ʻOku Fekauʻaki ʻa e Meʻa Kotoa Pē mo e Ngāue Fakafaifekaú
Ngaahi Talí mo e Faleʻí
ʻE lava ke fakafiefia mo fakaofo ʻa e ngāue fakafaifekaú—ka ʻoku toe foʻou foki mo taʻeʻiloa. Ko ha ngaahi tali ʻeni mei he kau faifekaú ki ha ngaahi fehuʻi angamaheni ʻa e toʻu tupú.
ʻŪ tā fakatātā ʻa Michael Mullan
Naʻá ku ngāue ʻi he ʻuluaki māhina ʻe 11 ʻo ʻeku ngāue fakafaifekaú ʻi ʻIutā kae ʻikai ko e feituʻu naʻe vahe au ki aí. Naʻe hoko ʻa e toe vahe foʻou mai ko ʻení koeʻuhí ko e mahaki fakaʻauha COVID-19. Naʻá ku lea ʻaki ʻeku lea fakafonuá, kai ʻa e meʻakai naʻá ku anga pē ki aí, pea ʻaʻahi ki ha kakai mo ha ngaahi feituʻu angamaheni. Naʻe fakalata ia!
ʻI he taimi naʻe toʻo ai e ngaahi fakangatangata ʻo e fefonongaʻakí, naʻá ku fakaʻaongaʻi leva e toenga māhina ʻe fitu ʻo ʻeku ngāue fakafaifekaú ʻi he Lepupelika Tominikeni fakaʻofoʻofá (ko e ʻuluaki feituʻu ia ne vahe au ki aí). Naʻá ku lue lalo ʻi ha ngaahi houa lahi ʻi he ngaahi hala laʻāina mo moʻumoʻuá, lea faka-Sipeini, kai hopa mo e mango lahi, pea akoʻi e ongoongolelei ʻo Sīsū Kalaisí ki he niʻihi ʻo e kakai loto-fakatōkilalo, fiefia, mo tui faivelenga taha kuo faifai peá u fetaulaki mo iá. Naʻe mātuʻaki fakaofo moʻoni foki ʻeni!
He ʻikai teitei faitatau ha ongo misiona ia. Pea hangē ko ʻetau kehekehe kotoa peé, ʻoku kehekehe pē foki mo hotau ngaahi misioná! ʻOku ʻi ai nai haʻo fehuʻi kau ki he ngāue fakafaifekaú? ʻOku fēfē honau faʻungá, anga ʻo e teuteú, pea ʻe lava nai ke ke ngāue ʻi ha taha ʻo e ngaahi misioná?
Misioná F&T
Naʻe ʻomi ʻe ha toʻu tupu loto-fifili (hangē pē ko koé!) ʻa ʻenau ngaahi fehuʻi fekauʻaki mo e ngāue fakafaifekaú. Naʻa mau kole ki he kau faifekau ʻi he Misiona Arizona Gilbert ke nau tali ʻa e ngaahi fehuʻí.
F: Ko e hā e faikehekehe ʻa e ngāue fakafaifekau tokoní mo e ngāue fakafaifekau akoʻí?
T: “ʻOku fakatou maʻu ʻe he kau faifekau tokoní mo e kau faifekau akoʻí ha ngaahi tuʻunga moʻui ke muimui ki ai ʻi hono fakafofongaʻi ʻo Sīsū Kalaisí. ʻOku faʻa nofo pē ʻa e kau faifekau tokoní mo honau ngaahi fāmilí pea fakafofongaʻi ʻa Sīsū Kalaisi ʻaki ʻenau ngāue ʻi honau tūkui koló. ʻOku tatau pē hono tali ʻe he ʻEikí ʻa e ngāue ʻa e kau faifekau akoʻí mo e kau faifekau tokoní. ʻOku nau maʻu ʻa e mafai tatau pea ʻoku nau mahuʻinga tatau pē kiate Ia.”
ʻEletā Joseph Duncan
F: ʻE founga fēfē haʻate vāofi mo fiemālie ʻi hoto hoá kapau ʻoku siʻisiʻi ha meʻa ʻokú mo faitatau ai?
T: “Loto-fiemālie ke ako ʻo kau kiate kinautolu pea meiate kinautolu. Talanoa ʻo kau ki ha faʻahinga meʻa pē mo e meʻa kotoa pē. Fokotuʻu fakataha ha ngaahi aʻusia. Lotua kinautolu mo honau fāmilí ʻaki honau hingoá.”
