“Lako Mai, Mo Muri Au”
Sa sureti keda o Jisu Karisito meda taura na sala lesu ni veiyalayalati ki vale vei rau noda iTubutubu Vakalomalagi kei ira eda lomana.
Kemuni na taciqu kei na ganequ lomani, au marautaka kei Wendy na watiqu na tiko kei kemuni ena mataka ni Siga ni Vakacecegu nikua. E vuqa na ka sa mai yaco mai na noda koniferedi raraba sa oti. Era sa vakatabui na veivaletabu vou mai Concepción, Chile; Barranquilla, Colombia; kei Roma, e Italy. Keimami a vakila na sovaraki bula mai ni Yalo ena veisoqoni tabu oqo.
Au vakacaucautaki ira na vuqa na marama (kei na turaga) era se qai wilika oti ga na iVola i Momani ka kunea kina na reki kei na iyau vuni. Au sa vakauqeti ena itukutuku ni cakamana sa ciqomi.
Au qoroi ira na cauravou yabaki 11, era sa dikoni tiko, ena nodra vota kilikili tiko na sakaramede ena vei Siga Tabu. Era gole ki valetabu vata kei ira na noda goneyalewa yabaki 11, era sa vuli ka veiqaravi gumatua tiko vaka Maqusa. O ira na cauravou kei na goneyalewa era sa vunautaka tiko na dina ni kosipeli ena savasava kei na yalodina.
Au rekitaki ira na lalai kei na itabagone era sa vukea tiko na vakavulici ni kosipeli ena nodra itikotiko ena cakacaka vata kei ira nodra itubutubu mera muria na lewenivuli e kena usutu na vuvale, ka tokona na Lotu.
E a ciqomi na itaba oqo nei Blake yabaki va, a taura ena mataka ni Vakarauwai, e dua na ivola ni Lotu ka kaya, “Au gadreva meu vakania na yaloqu!”
Blake, keimami dokai iko kei ira eso era sa digitaka mera vakania na yalodra ena kana magiti ena dina ni kosipeli vakalesuimai i Jisu Karisito. Eda sa marau ena noda kila ni vuqa era sa ciqoma tiko na kaukauwa ni Kalou ki na nodra bula ni ra sokalou ka veiqaravi e valetabu.
E vuqa ko ni sa kila tiko, a mai veitawasei malumu na neitou vuvale ena tolu na vula sa oti ni a mai takali o luvei keirau yalewa o Wendy mai na bula oqo. Ena icavacava ni nona siga ni valuti ena kenisa, au kalougata ena madigi me keirau veitalatala vaka tama-kei luvena yalewa.
Au a taura na ligana ka kaya vua niu lomani koya sara vakalevu kau vakavinavinaka niu a mai tamana. Au a kaya: “O sa vakamau oti e valetabu ka o rokova ena yalodina na nomu veiyalayalati. O iko kei watimu o drau sa kidavaka mai e vitu na gone ki na nomudrau vale ka susugi ira mera tisaipeli yalodina i Jisu Karisito, lewe ni Lotu qaqa, ka lewenivanua lomasoli. Era sa mai digitaka na watidra ena itagede vata ga o ya. O tamamu e dokai iko vakalevu, ka vakalevu sara ga. O sa kauta vakalevu maivei au na reki!”
A kaya malua ga mai, “Vinaka vakalevu, Ta.”
A dua dina na gauna veilomani, veitagicaki vei keirau. Ena 67 ni nona yabaki, keirau a cakacaka vata, lagasere vata, ka vakasisi sinou vata. Ia na yakavi o ya, keirau a veivosakitaka na veika bibi sara, me vaka na veiyalayalati, cakacaka vakalotu, talairawarawa, vakabauta, vuvale, yalodina, loloma, kei na bula tawamudu.
