleta na veika e vakavulici tiko. E vakanomodi na rumu, ka coba kece mai vei au na mata. A dredre vakalailai, ia au qai kunea na vosa ka wasea na lomaqu baleta na iVakabula. Au sega ni kila kevaka e donu se cala na ka au wasea. A sega ni vakadodonutaki au o tuakaqu; ia na kena veibasai, a vakavinavinakataki au ena noqu wasea noqu vakasama kei na lomaqu
Ena veiauwa keitou tiko vata kina oqori, erau a sega ni vakavulici au mai vakadodonu ena dua mada ga na miniti na tuakaqu kei na nona itokani, ia au a kila e levu cake na ka mai na neirau dau veitalanoa kece sara ena gauna e liu. Au vakadinadinataka na veisau ni irairai ni tamata ni ra sa ciqoma na rarama vakayalo ena nodra bula. Au raica na nodra kunea na inuinui ena itukutuku, eso vei ira, kau vulica na ivakarau ni veiqaravi vei ira na tani ka guilecava na veika e baleti au kei na noqu gagadre. Au a cakava tiko na veika e vakavulica na iVakabula: “Kevaka e dua sa via muri au, me kakua ni muria na lomana.”3
Niu railesu, au qai kila ni a tubu ena siga oya na noqu vakabauta baleta ni a solia o tuakaqu na madigi meu cakacakataka. Au cakacakataka ena neitou wilika na ivolanikalou, vaqara na tamata me vakavulici, wase ivakadinadina, qaravi ira na tani, kei na so tale. Keitou mani sega ni vakacilavi siga rawa ena siga oya, ia a cilavi na noqu bula ena rarama mai lomalagi. Au sega mada ga ni bau raica e dua na mataninuku lailai e baravi, ia au vakila ni tubu na noqu vakabauta me vaka e dua na sore ni mosita lailai.4 Au a sega ni vakayagataka na siga katakata oya me vaka e dua na saravanua, ia au a sotava eso na veika vakasakiti, kau sega walega ni kila, niu sa daukaulotu—au se bera mada ga ni lewena na Lotu!
Madigi ni Vakaukauwa Masela Vakayalo
Me vakavinavinakataki na Vakalesui mai ni kosipeli, sa rawa kina me da kila na ivakarau e vukei keda kina na Tamada Vakalomalagi me tarai cake na isolisoli vakayalo. E kena irairai ni na solia vei keda o Koya na madigi me da vakavinakataka cake na veisolisoli oqori ka sega ni solia wale tu ga vakailoloma vei keda ka sega ni da cakacakataka vakayalo ka vakayago. Kevaka e tu vei keda na Yalona, eda na vulica me da raica ka kila na veimadigi oqori ka qai cakacakataka.
Kevaka eda gadreva me levu cake na dauvosota, eda na raica ni da gadreva me da vakatovotovotaka ni da waraka tiko na kena isau. Kevaka eda vinakata me levu cake noda lomana na kainoda, eda na rawata ena noda dabe tikiva e dua na mata vou ena gauna ni lotu. Ena vakabauta e tautauvata: ni vakatitiqa noda vakasama, ena gadrevi me da vakabauta na yalayala ni Turaga me da toso ki liu. Ena ivakarau oqo eda sa vakaukauwataka tiko kina na masela vakayalo ka tara cake me ivurevure ni kaukauwa ena noda bula.
Ena sega beka ni rawarawa ena kena itekivu, ka na rawa sara ni yaco me dua na bolebole levu. Na vosa ni Turaga, mai vua na parofita o Moronai, sa baleti keda nikua: “Ka kevaka era na lako mai vei au ko ira na tamata, au na vakaraitaka vei ira na nodra malumalumu. Au sa solia vei ira na tamata na malumalumu me ra vakayalomalumalumutaki ira kina; ia sa rauti ira vinaka na tamata kecega era sa vakayalomalumalumutaki ira vei au na noqu loloma soli wale; ni kevaka era sa vakayalomalumalumutaki ira vei au, ka vakabauti au, au na qai vakayacora me vu ni nodra kaukauwa na veika malumalumu”5.
Au vakavinavinaka vakalevu vua na tuakaqu o Ivan, a sega walega ni wasea vei au na kosipeli ia a sureti au talega meu bulataka ka kila na noqu malumalumu. A vukei au o koya meu ciqoma na veisureti ni iVakavuvuli: “Lako mai, ka muri au”6—meu lako me vaka nona lako na iVakabula, vaqaqara me vaka nona vaqaqara na iVakabula, ka loloma me vaka nona lomani keda na iVakabula. Ena vica na vula i muri, ni oti noqu vakaitavi vakadaukaulotu, au sa lewa meu papitaiso ka qarava noqu kaulotu.
Me da ciqoma na veisureti nei Peresitedi Russell M. Nelson ka lako mai ena yalodina vua na iVakabula7 ena noda kila na veimasela e gadreva vakalevu na veicakacaka vakayalo ka tekivu vakaukauwataki ira. Oqo na veitaucici balavu ka sega ni veitaucici leka, kakua ni guilecava na veicakacaka lalai vakayalo me dau caka e veigauna ka na vakaukauwataka na masela vakayalo. Kevaka eda vinakata me da vakalevutaka cake noda vakabauta, me da cakava na veika e gadreva na vakabauta.
Au vakadinadinataka ni o keda na luvena na Tamada Vakalomalagi dauloloma. E lomani keda na Luvena, o Jisu Karisito. A lako mai ki vuravura me vakaraitaka vei keda na sala ka qai solia wale na Nona bula me noda inuinui. E sureti keda na iVakabula me da muria Nona ivakaraitaki uasivi, me da cakacakataka noda vakabauti Koya kei na Nona Veisorovaki, ka vakalevutaka na isolisoli vakayalo eda sa vakalougatataki kina. Sai Koya na sala. Oqo na noqu ivakadinadina ena yaca i Jisu Karisito, emeni.