Na Kosipeli Dina, Savasava, ka Rawarawa i Jisu Karisito
Na lomana na Kalou kei na lomani ira na wekada sa yavu vakaivunau ni veiqaravi; vuli ka iusutu mai vale, tokona na Lotu; sokalou vakayalo ena Siga ni Vakacecegu; kei na cakacaka ni veivakabulai.
Kemuni na taciqu kei na ganequ, e dredre meu vakabauta ni sa oti qo e 71 na yabaki, na noqu a kaulotu tu mai Igiladi ena 1948, ka sa oti e 44 na yabaki na neirau a kauta kei Barbara na neirau matavuvale ki Kenada niu peresitedi ni Tabana ni Kaulotu na Kenada Toronto. Niu veiqaravi tiko mai kea ena 1976, au a kacivi ki na iMatai ni Kuoramu ni Vitusagavulu, ka sega ni namaki noqu kacivi ki na Kuoramu ni iApositolo Le Tinikarua ena 1985. Sega ni tautauvata kei na veikacivi e liu kei na kena vagalalataki, na noqu na vagalalataki mai na veikacivi ena Tinikarua e sega soti ni digidigi taleitaki sara ena gauna oqo; ia, au masuta ni na qai yaco ga mai na siga oya niu sa vakaotia na veika kece a kacivi au kina na Turaga meu vakayacora.
Niu vakasamataka na 43 na yabaki sa oti ni noqu veiqaravi ena Vakaitutu Raraba kei na itavi dokai e noqu meu qaravi ira na luvena na Tamada Vakalomalagi, sa yaco meu kila kina vakavinaka sara ni vinakata o Koya me ra kune vakacegu, reki, kei na marau ena nodra bula o ira kece sara na Luvena.
E vakavuvulitaka na parofita o Liai, “Sa sucu na [tagane kei na yalewa], me rawata na marau.”1 E vuqa tu na vuna e dau drovaki keda kina na vakacegu, reki, kei na marau ena bula oqo, era okati kina na dravudravua, ivalu, leqaleqa, kei na veika sega ni namaki ena noda cakacaka, noda bula, kei na isema vakamatavuvale.
E dina ga ni da sega ni lewa e levu na ka mai taudaku e dau yaco ki na noda bula e vuravura, ni da segata me da tisaipeli yalodina ni Turaga o Jisu Karisito, eda na rawa ni kunea na vakacegu, na reki, kei na marau dina ga ni wavoliti keda tu na leqa eso vakavuravura.
A kaya ena dua na gauna e dua vei iratou na luvequ, “Ta, au vakataroga tiko se au na rawata beka.” Au mani qai kaya ga, “Na ka ga e kerea vei keda o Tamada Vakalomalagi me da solia noda vinaka duadua e veisiga.” Kemuni na taciqu kei na ganequ, cakava na kena vinaka duadua o rawata e veisiga, o na sega walega ni kila, ni o sa vakadinadinataka ni kilai iko na Tamada Vakalomalagi ka lomani iko. Ia ena gauna o sa kila kina oya—vakaidina sara—sa na vakainaki dina na nomu bula, ko na vakasinaiti ena reki kei na vakacegu.
Me vaka ni Rarama kei Vuravura, a kaya na iVakabula, “Me kakua ni tiko ena butobuto ko koya yadua sa vakabauti au.”2
“Sai Jisu Karisito duadua ga na yaca sa solia ko Tamada, ka ni sa sega sara tale e dua na yaca e soli me ra bula kina na tamata;
“Raica na tamata kece sa dodonu me ra taura na yaca sa solia ko Tamaqu.”3
E vakavulica vei keda na ivolanikalou ni gadreva o Setani me kauti ira na tamata ki na butobuto. Sa nona sasaga kece sara me vunia na rarama kei na dina i Jisu Karisito kei na Nona kosipeli. Me vaka e vakavulica o Liai, ni tevoro e “segata me ra rarawa sara na tamata kecega me vakataki koya.”4 Kevaka e nona “cakacaka kei na … lagilagi” na Tamada Vakalomalagi “me vakavuna na tawamate rawa kei na bula tawamudu ni [tagane kei na yalewa],”5 na nona “cakacaka o Lusefa” me vakavuna na nodra rarawa kei na yaluma tawamudu na luve ni Kalou. Na ivalavala ca kei na talaidredre e dau vakamalumalumutaka na Rarama i Karisito ena noda bula. Oqori na vuna eda vinakata kina me cilavi keda na Rarama i Karisito, ka na kauta mai na vakacegu, na reki, kei na marau.
Ena 18 na vula sa sivi, sa vakauqeta tiko kina na Turaga na Nona parofita kei ira na iApositolo me ra vakayacora e vica na veisau vakasakiti. Ia, au leqataka de na yali na inaki vakayalo ni veisau eso oqo ena kena marautaki me vakayacori na veisau.
