Rogoci na Domona
Ena vuravura sa vakasinaiti tu ena vuqa na domo e veisisivi, sa vakayacora na Tamada Vakalomalagi meda rogoca ka muria na Domona.
Ena mataka caca nikua, e ciqoma na watiqu e dua na ivola e vola vei tinana ena vica vata na yabaki sa oti mai veiganena. Ena gauna oya, se goneyalewa lailai o Sister Homer. Na vakatoka oqo e dua na tiki ni nona ivola, “Kivei Tinaqu, vosoti au sara niu sega ni wasea nikua na noqu ivakadinadina—ia, au lomani iko.” Ni keirau vakasigalevu tiko, au nanuma ni sa dua dina na ka vakavure vakasama o ya. Au sa dabe sara, kau vola e dua na ivola ka vakatoka oqo, “Kivei Peresitedi Nelson, vosoti au sara niu sega ni rawa ni vosa nikua—ia au lomani iko.” Au vakila ni sega ni dodonu na veika oqori. Au sa mai tiko kina oqo, kau sa marautaka dina ni rawa niu mai tomana na noqu vosa ki na nodra era sa vosa oti ena soqoni nikua.
Ena vuqa na yabaki sa oti, au a vuka tiko ena dua na waqavuka lailai ka pailatetaka tiko e dua na pailate vou. Ni sa cava na neitou vuka, sa soli mai na galala me keitou sa ro. Ia ni keitou sa vakarau tara na qele, au a rogoca na alamu e vakaroti pailate me “dre cake.” A rai yani o pailate vua nona itokani pailate makawa, ni sa dusi sobu tiko, vaka ki na yasa e tuba ni gaunisala, ka kaya mai, “Cakava!”
E totolo sara na gole ni neitou waqavuka ena imawi ka lutu sobu, ka qai tubu cake tale vakavinaka, ka vukaca tale yani na vanua donu me ro kina, ka keitou yaco bula yani. Keitou a qai kila e muri ni dua tale na waqavuka sa vakadonui oti tu me vuka. Ia ke keitou a muria ga na ivakasala ni alamu, ke keitou a coqa yani na waqavuka koya, ka sega ni rawa tale ni gole tani mai. Na veika au sotava oqo e vakavulica vei au e rua na lesoni bibi: iMatai, ena gauna dredre ni noda bula, eda na rogoca kina na veimataqali domo era gadreva meda muria. Na kena ikarua, e rui bibi sara meda rogoca ga na kena e donu.
Veisisivi Domo
Eda sa bula tiko ena dua na vuravura e tu kina e vuqa sara na domo era gadreva meda muria. Mai na vei itukutuku buta katakata, tweet, blog, podcast, kei na ivakasala douvaki mai vei Alexa, Siri, kei na so tale, eda na raica ni rui dredre toka meda kila na domo cava meda vakabauta. Eso na gauna eda vakumuna na veidusimaki ki na noda bula, ni da nanuma ni kena levu ga sa ivurevure vinaka duadua ni ka dina. Eso tale na gauna eda “lomalomarua … tiko kina,”1 ka digitaka meda “sa sega ni batabata se katakata.”2 E so tale na gauna eda sa muria tikoga na veika e veiganiti, vakatabakidua ga ki na dua na domo se ituvatuva me dusimaki keda, se vakararavi vakatabakidua ena noda igu meda vakayagataka noda vakasama.
E dina ni rawa ni ra veivuke na ituvatuva yadua oqo, ia eda vulica mai na veika sa sotavi oti, ni ra sega ni dau nuitaki sara. Na veika e kilai levu e sega ni na vinaka duadua tikoga e veigauna. Na lomalomarua ni vakasama e sega ni na yaco ki na dua na vanua. Na ka e veiganiti e dau sega sara ni mua ki na veika e bibi. Ni da rogoca tikoga e dua na domo se ituvatuva e rawa ni buwawa kina noda rai. Kei na noda vakararavi vakatabakidua ki na noda vakasama ena rawa ni muataki keda ki na vakasama veivakasewasewani. Keda sega ni qaqarauni, ena rawa ni kauti keda tani na domo cala mai na uto ni kosipeli ki na veivanua ena dredre me tokoni kina na vakabauta, ka da kunea vakalailai cake tale mai na galili, rarawa, kei na yalodruka.