Keirau sa nanuma vakalevu na luvei keirau. Ia, me baleta ga na kosipeli vakalesuimai i Jisu Karisito, keitou sega ni lomaleqataki koya. Ni keitou doka tikoga na neitou veiyalayalati kei na Kalou, keitou sa namaka me keitou na tiko vata tale kei koya. Sa vakakina, ni keitou sa qarava tiko na Turaga eke ka qaravi Koya tiko mai kea o koya—e parataisi.1
Na kena dina, keirau a lako dina i Parataisi ena itekivu ni yabaki oqo—e Parataisi, mai California. Ni keitou sa lako, na gauna ni neitou veisiko e kea a lailai mai na 40 na auwa ni takali oti o luvei keirau yalewa mai na vuravura oqo. Keirau vakaveiwatini, vata kei Elder Kevin W. Pearson kei na watina o June, o ira na Yalododonu ena iTeki o Chico California. Keitou a raica na cecere ni nodra vakabauta, veiqaravi, kei na cakamana a yaco ena gauna ni nodra vakararawataki levu mai na kama vakarerevaki ni veikau ni itukutuku kei California.
E kea, keitou a veivosaki vakabalavu kei na dua na ovisa cauravou, o John, a dua talega na tamata qaqa e vuqa a liu e kea. A talanoataka na kubou butobuto a curumi Paradise yani enai ka 8 ni Noveba, 2018, kei na yameyame kei na qilaiso waqa a vukataki yani i taoni, ka vakarusa na veivale kei na iyaya me vaka e kania yavuta ka sega na ka e vakavoca ia na ibini dravusa kei na ikuvukuvu buloko suivotu.
E 15 na auwa, na nona draiva curuma yani o John na butobuto vavaku era veicokayaki kina na qilaiso waqa rerevaki ena nona sa vukei ira vakaveitarataravi tiko na tamata, kei na vuvale mera drobula—ena nona solibula vakarerevaki sara. Ia ena gauna rerevaki levu oqo, a rerevaka tiko o John na taro sa solegi koya voli tiko: “Evei na noqu matavuvale?” Ni oti e vuqa na auwa, balabalavu rerevaki ni veilecayaki, a qai kila ni ratou a vuetaki rawa.
Na itukutuku ni kauwai nei John baleta nona vuvale a vakauqeti au meu vosa nikua vei kemuni ko ni na rairai taroga beka ni vakarau cava na nomuni bula eke, “Evei na noqu matavuvale?” Ena siga sa roro mai oqori ni ko sa vakacavara nomu tiko vakawawa eke ka curuma yani na vuravura ni yalo, sa na tadravi iko tu na taro vakariseyalo o ya: “Evei na noqu matavuvale?”
E vakavulica o Jisu Karisito na sala lesu ki na noda itikotiko tawamudu. Sa kila vinaka cake maivei keda o Koya na ituvatuva nei Tamada Vakalomalagi baleta na torocake tawamudu. Ni sai Koya ga, na kena vatuivakadei taucoko. O Koya na noda Dauveivueti, noda Dauniveivakabulai, ka noda iVakabula.”
Vakatekivu mai na gauna a cemuri kina o Atama kei Ivi mai na Were o Iteni, sa dedeka tu o Jisu Karisito na Ligana qaqa me vukei ira kece sa digitaka mera muri Koya. Sa tukuna tikoga, na ivolanikalou, se cava sara na veimataqali ca mai vei ira na veimataqali tamata sa dodoka tu ga mai o Koya na ligana.2
Na yalo sa tu e lomana yadua sa dau gadreva ga na loloma ni vuvale me tawacava rawa. Na sere ni dodomo e vakavurea na inuinui lasu ni loloma ga o ni gadreva mo ni bula tawacava vata kina. Ka so e cala nodra vakabauta ni Tucaketale i Jisu Karisito e yalataka ni tamata kece era na laki tiko vata kei ira nodra daulomani ni ra sa mate.
Na ka dina, na iVakabula Vakai Koya sa vakamatatataka vakavuqa ni Nona Tucaketale sa vakadeitaka ni tamata yadua a bula ena tucaketale ka bula tawacava,3 ia sa gadrevi e levu cake tale na ka meda rawata kina na bula vakacerecerei sara. Na veivakabulai sa ka ni tamata yadua, ia na bula vakacerecerei sa ka ni vuvale.
