Ngaahi Fehuʻí mo e Talí
“ʻE anga fēfē haʻaku tuku ha taimi ki he ngaahi meʻa fakalaumālié ʻi he taimi ʻoku lahi ai mo ha ngaahi fiemaʻu kehe ke u tokanga ki aí?”
“ʻOku ou feinga ke fokotuʻutuʻu e ngaahi meʻa ʻoku fiemaʻu ke u faí ʻi he nouti ʻi heʻeku telefoni toʻotoʻó. ʻOku ou fakamuʻomuʻa maʻu pē hono ako ʻeku folofolá, pea toki fai leva ʻeku ngāue fakaako mei ʻapí. ʻI heʻeku ʻuluaki ako ʻa e folofolá, ʻoku mahino lelei ange kiate au ʻeku ngāue fakaako mei ʻapí peá u maʻu ha nonga ʻi hoku ʻahó.”
Adara L., 15, Mlita, Mekisikou
“Ko ʻeku ʻā hake pē he pongipongí, ʻo lau ʻeku folofolá mo fai ʻeku lotú. ʻOku ou fakatokangaʻi ʻoku faingofua ange maʻu pē ke lau mo lotu ʻi he pongipongí, ʻo ʻikai ko hano feinga ke toki kumi ha taimi ʻatā ʻi heʻeku taimi tēpile femoʻuekiná. Naʻá ku fakatokangaʻi ʻi heʻeku fai iá, ʻoku ou maʻu ha mālohi lahi ange ke matuʻuaki ʻa e ʻahiʻahí pea maʻu ha ʻulungaanga ʻoku leleí.”
Catelyn E., 17, Kalefōnia, USA
“ʻOku ou fefaʻuhi fakataautaha mo e meʻá ni, ko ia ʻoku ou tui kuo pau ke te fakakaukauʻi moʻoni ʻa e meʻa kuo fai ʻe Sīsū maʻa kitá pea fakamuʻomuʻa leva ia ke fakatapui ha konga ʻo hoto ʻahó Maʻana. ʻI heʻete fakakaukau ki he meʻa kuó Ne fai maʻa kitá, ʻe faingofua ke tuku ha taimi ki he lotú mo e ako folofolá!”
Averi J., 14, ʻAlesona, USA
“Te u lava ʻo tuku ha taimi ki he ngaahi meʻa fakalaumālié ʻaki haʻaku holoki hono fakaʻaongaʻi ʻo e ʻū naunau fakaʻilekitulōniká. ʻI hono holoki ʻeku ngāue ʻaki e ʻū naunau fakaʻilekitulōniká, te u fakaʻaongaʻi leva e taimi naʻá ku maumauʻí ki hano fai ha ngaahi meʻa ʻaonga lahi ange maʻá e ʻEikí. ʻE lava ke taʻofi maʻu pē hono fakaʻaongaʻi ʻo e ngaahi meʻa fakaʻilekitulōniká, ka he ʻikai ke fai ha meʻa pehē ki heʻetau ngaahi folofolá.”
Juliette J., 14, Tekisisi, USA
“Ko e meʻa mahuʻinga kiate aú ko hono tomuʻa fai ʻo e ngaahi meʻa fakalaumālié kimuʻa peá u toki fai e ngaahi meʻa kehé. ʻOku ʻikai ke faingofua maʻu pē, koeʻuhí he ʻoku ʻikai ha ʻaho ke ʻosi ki ai ʻa e ako folofolá ʻo hangē ko e ngāue fakaako mei ʻapí. Kae hangē pē ko e vahehongofulú, kuó u ʻiloʻi kapau te u fuofua foaki hoku taimí ki he ʻEikí, ʻe toe leva haku taimi feʻunga ki ha toe faʻahinga meʻa pē.”
Jacob N., 19, ʻAiouā, USA
Meʻa Lahi Ange ʻi he Fakakomipiutá:
“Kuo tokoniʻi au ʻi heʻeku tokanga taha ki he ngaahi meʻa ʻoku ou fakamuʻomuʻá. ʻOku ʻi ai maʻu pē ha ngaahi meʻa mahuʻinga ke fai, ka ʻoku fuʻu mahuʻinga hanau niʻihi pea he ʻikai lava ʻe he ngaahi ʻekitivitī fakalaumālié ʻo fakatoloi kinautolu. ʻI heʻeku fakamuʻomuʻa ʻa e ngaahi meʻa fakalaumālié, ʻoku ou fakatokangaʻi ʻoku ʻi ai maʻu pē ha taimi feʻunga ki he toengá.”
Emmett C., 17, ʻIutā, USA
“Kapau ʻokú te fefaʻuhi moʻoni mo hono maʻu ha taimi maʻá e ʻEikí, mahalo te te fakakaukau ke toʻo ha meʻa mei heʻete moʻuí ʻokú ne taʻofi kita mei hono ongoʻi e laumālié mo e tokanga taha ki he ʻOtuá. Ko ha sīpinga ʻo e meʻá ni ko e mītia fakasōsialé. Ko e hā e lahi ʻo e taimi ʻokú te fakamoleki ke sio ʻi he mītia fakasōsialé? Kapau te te toʻo e taimi ʻokú te fakamoleki ʻi he mītia fakasōsialé, mahalo te te ʻohovale ʻi he lahi ʻo e taimi te te lava ʻo tokanga taha ai ki he ʻEikí lolotonga hoto ʻahó.”
Kimber Leigh D., 17, Tenesī, USA
“ʻOku ou lau folofola ʻi he pasí ʻi he maʻu haku taimí. Lolotonga ʻeku teuteu ki he akó, ʻoku ou fanongo foki ki he ngaahi himi ʻa e Siasí mo e ngaahi lea ʻo e konifelenisí.”
Emma S., 13, ʻIutā, USA
“Ko e meʻa ʻe taha ʻoku totonu ke ke faí ko e ʻai ke hoko ʻa e ako folofolá ko ha konga hoʻo taimi-tēpile fakaʻahó. Te te lava ʻo fai ʻeni kimuʻa peá te toki mohé! Te te lava ʻo ʻā pongipongia ke te lava ʻo ako e folofolá kimuʻa peá te ʻalu ki he akó pe seminelí. Te te lava ʻo fanongo ki he mūsika ʻa e Siasí lolotonga ʻete fai e ngāue fakaako mei ʻapí pe ngaahi meʻa kehe fakaʻahó. ʻOku tokoni ʻeni ke te ongoʻi e mālohi ʻo e ʻOtuá lolotonga ʻete fai e ngaahi meʻa kehé. ʻIkai ngata aí, ʻoku totonu ke te kole tokoni ki heʻete mātuʻá pe pīsopé. Manatuʻi, ʻe tokoniʻi maʻu pē koe ʻe he ʻOtuá ke fokotuʻu Ia ko ha konga hoʻo moʻuí kapau te te lotu kiate Ia ke maʻu ha tokoni mo ha fakahinohino.”
Kolotoni N., 13, ʻIutā, USA