Vakarorogo ki na Domo Cala
Meu vakamacalataka mada na ibalebale ni noqu taurivaka na vakatautauvata kei na ivakaraitaki vakaivolanikalou. Era dau okata na daukaba ulunivanua ni veivanua e cecere mai na 8,000 na mita era sa “vanua ni mate” baleta ni vanua cere oqori, e lailai kina na cagibula me tokona na bula. E tiko na ivakatauvata vakayalo ni vanua ni mate. Kevaka eda vakayagataki gauna vakalevu ena veivanua ni tawavakabauta, era na tagutuva mai vei keda na domo wereubiubi, na cagibula vakayalo eda gadreva.
Eda wilika ena iVola i Momani, me baleti Korio, ni a sotava na ka vata vakaoqo. A marautaka o koya ni mai tamata rogo baleta na nona veivakavulici e “vinaka [ki] na vakasama vakatamata.”3 E tukuna o koya me baleta na nodra ivakavuvuli lialia na itubutubu kei ira na parofita me yalana nodra galala ka bucina na lecaika.4 E veiletitaka ni dodonu mera galala na tamata ka lewa ga na ka mera cakava baleta ni mai yalani ira na ivunau.5 Ki vua, na vakabauti ni Veisorovaki i Jisu Karisito e “vakasama sesewa wale ga,” ka yavutaki ena kena vakabauti e dua na tamata e sega ni bula tiko baleta ni sega ni laurai rawa o Koya.6
A vakavuna o Korio me levu sara na tiko yavavala ka mani kau yani kina vua na turaganilewa levu kei koya na bete levu. E kea, a tucake kina ka “vosa vakaviavialevu sara,” ka vosa vakacacataki ira na iliuliu ka vinakata e dua na ivakatakilakila. A soli mai e dua na ivakatakilakila. A yaco me galu ka sega ni vosa rawa. Sa qai kila kina o Korio ni a lawakitaki, ka vakananuma rawa na dina talei a biuta laivi, ka lelevaka kina, “Au dau kila tikoga.”7
A qai kere kakana voli ko Korio me yacova ni ra buturaki koya e dua na ilawalawa Soromaiti ka mate kina.8 Ena iotioti ni tikina ena kena italanoa e koto kina na iyaloyalo vakaciriloloma oqo: “Ka eda sa raica ni na sega ni tokoni ira na luvena na tevoro ena siga mai muri, ia ena dretaki ira sobu ga yani ki eli.”9
Na Domo Donu
Baleta ni vinakata na Tamada Vakalomalagi meda vinaka cake, e vakayacora kina o Koya meda rogoca rawa na Domona. E vuqa na gauna, eda rogoci Koya ena veika eda vakila e vakavurea mai na Yalo Tabu. Na Yalo Tabu e ikatolu ni Lewetolu Vakalou. E vakadinadinataka na Tamana kei na Luvena,10 ka talai mai me “vakavulici [keda] ena ka kecega,”11 ka na “vakaraitaka vei [keda] na veika kece [meda] kitaka.”12
E duidui na sala kei na tamata e vosa kina na Yalo, ka rawa talega ni vosa kivua e dua na tamata ena sala duidui eso ena veigauna duidui talega. Ka kena ivatuka, ena taura kina noda bula taucoko meda vulica na vei sala kece e vosa mai kina vei keda o Koya. Eso na gauna, e vosa o Koya ki na noda “vakasama kei na vu ni [yaloda]”13 ena domo rogo lailai ia sa kaukauwa sara, sa laubasikati “ira sara … na lomadra era sa rogoca.”14 Eso tale na gauna, sa dau “vakaosoosotaka tiko na [noda] vakasama” o Koya se “tara tiko vakaukauwa … na [lomada].”15 Eso tale na gauna, ena “katakata mai na [lomada].”16 Ia ena so tale na gauna, ena vakasinaita o Koya na lomada ena reki, ka vakararamataka noda vakasama,17 se tukuna yani na vosa ni vakacegu ki na leqa e tu e lomada.18
Kunei ni Domona
Eda na kunea na domo ni Tamada ena vuqa na vanua. Eda na kunea ni da masu, ni da vulica na ivolanikalou, ka gole ki na soqoni ni lotu, vakaitavi ena veivosaki vinaka, se ni da gole ki valetabu. E dina sara, eda na kunea ena koniferedi ena mua ni macawa oqo.