A kaya o Joseph F. Smith ena vuqa na yabaki sa oti: “Sa vakalesui mai na kosipeli dina, savasava, rawarawa i Jisu Karisito. Sa noda itavi na kena maroroi tu e vuravura.”6 E vakuria ni kosipeli dina, savasava, ka rawarawa sai koya na “ivunau ni veivakabulai i Karisito.”7
E na Yavu ni Vakabauta na Parofita o Josefa Simici ni “na vakabulai na tamata kecega ena Veisorovaki nei Karisito, kevaka eda sa talairawarawa ki na lawa kei na cakacaka vakalotu ni Kosipeli.”8
Na imatai ni vakavuvuli ni Kosipeli sai koya na vakabauta na Turaga ko Jisu Karisito, veivutuni, papitaiso, solisoli ni Yalo Tabu, ka vosota me yacova na ivakataotioti. E vakavulica vakavica vata vei tacina o Hyrum Smith: “Vunautak tiko[ga] o na raica ena veisiga e tarava ena vakatakilai mai vei iko na veivakasama vou kei na ikuri ni rarama baleti ira. Sa rawa mo vakalevutaka vei ira … mo na kilai ira vakamatata. Sa na qai rawa mo cakava me ra kila vakamatata o ira o vakavulica.”9
Na sala vinaka duadua me da raica kina na inaki vakayalo ni Lotu sai koya me da bulataka na ivakavuvuli dina, savasava, ka rawarawa i Karisito ka vakayagataka na nona ivakaro cecere e rua na iVakabula: “Mo lomana na Turaga na nomu Kalou ena yalomu taucoko. … Mo lomana na kai nomu me vaka ko sa lomani iko.”10
Na talairawarawa ki na ivunau cecere e rua oqo ena vakarautaka na sala me sotavi kina na vakacegu kei na reki vakalevu cake. Ni da lomana ka qarava na Turaga ka lomani ira ka qaravi ira na wekada, eda na vakila ni yaco mai vei keda na marau levu ka na yaco mai vei keda ena sala e vinaka cake.
Na lomana na Kalou ka lomana na wekada na yavu vakaivunau ni veiqaravi; na vuli me iusutu mai vale, tokona na Lotu; sokalou vakayalo ena Siga ni Vakacecegu; kei na cakacaka ni veivakabulai ena yasa ruarua ni ilati ka tokoni mai na iSoqosoqo ni Veivukei kei na kuoramu ni italatala qase Na veika kece oqo e vakayavutaki ena ivunau vakalou me da lomana na Kalou ka lomana na wekada. E dua beka na ka e rawarawa cake, bibi cake, ka rawarawa cake mai na kena oya?
Ni bulataki na ituvatuva dina, savasava, ka rawarawa ni kosipeli ena solia vei keda e levu na gauna me da sikovi ira na yada, dawai, o ira e sega nodra itubutubu, galili, tauvimate kei na dravudravua. Eda na kunea na vakacegu, reki, kei na marau ena bula ni da qarava na Turaga kei ira na wekada.
Na veisau ena Siga ni Vakacecegu ka vakabibitaki kina na vulici ni kosipeli yavutaki ena matavuvale, ka tokona na Lotu e dua na madigi me vakavoui kina na yaloda kei na noda yalodina vua na Kalou ena loma ni veilalaga ni noda vale. Na cava tale beka e rawarawa, taumada, ka bibi cake? Kemuni na taciqu kei na ganequ, e rawa beka ni o raica ni sa dua na sala bibi me da kunea kina na reki kei na marau ena noda bula na vulici kei na vakavulici ni kosipeli ena noda matavuvale?
Ni vosa tiko me baleta na Siga ni Vakacecegu, a kaya na iVakabula, “Ni sai koya dina oqo na siga sa lesi vei iko mo vakacegu kina mai na nomu cakacaka, io mo qaravi koya ga sa Cecere Sara ena gumatua.”11 E vakuria o Koya, “Me vuabale kina na nomu marau [mai na] yalomarau kei na masumasu ni dou sa kitaka na veika kece oqo ena vakavinavinaka ena yaloreki kei na mata mamarau [kei] na yaloreki ga kei na mata mamarau.”12
Raica eso na vosa bibi ena ivakatakila oqo: reki, yalomarau, vakavinavinaka, yalo mamarau, marau yalo, kei na mata mamarau. E vaka vei au na rokovi ni Siga ni Vakacecegu e dodonu me kauta mai na matadredredre vei keda.
Ni da veiqaravi ena ivakarau cecere ka savasava cake, yalovinaka vakasamataka na kena yaga bibi me da kidavaki ira kecega era lako mai ki na noda Lotu, vakabibi o ira na lewenilotu vou kei ira na vulagi. E dodonu me da taleitaka kece na lagasere ka vakarorogo matua ki na veimalanivosa ni masu ni sakaramede ena yalo kei na vakasama galala.
Na ivakadinadina ni vakabauta ena noda soqoni ni lolo kei na soli ivakadinadina ena tekivuna e dua na lewe ni matabisopi, me wasea e dua na ivakadinadina lekaleka ka vakanamata ena ituvatuva ni marau kei na kosipeli dina, savasava, ka rawarawa i Karisito. Na tamata kecega me ra muria na ivakaraitaki oya. E dodonu me da nanuma tiko ni tu tale eso na vanua veiganiti me da talanoa se wasea kina na veika ni noda veilakoyaki. Ena noda maroroya na noda ivakadinadina me rawarawa ka vakanamata ki na kosipeli i Karisito, e na vakarautaka o Koya na vakavoui vakayalo ena wasei ni noda ivakadinadina vei keda yadudua.
