Ngaahi Leʻo ʻo e Toʻu Tupú
Mole ha Ngaahi Meʻa, ʻIloʻi ʻo e Fakamoʻuí
Gi Hyun M., taʻu 16, Lakuna, ʻOtu Filipainí
Saiʻia ʻi hono hivaʻi ʻo e ngaahi himí, fanongo hivá, mo e ngāue fakaetauhi ki he toʻu tupú.
Tā Fakatātā ʻa Adam Howling
Naʻe ʻikai ke u faʻa saiʻia he ʻalu ki he lotú he naʻá ku ongoʻi ʻoku ʻikai ke ʻi ai haku ngaahi kaungāmeʻa ʻi ai. Naʻe ʻi ai haku ngaahi kaungāmeʻa ʻi he akó ʻoku mau kakata fakataha. Ka naʻá ku ongoʻi ʻoku kehe ʻa e kau finemui ʻi he lotú meiate au pe ʻikai te nau saiʻia ʻi hoku ʻulungāngá. Naʻe kamata ke u fakangalingali pē ʻoku ou mohe koeʻuhí ke ʻoua naʻá ku ʻalu ki he lotú.
Ka ʻi he tō mai ʻa e mahaki fakaʻauha COVID-19, naʻe mole ha ngaahi meʻa lahi meiate kimautolu. ʻOku ou nofo mo ʻeku faʻeé mo ʻeku kui fefiné. Naʻe mole e ngāue ʻa ʻeku faʻeé, pea naʻa mau ʻiloʻi kuo pau ke mole homau ʻapí. Naʻe kamata ke u kumi ha feituʻu maʻamaʻa ange ke mau nofo ai, ka naʻe ʻikai ke u maʻu ha feituʻu. Ka naʻá ku ʻiloʻi ʻa e Fakamoʻuí.
Naʻe kamata fakamafola ʻe he Siasí ʻa e ngaahi houalotu ʻa e Siasí ʻi he ʻinitanetí, pea naʻe faʻa fafangu au ʻe heʻeku faʻeé ke u ʻā ʻo sio ai, ʻa ia ne tokoniʻi ai au ke u “fai ia neongo ʻeku taʻeloto ki aí kae ʻoua kuó u saiʻia ai.” Naʻá ku ongoʻi ʻo hangē ʻoku alanima mai ʻa e Fakamoʻuí, neongo kapau naʻe ʻikai ke u fie kole tokoni kiate Ia. Ka ʻi he kamata ke u kole tokoni kiate Iá, naʻá Ne fakafaingofuaʻi ange e tokoni Hono toʻukupú. Naʻe tokoniʻi au ʻi he mole ha ngaahi meʻá ke u ʻilo ai ʻa e Fakamoʻuí.
Naʻe ʻomi ʻe heʻeku pīsopé haku fatongia, pea hoko leva e kau finemui kehé ko hoku ngaahi kaungāmeʻa he naʻá ku anga fakafaingofua kiate kinautolu. Koeʻuhí naʻá ku ongoʻi ʻoku ʻikai ke ʻi ai haku ngaahi kaungāmeʻa, naʻe toki mahino kiate au mahalo ʻoku foua ʻe he niʻihi kehé ha meʻa tatau. Naʻá ku fakakaukau leva ʻoku totonu ke u ʻuluaki fai ʻe au ʻa e tokoní.
ʻOku ou manatuʻi ʻa e taimi ke u tokoni ai ki hono akoʻi ʻo ha lēsoni ʻi he lotú. Naʻe ʻikai pē ke u ongoʻi ʻoku ou fie fai ia. Ka ʻi he hili ʻeku fakahoko lelei iá, naʻá ku ongoʻi fiefia. Naʻe akoʻi au ʻe he meʻá ni ʻoku fakalata moʻoni pē ʻa e ongoongoleleí. ʻOku ʻikai lava ke fakamatalaʻi ʻa e ongo ko iá ʻi ha founga lelei.
Ko hono ikuʻangá, naʻe tokoniʻi ʻe he ʻEikí ʻeku faʻeé ke maʻu haʻane ngāue foʻou. Meʻamālié, ʻoku mau kei nofo pē ʻi homau ʻapí, pea kuo ngaohi ia ʻe he Fakamoʻuí ke hoko ko ha feituʻu māʻoniʻoni ange. ʻOku ou kei kakata pē mo hoku ngaahi kaungāmeʻa ʻi he akó. Ka ʻoku ʻikai ha meʻa ʻe tatau mo e fiefia ʻoku ʻomi ʻe he Fakamoʻuí.