Nikua eda sa tokona kina e 15 na turaga mera parofita, daurairai, ka dauvakatakila. Na nodra bula vakayalo kei na kila sa solia vei ira na rai cecere eda sa gadreva sara vakalevu. E rawarawa sara me kilai na nodra itukutuku ni sa cauraki ena savasava dina. Era sa tukuna vei keda na ka e gadreva na Kalou meda kila, na ka e kilai levu se sega.19
Ena vinaka ni vakasaqarai na Domona ena dua vei ira na vanua oqo, ia ena vinaka cake sara ni vakasaqarai ena veivanua kece oqori. Ia ni da sa rogoca rawa, ena gadrevi meda muria na veidusimaki e soli mai kina. E kaya na iApositolo o Jemesa, “Ia dou muria na vosa ka kakua ni rogoca walega.”20 E vakavulica o Peresitedi Thomas S. Monson: “Meda vakatawa. Meda wawa. Meda rogoca na domo lailai o ya. Ni sa vosa mai, mo ni vakarorogo na tagane kei na yalewa vuku.”21
Ni Dau Yaco Bera Mai na Veidusimaki
Niu se qai tekivu cakacaka, keirau a kerei kei Sister Homer me keirau ciqoma e dua na veisau ni ilesilesi ni cakacaka. Ena gauna o ya, sa vaka me dua na vakatulewa levu sara kivei keirau. Keirau vuli, keirau lolo, ka keirau masu, ia na kena isau a berabera sara ni yaco mai. Sa mani yaco, me keirau sa vakatulewa kina ka toso ki liu. Ni keirau cakava oqo, keirau a kune vakacegu ka kila sara ni sa vakatulewa vinaka duadua keirau se bau cakava.
Sa mani yaco, me keirau vulica mai kina ni isau ni masu ena dau berabera ena so na gauna. E rawa oqo baleta e sega ni gauna donu, baleta e sega ni gadrevi me saumi mai, se baleta sa nuitaki keda na Kalou meda vakatulewa ga vakai keda. A vakavulica taumada ko Elder Richard G. Scott ni dodonu meda vakavinavinakataka na veigauna vakaoqori ka yalataka o koya: “Ni ko sa bula kilikili tiko ka tudei tikoga na nomu digitaka tiko na ivakavuvuli ni iVakabula ka gadrevi mo cakava, ka vakayacora ena veivakabauti. … Ena sega ni vakalaivi iko na Kalou mo toso sara vakayawa ka sega mada ni ko vakaroti mo vakila ke o sa vakayacora na vakatulewa cala.”22
E Dodonu Meda Digia
Sa vakakina, ni sa gadrevi meda digitaka mai na veidomo duidui kece o cei meda muria. Eda na muria beka na domo tawayaga e tutaka mai ko vuravura, se eda na cakava na ka e gadrevi me rawa ki na domo i Tamada me dusimaki keda ena noda vakatulewa ka taqomaki keda mai na veika rerevaki? Na levu ga ni noda gumatua meda vakasaqara na Domona, na rawarawa cake ni noda vakarorogo. E sega ni baleta ni sa voqa levu cake mai na Domona ia sa toso cake ga na noda rawa ni rogoca. Sa yalataka tu na iVakabula ni kevaka meda “vakarorogo ki na [Nona] ivunau, ka vakatudaliga ki na [Nona] ivakasala,” ena “solia vakalevu cake [vei keda].”23 Au vakadinadinataka ni dina na yalayala oqo—kivei keda yadua.
Voleka ni dua na yabaki sa oti, a mate na tuakaqu ena dua na vakacalaka ena motoka. E vakasinaiti tu na veiyabaki ni bula nei John ni se gone ena yalayala kei na rawa ka. Ia ni sa qase tiko mai, sa ramusu na yago ka veilecayaki na vakasama ka sa dredre sara vua na bula. E dina ni sega ni yaco ena nona bula oqo na veivakabulai a vakanuinui tiko kina o koya, e dei toka ga o John ena nona vakabauta, ka dei e lomana me vosota vakagumatua, me yacova na ivakataotioti.
Au kila ni sega ni taucoko sara nona bula o John, ia au dau vakataroga voli a rawata vakacava me vosota vaka o ya. A vuqa na domo a sureti koya ki na veivakasama tawadodonu, ia a sega ni vinakata. Ia, a cakava na nona vinaka taucoko me itakele ni nona bula na yavu ni kosipeli. A bula voli e kea baleta ni kila ni na kunea na domo ni nona iVakavuvuli; a bula voli e kea, baleta ni kila e kea ga ena vakavulici kina.
iTinitini
Kemuni na taciqu kei na ganequ, ena vuravura sa vakasinaiti tu ena vuqa na domo e veisisivi, sa vakayacora na Tamada Vakalomalagi meda rogoca ka muria na Domona. Kevaka eda gugumatua, ena solia mai o Koya kei na Luvena na veidusimaki eda vakasaqara tiko, na kaukauwa eda gadreva, kei na marau eda gadreva kece. Ena yacai Jisu Karisito, emeni.