Na veiqaravi mana ena laurai vakavinaka duadua ena mata e vakanamata ena lomana na Kalou ka lomana na wekada. Kena rawarawa ga, eda veiqaravi ni da lomana na Tamada Vakalomalagi kei ira na Luvena. Ena qaqa vakalevu cake noda igu ni veiqaravi kevaka e rawarawa toka ga na noda veiqaravi. Na reki levu duadua e yaco mai na veika rawarawa ni bula, sa gadrevi kina me da qaqarauni me da kakua ni nanuma me so tale na ikuri ni veisau eda sa ciqoma me tara cake na vakabauta kei na ivakadinadina kaukauwa e yalodra na luve ni Kalou.
Me kakua ni vakadredretaki ena so tale na soqoni, veika namaki, se gadrevi. Me rawarawa Toka Ga Ena rawarawa oqori o na kunea kina na vakacegu, reki, kei na marau au tukuna tiko.
Ena veiyabaki na inaki ni veiliutaki ena Lotu, me vaka e tukuni ena iVoladusidusi 2, na veika gadrevi era matata ka rawarawa, kau na vakacacavu mai kina:
“Era na veivakayaloqaqataki na iliuliu vei ira na lewenilotu yadudua mera ciqoma taucoko na cakacaka vakalotu bibi ni matabete, maroroya na kena veiyalayalati, ka kilikili mera bula vakacerecerei ka bula tawamudu.
“Qase: Vakayaloqaqataki ira yadua na qase mera kilikili ki na nodra ciqoma na nodra cakacaka vakalotu ni valetabu. Vakavulici ira na qase mera kunei ira mai na nodra qase e liu ka vakayacora na nodra cakacaka vakalotu vakaveisosomitaki ni valetabu.
“iTabagone: Vukei ira yadua na cauravou mera ciqoma na Matabete i Melikiseteki, mera ciqoma na cakacaka vakalotu ni valetabu, ka kilikili mera laki kaulotu tudei. Vukei ira na goneyalewa yadua mera bula kilikili ka vakayacora ka maroroya na veiyalayalati tabu ka ciqoma na cakacaka vakalotu ni valetabu. Vaqaqacotaki ira na itabagone ena nodra vakaitavi ena itaviqaravi vakaibalebale cake vakalevu.
“Lewenilotu Taucoko: Vukei ira na iliuliu ni matabete kei na mataisoqosoqo, matabose ni tabanalevu, daukaulotu ena tabanalevu kei na daukaulotu tudei, kei ira na lewenilotu mera cakacaka vakatautau vata ena duavata mera vakabula na tamata yadua, vaqaqacotaki ni matavuvale kei na veitabana ni Lotu, vakalevutaki ni itaviqaravi ni matabete, ka vakasokomuni mai o Isireli ena saumaki mai, veimaroroi, kei na veivakabulabulataki. Vakavulici ira na lewenilotu mera bula rawati ira kei na nodra matavuvale ka vukei ira na dravudravua kei ira era vakaleqai tu ena sala ni Turaga.”13
Na noqu veiqaravi ena Lotu sa vakalougatataki au ena vuqa na gauna vakayalo vakasakiti ka taleitaki. Au dua na ivakadinadina bula ni Turaga e liutaka tiko na Nona Lotu me rawati kina Nona inaki. Au sa ciqoma oti na veituberi vakayalo ka sivia sara vakalevu na veika au rawa ni rawata vakataki au. Na reki ni bulataki ni kosipeli vei au e vakayavutaki ena kosipeli kei na ivunau dina, savasava, ka rawarawa i Jisu Karisito.
Au sa veiqaravi oti ena ruku ni idola kei na nodra veidusimaki e ono na parofita ka ra Peresitedi ni Lotu me tekivu mai vei Spencer W. Kimball ki vei Russell M. Nelson. Au vakadinadinataka ni o ira yadua era parofita digitaki ni Kalou. Era sa vakavulica vei keda na ivakavuvuli gadrevi baleta na Lotu kei na kosipeli kei na ivunau i Karisito. Sa tosoya tiko i liu o Peresitedi Nelson na cakacaka ni Turaga ena totolo veivakurabuitaki. Au kaya ni “veivakurabuitaki” baleta ni o koya duadua ga na iApositolo e qase cake vei au, kau sa saga dredre tiko meu toso vata kei koya! Au dua na ivakadinadina bula ni sa toka vua na idola vakamatabete kei na tutuvi vakaparofita ni Kalou. E dau vakavulica o Peresitedi Nelson na kosipeli dina, savasava, ka rawarawa i Jisu Karisito. Au wasea na ivakadinadina ni sai Jisu na Karisito, ka sai koya oqo na Nona Lotu—au vakadinadinataka ena yaca i Jisu Karisito, emeni.