Rogoca na vosa oqo ni Turaga o Jisu Karisito vei Nona parofita: “Na veiyalayalati, veidinadinati, ivesu, na icolacola, na veiyalayalati vosa, na cakacaka, na isema, isoqosoqo, se na veika namaki, era sega ni caka ka veiyalayalatitaki ka dregati ena Yalo Tabu ni yalayala … ena sega na vuana, sega ni mana, se kaukauwa ena gauna ni tucake tale mai na mate; se ni sa oti kevaka ena sega ni caka vakaoqo na veidinadinati ena yacova walega na mate.”4
Ia, na cava sa vinakati me yaco kina na vuvale me bula vakacerecerei tawacava kina? Eda sa rawata na madigi o ya ni da veiyalayalati kei na Kalou, maroroya na veiyalayalati oqo, ka ciqoma na cakacaka vakalotu bibi.
Sa ka dina tu mai oqo mai na ivakatekivu ni gauna. O Atama kei Ivi, Noa kei na watina, Eparama kei Serai, Liai kei Seraia, kei ira kece na tisaipeli yalodina i Jisu Karisito—vakatekivu mai na buli kei vuravura—era a cakava na veiyalayalati vata oqo kei na Kalou. Era a ciqoma na cakacaka vakalotu vata oqo eda a ciqoma na lewe ni Lotu vakalesui mai ni Turaga nikua, ena papitaiso vakakina e valetabu.
Sa sureti keda kece na iVakabula meda muri Koya ki na wai ni papitaiso ka yaco sara meda cakava na ikuri ni veiyalayalati kei na Kalou e valetabu ka ciqoma ka yalodina ki na cakacaka vakalotu e tarava. Sa gadrevi kece oqo ke da gadreva meda bula vakacerecerei kei na noda vuvale kei na Kalou me tawacava.
E rarawataka na yaloqu ni vuqa na tamata au lomana, qoroya, ka doka era cata na Nona veisureti. Era vakawalena na kerekere i Jisu Karisito ni kaci mai “Lako Mai, mo muri au.”5
Au kila na vuna e tagi kina na Kalou.6 Au tagicaki ira talega na itokani kei na wekaqu vakaoqo. Era sa tagane kei na yalewa totoka, era dinata nodra vuvale kei na ilesilesi raraba. Era solia vakailoloma na nodra gauna, igu, kei na ivurevure. Sa vinaka cake kina o vuravura mai nodra gugumatua. Ia era sa digitaka mera kakua ni caka veiyalayalati kei na Kalou. Era se bera ni ciqoma na cakacaka vakalotu mera bula vakacerecerei kei na nodra vuvale ka vauci ira vata me tawacava.7
Au diva meu sikovi ira ka sureti ira mera raica vakabibi na lawa veivakataukeni ni Turaga. Au vakasamataka kina na cava meu na kaya mera vakila kina na levu ni nona lomani ira na iVakabula, kei na noqu lomani ira vakalevu, ka mera kila na sala era ciqoma kina na yalewa kei na tagane veiyalayalati na “marau sa vuabale.”8
Sa gadrevi mera kila ni sa tiko e dua na nodra vanua ni oti eke—kei ira na tagane kei na yalewa totoka era a digitaka talega mera kakua ni caka veiyalayalati kei na Kalou—o ya e sega ni vanua era na laki duavata kina na vuvale ka soli kina na madigi mera bula ka torocake tawacava. O ya e sega ni matanitu mera sotava kina na marau sa vuabale—e tawacava kina na torocake kei na bula marau.9 Na veivakalougatataki cecere oqo ena yaco duadua ga ni bulataki na ituvaki silesitieli cecere kei na Kalou, na Tamada Tawamudu; na Luvena, o Jisu Karisito; kei ira noda lewe ni vuvale totoka, kilikili, ka vakadonui.