Sisitā Riley Johnson
F: ʻOku fēfē ʻete fefaʻuhi mo e taʻelatá?
T: “ʻOku ou fefaʻuhi mo e taʻelatá ʻaki hono fai ʻa e ngāué, ʻofa ʻi he kakaí, mo sio ki he meʻa lahi kuó u fouá mo e lahi fau hono faitāpuekina aú. Kuo teʻeki ai ke u ongoʻi fiemālie ange, ongoʻi hono ʻafioʻi lelei ange au ʻe he ʻOtuá, pea fiefia lahi ange ʻi heʻeku ngāue fakafaifekaú.”
Sisitā Lucy Chapman
F: Kuo liliu fēfē hoʻo moʻuí talu hoʻo ngāue fakafaifekaú?
A: “Kuo tokoniʻi au ʻe he ngāue fakafaifekaú ke liliu ʻa e meʻa naʻe fakatefito ki ai ʻeku moʻuí. Kimuʻa peá u ngāue fakafaifekaú, naʻá ku tokanga taha pē ki he anga e fakakaukau mai ʻa e kakaí kiate aú. Kuo akoʻi au ʻe heʻeku ngāue fakafaifekaú ko e taimi ʻoku ou fakamuʻomuʻa ai ʻa e Tamai Hēvaní mo Sīsū Kalaisí, ʻe tonu ʻa e meʻa kotoa pē.”
ʻEletā Jakob Blad
Q: Te u teuteu fēfē nai ke u ʻalu ʻo ngāue fakafaifekaú?
A: “ʻI he taimi naʻá ku teuteu ai ki heʻeku ngāue fakafaifekaú, ko e taha ʻo e ngaahi maʻuʻanga ivi maʻongoʻonga taha kiate aú ko ʻeku ʻalu maʻu pē ki he temipalé mo hono lau ʻo e Tohi ʻa Molomoná. Te ke maʻu ha mālohi mei ʻolunga ke ke ʻalu atu ʻo ngāue mateaki ʻi hoʻo fakaʻaongaʻi ho taimí ʻi he fale ʻo e ʻEikí!”
ʻEletā Ammon Runger
F: ʻOku fēfē hoʻo fakafeangai ki he ngaahi faingataʻa fakatāutahá?
T: “I he taimi ʻoku ou fehangahangai ai mo ha ngaahi faingataʻaʻia fakatāutahá, ʻoku tokoni ia ke u vakai ki he ngaahi faingataʻá ʻaki ha fakakaukau ʻoku taʻengatá. Kuo pehē ʻe Palesiteni Nalesoni, ‘ʻI he taimi ʻoku taulōfuʻu mai ai kiate koe ʻa e mafasiá, fakakaukau fakasilesitiale!’ ʻOku tokoni ʻa e fakakaukau fakasilesitialé ke u ʻiloʻi te u lava ʻo ikunaʻi ha faʻahinga faingataʻa pē ʻo fakafou ʻia Sīsū Kalaisi koeʻuhí he ʻokú Ne ʻafioʻi moʻoni ʻa e meʻa ʻoku ou fouá pea te Ne lava ʻo ʻomi ha mālohi kiate au.”
ʻEletā Benjamin Baker
F: Ko e hā ʻa e konga faingataʻa taha ʻo hoʻo ngāue fakafaifekaú?
T: “Ko e fakafenāpasi ki he ngaahi meʻa ʻoku fiemaʻú. ʻOku ʻikai ke tatau maʻu pē ʻa e ngāue fakafaifekaú mo e meʻa ʻokú te ʻamanaki ki aí, ka ʻoku nau hoko maʻu pē ko e meʻa ʻokú te fiemaʻú. ʻOku mafeia ʻe he ʻOtuá ʻa e meʻa kotoa pē.”
Sisitā Taylee Martinez
F: Ko e hā ʻa e konga lelei taha ʻo e ngāue fakafaifekaú?
