Fakaʻilekitulōnika Pē: Ngāue Fakafaifekau Tokoní
ʻOku ʻi ai Maʻu Pē ha Founga ke Tokoni
Kuo ui kitautolu ʻe he ʻEikí ke tau ngāue. ʻOkú Ne ʻafioʻi kitautolu mo e ngaahi meʻa ʻoku tau malava ʻo fakahokó.
Naʻe uiuiʻi au ke u hoko ko ha faifekau pea vahe au ki he Misiona Brazil Florianópolis. Naʻá ku ngāue ai ʻi ha māhina ʻe fitu peá u foki ki ʻapi ʻoku teʻeki ʻosi hoku taimí. ʻI heʻeku foki ki ʻapí, naʻá ku lotu ʻo kole ki he Tamai Hēvaní ke ʻoua naʻa tukuange au mei heʻeku hoko ko ha faifekaú. Hili ʻeku lotú, naʻá ku ongoʻi hono talamai ʻe he Laumālié ʻe lelei ʻa e meʻa kotoa pē.
Falala ki Heʻeku Lotú
Lolotonga hoku ʻuluaki uike ʻi ʻapí, naʻá ku falala ki he ongo naʻá ku maʻu hili ʻeku lotu ʻi he malaʻe vakapuná. Naʻe kamata ke u tokoni ʻi he falekoloa ʻo e temipalé. ʻI heʻeku maʻu ʻa e faingamālie ke feʻiloaki mo ʻeku palesiteni fakasiteikí, naʻá ne fiefia ʻaupito ke fanongo ki heʻeku ngāue tokoní peá ne talamai he ʻikai ke ne tukuange au. Naʻe vahe leva au ke u hoko ko ha faifekau tokoni ʻi homau misioná, ko e Misiona Recife Northeast.
Ko e Founga ʻo ʻEku Ngāué
ʻOku kau ʻi heʻeku ngāue fakafaifekau tokoní ha ngaahi ngāue kehekehe. ʻI he lolotonga ʻo e uiké ʻoku ou tokoni ai ʻi he falekoloa ʻo e temipalé, ʻōfisi ʻo e temipalé, pea mo e loki foó. ʻOku ʻi ai maʻu pē ha meʻa ke fai ʻi he temipalé—ʻoku ʻikai teitei tangutu maʻu ʻa e kau faifekaú ʻi ai.
ʻOku ou tokoni ʻi he ngaahi ʻaho Tokonakí ʻi he ʻinisititiutí. Naʻá ku kau ʻi he kalasi teuteu ngāue fakafaifekau ʻa e ʻinisititiutí ke vahevahe ʻa e meʻa naʻá ku ako ʻi he ngāue fakafaifekaú—naʻe ongo fakafiefia moʻoni ke vahevahe. ʻOku ou tokoni foki ke tufa ʻa e meʻakaí ki he kau akó ʻi he ʻosi ʻa e kalasí.
Makehe mei heʻeku ngaahi ngāue paú, ʻoku ou fakaʻaongaʻi ʻeku ngaahi peesi fakasōsialé ke vahevahe ʻa e ongoongoleleí. ʻOku ʻi ai haʻaku peesi naʻá ku faʻu ʻi hoku taʻu 17 ʻoku talanoa fekauʻaki mo e polokalama ʻa e toʻu tupú.
Ko Hono Langa Hake Hono Puleʻangá
Kuo ui kitautolu ʻe he ʻEikí ke tau ngāue. ʻOkú Ne ʻafioʻi kitautolu mo e ngaahi meʻa ʻoku tau malava ʻo fakahokó. ʻOku ueʻi fakalaumālie ʻe he ʻEikí ʻa e ngāue fakafaifekau tokoní, pea kapau naʻe vahe koe ke ke ngāue pehē, ʻoku ʻuhinga ia ʻoku fiemaʻu ʻe he ʻEikí hoʻo tokoní ʻi hono langa hake Hono puleʻangá.
Neongo kapau ʻoku ou loto mamahi pe fehangahangai mo ha ngaahi faingataʻa, ka ʻoku ou saiʻia ʻaupito ʻi he taimi ʻoku ou fakakakato ai ʻa e māhina takitaha ʻo ʻeku ngāue fakafaifekaú pea lava ke u fakalaulauloto ki he founga kuó u tupulaki mo fakamālohia ai au lolotonga ʻa e taimi ko iá. ʻOku ou saiʻia ʻi heʻeku ngāue fakafaifekaú. ʻOku tākiekina moʻoni ia ʻe he ʻEikí.