Au nanuma meu kaya vei ira noqu itokani vagagalu:
“Ena bula oqo, o se bera mada ni taura na ikarua ni ka vinaka ena dua na ka. Ia ni ko vorata mo ciqoma na kosipeli vakalesuimai i Jisu Karisito, o sa digitaka tiko mo taura na ikarua ni ka vinaka.
“E kaya na iVakabula, ‘Sa vuqa na tikina ena vale nei Tamaqu.’10 Ia, ni ko sa digitaka mo kakua ni caka veiyalayalati kei na Kalou, o sa taura tiko na ivakaruru caca wale ni ulumu ni veigauna tawamudu.”
Au na via kerei ira tale na noqu itokani vagagalu:
“Sovaraka na yalomu vua na Kalou. Tarogi Koya ke ra sa ka dina na ka oqo. Taura na gauna mo vulica Nona vosa. Vuli dina sara ga! Ke o lomana nomu vuvale ka gadreva mo bula vakacerecerei vata kei ira ena veigauna tawamudu, sauma oqo na kena isau—ena vuli gumatua kei na masu yalodina—mo kila na dina tawamudu oqo ka bulataka.
“Kevaka o sega ni vakadeitaka ni ko vakabauta na Kalou, tekivu eke. Mo kila tiko ni sega ni sotavi na Kalou, ena rawa vua e dua me vakatitiqataka ni tiko na Kalou. Mo sa qai biuti iko ena vanua mo na sotavi Koya kina. Mo yalomalua. Masu me dolavi na matamu mo raica na liga ni Kalou ki na nomu bula kei na vuravura e voliti iko tiko. Kerea Vua me tukuna vei iko ke tiko dina o Koya—ke kilai iko tiko. Tarogi Koya cava Nona nanuma baleti iko. Mo qai, vakarorogo.”
E dua noqu itokani lomani e sega soti ni dau sotava na Kalou. Ia a gadreva tu me na laki tiko vata kei watina sa mate. A kerei au meu vukei koya. Au a vakauqeti koya me sotavi rau na daukaulotu me kila kina na vunau i Karisito ka vulica na veiyalayalati, cakacaka vakalotu, kei na kalougata ni kosipeli.
A cakava o koya. Ia a raica o koya ni ituvatuva e rau vakasalataka ena gadrevi vua me veisautaka vakalevu na nona bula. A kaya, “Na ivakaro kei na veiyalayalati o ya sa rui dredre sara ga vei au. Vakakina, e dredre meu sauma na ikatini, ka sega noqu gauna meu veiqaravi ena Lotu.” A qai kerei au, “Niu sa mate, yalovinaka mocakava na neirau cakacaka ni valetabu na veiwatini me keirau na bula vata tale?”
Vinaka vakalevu, niu sega ni nona turaganilewa. Ia au taroga tiko na gagadre donu ni cakacaka veisosomitaki ni valetabu ni dua na tamata me na papitaiso ena bula oqo—me tabaki ki na matabete ka ciqoma na veivakalougatataki ni valetabu ena bula oqo—ia a qai lewa ga me besetaka na ituvatuva oqo.
Taciqu kei na ganequ lomani, sa sureti keda o Jisu Karisito meda taura na sala lesu ni veiyalayalati ki vale vei rau noda iTubutubu Vakalomalagi kei ira eda lomana. E sureti keda o Koya, “Lako mai, mo muri au.”
Ia niu sa mai Peresitedi ni Nona Lotu, au vakamasuti kemuni ko ni sa tiko vakayawa mai na Lotu kei kemuni o ni se bera ni vakasaqara vakaidina sara mo ni kila ni Lotu ni iVakabula sa vakalesuimai. Cakava na cakacaka vakayalo mo kila kina vakai iko, ia yalovinaka cakava sara ga oqo. Sa lekaleka tiko na gauna.
Au vakadinadinataka ni sa bula na Kalou! O Jisu na Karisito. Na Nona Lotu kei na taucoko ni Nona kosipeli sa vakalesuimai me kalougata na noda bula ena reki, eke kei na gauna mai muri. Au sa vakadinadinataka oqo ena yaca i Jisu Karisito, emeni.