T: “Ko e kakaí. Koeʻuhí ʻoku tokanga ʻa e ʻOtuá ki he ngaahi vā fetuʻutaki ʻi hoʻo moʻuí, ʻokú Ne ʻoatu ai ha ngaahi hoa-ngāue, kau faifekau kehe, kau taki fakamisiona, kau mēmipa ʻo e uōtí, mo ha kakai ʻi he halá te nau akoʻi atu ha ngaahi lēsoni, tokoniʻi koe ke ke tupulaki, pea maʻu ai ʻa e faʻahinga vā fetuʻutaki te ke feʻao mo ia ʻi he toenga hoʻo moʻuí. ʻOku fekauʻi atu ʻe he ʻOtuá ʻa e kakai ʻoku fiemaʻu ke ke tokoniʻí, pea mo e kakai ʻoku fiemaʻu ke nau tokoniʻi koé.”
Sisitā Sarah Mueller
F: Kuo fakamālohia fēfē koe ʻe he ngāue fakafaifekaú?
T: “Kuo fakamālohia ʻe heʻeku ngāue fakafaifekaú ʻa hoku vā fetuʻutaki mo Sīsū Kalaisi mo e ʻOtua ko e Tamaí. Kimuʻa peá u ngāue fakafaifekaú, naʻe ʻikai ke u fuʻu ʻilo fēfē ki he anga ʻEna ʻofá. Ka ʻi heʻeku hoko ko ha faifekaú, ʻoku ou mamata tonu ki ai ʻi he ʻaho kotoa pē ʻo fakafou ʻi ha ngaahi mana, ko e ʻofa ʻa e niʻihi kehé, kae mahuʻinga tahá, ko Sīsū Kalaisi. ʻOku ʻikai ke u tui ne u mei ʻilo lahi ange ki Heʻene ʻofá ʻi ha toe founga kehe ka ko e tauhi pē kiate Iá.”
ʻEletā Ethan Withers
F: Ko e hā e meʻa te u fai kapau ʻoku ʻikai ke u ongoʻi taau ke ʻalu ʻo ngāue fakafaifekau?
T: “ʻOku faingataʻa ki ha tokolahi ʻo kitautolu ke tau ongoʻi taau moʻoni ke fakafofongaʻi ʻa Sīsū Kalaisi ʻi he momeniti kotoa pē ʻo ʻetau moʻuí. ʻOku ou ongoʻi fiemālie ʻi heʻeku ʻiloʻi kuó Ne fakafeʻungaʻi maʻu pē ʻa kinautolu kuo nau ongoʻi pehení ʻi heʻenau fai ʻa e ngaahi meʻa ʻoku fiemaʻu ke fakahaaʻi ai ki he ʻOtuá ʻoku nau fāifeinga mo liliú! Kuó u lava ʻo ongoʻi taau ʻi heʻeku aʻusia ʻa e mālohi faifakamoʻui ʻo e Fakalelei ʻa e Fakamoʻuí ʻi heʻeku moʻuí. ʻOku ou ʻilo te tau moʻui taau kotoa pē ʻi heʻetau falala kiate Ia pea moʻui ʻaki ʻEne ongoongoleleí!”
ʻEletā Matthew Hollingsworth
F: ʻOkú ke levaʻi fēfē e ngaahi vā fetuʻutaki ʻi ʻapí lolotonga hoʻo ngāue fakafaifekaú?
T: “ʻOku ou fakaʻaongaʻi ʻa e ngaahi vā fetuʻutaki ʻoku ou maʻu ʻi ʻapí ke tokoni ke fakahoko ʻeku taumuʻa fakafaifekaú koeʻuhí he ko kinautolu ʻeku ngaahi sīpinga maʻongoʻonga tahá! ʻOku ou fai hoku lelei tahá ke ʻoua naʻa nau toʻo ʻeku tokangá ka ke fakaʻaongaʻi ʻenau ʻofá, fiefiá, mo e poupoú ke fai hoku lelei tahá maʻa hoku Fakamoʻui ko Sīsū Kalaisí!”
Sisitā Kimberly Pannell
F&T Fakakomipiuta Lahi Ange
F: Ko e hā hono tuʻo lahi hoʻo feʻiloaki/akoʻi e kakaí?
T: “ʻOkú te maʻu ʻa e faingamālie he ʻaho kotoa pē ke feʻiloaki mo ha kakai foʻou pea vahevahe atu e ʻofa ʻoku maʻu ʻe Sīsū Kalaisi maʻanautolú, ʻo tatau ai pē pe ko ha fetuʻutaki ʻi he halá pe kāingalotu ʻi he uōtí. Ko ha tāpuaki ke maʻu ʻa e faingamālie ke feʻiloaki mo ako mei ha fānau tokolahi ʻa e ʻOtuá.”
Sisitā Nicole Hatch
F: Ko e hā hono fuoloa hoʻo ʻi he senitā akoʻanga fakafaifekaú?
T: “ʻE makatuʻunga e lahi ʻo e taimi te te nofo ai ʻi he MTC mei he feituʻu ʻokú te haʻu mei aí mo e feituʻu te te ʻalu ʻo ngāue aí. Ko e siʻisiʻi tahá ko e uike ʻe 2 pea ko e lahi tahá ko e uike ʻe 9 nai. ʻOku mahino mei heʻete nofo fuoloa angé te te ako ha lea fakafonua foʻou.”
ʻEletā Samuel Martin
F: ʻOkú te levaʻi fēfē ʻa e taimí ka te lava ʻo ngaohi ha meʻatokoni?
T: “ʻOku ou palani ʻeku meʻatokoni ki he uiké ʻi he ʻaho teuteú. ʻOku ou ngaohi ʻa e meʻatokoni lelei ʻoku faingofua mo vave hono ngaohí. ʻOku ou saiʻia ʻi he ako ke feimeʻatokoni mo ʻahiʻahiʻi ha ngaahi meʻakai foʻoú!”
ʻEletā Tyson Burr
F: ʻOku maʻu nai hao taimi ke ke fakamālohisino ai?
T: “I heʻemau hoko ko e kau faifekaú, ʻoku mau maʻu ha taimi ʻi he ʻaho kotoa pē ke fakamālohisino ai. ʻI hono maʻu ʻo e taimi ko iá, te ke lava mo e kau faifekau kehé ʻo lele, pe fakaʻaongaʻi ha faʻahinga meʻangāue fakamālohisino pē ʻoku maʻu.”
ʻEletā Ethan Gibson
F: Ko e hā hono fuoloa peá ke anga ki he ngāue fakafaifekaú?
T: “Te u pehē, ko ha ngaahi uike siʻi pē koeʻuhí ne u tukuange ʻeku ngaahi fiemaʻu fakatāutahá ʻi he taimi pē ne u tui ai ʻa e piné. Naʻe vave pē ʻeku fai ʻa e fili ke līʻoa kakato hoku lotó ki he ʻEikí pea tuku ke Ne liliu au ki he tuʻunga ʻokú Ne finangalo ke u aʻusiá.”
ʻEletā Nathan Meyers
F: Naʻá ke ongoʻi kuó ke mateuteu ke mavahe mei ho fāmilí mo e kaungāmeʻá kimuʻa peá ke toki ʻalu ʻo ngāue fakafaifekaú?
T: “Naʻe fuoloa ʻeku fie ʻalu ʻo ngāue fakafaifekaú, ka naʻá ku ʻiloʻi ʻe lahi ha ngaahi meʻa te u ʻalu kae tuku. ʻI heʻeku tui kia Sīsū Kalaisí, mo pīkitai ki heʻeku ngaahi fuakava fakatemipalé, tautautefito ki he fono ʻo e fakatapuí, kuó u mamata ai ki he lahi ʻo e meʻa kuo tokonaki ʻe he ʻEikí maʻakú.”
Sisitā Elanor Eden Van Slyke
F: Naʻá ke ʻiloʻi fēfē ʻokú ke fie ʻalu ʻo ngāué?
T: Naʻá ku ʻosi loto pē au lolotonga ʻeku kei ʻi he palaimelí ke u ʻalu ʻo ngāue fakafaifekau! Naʻe lahi haʻaku ngaahi aʻusia fakalaumālie ʻi heʻeku kei talavoú ʻo fakapapauʻi mai ʻa e fiemaʻu ke u ʻalu ʻo tala ki he niʻihi kehé ʻa e ongoongolelei ko ʻení!
ʻEletā Carter Seeman
F: ʻOku ʻi ai haʻo kaunga ki he feituʻu te ke ʻalu ʻo ngāue aí?
T: Ko e meʻa ʻataʻatā pē ia ʻa e ʻEikí. ʻOku ʻikai haʻate kaunga ʻa kita ki he feituʻu ʻokú te ʻalu ki aí. Ko e feituʻu ʻokú te ʻalu ki aí ko e feituʻu pē ia ʻoku finangalo e ʻEikí ke te ʻi aí, pea ʻokú Ne fiemaʻu ho ʻulungāngá mo ho tuʻunga totonú ʻi he misiona ko iá.
ʻEletā Denis McLaughlin