Ko Hono Ngāue ʻAki ʻo e Fakahinohinó.
Tokoni mei ha Maʻuʻanga Tokoni Haohaoa
Neongo pe ko e hā ha ngaahi faingataʻa ʻokú ke fepaki mo ia, ʻe tokoniʻi koe ʻe Sīsū Kalaisi ʻi hoʻo tafoki kiate Iá.
The Pattern (Ko e Sīpingá), tā fakatātaaʻi ʻe Jeanette Bourup
ʻOku ʻi ai pē ha taimi te tau fiemaʻu kotoa ai ha kiʻi tokoni. ʻOku ʻi ai e taimi ʻoku tau fiemaʻu ai ha fuʻu tokoni lahi. Ko hono moʻoní, ʻoku faʻa lelei ange ʻa e moʻuí ʻi he taimi ʻoku ʻikai ke ke feinga ai ke fakahoko toko taha peé.
Ko Sīsū Kalaisi ʻa hoʻo maʻuʻanga tokoni, ʻamanaki lelei, mo e mālohi haohaoá. Te Ne lava foki ʻo tokoni ke ke liliu ʻo lelei ange—mahalo ʻi ha ngaahi founga naʻe ʻikai ke ke fakakaukau ʻe malava.
Ko ha Liliu ʻo e Lotó
Kuó ke ʻosi lotua nai ke fakamolū ʻe he ʻOtuá ʻa e loto ʻo ho ngaahi filí? Kapau ko ia, kuo ʻosi foua ʻe he kakai leleí ʻa e meʻa tatau (vakai, 3 Nīfai 12:44; Molonai 7:48). Neongo kapau ʻoku ʻikai ke ʻi ai haʻo ngaahi fili ʻo hangē ko ia ʻi he Tohi ʻa Molomona (hangē ko ha ngaahi fili kuo fakamahafu ʻaki ha meʻatau pea mateuteu ke ʻohofi), mahalo kuó ke lotua ke fakamolū ʻe he ʻOtuá ʻa e loto ʻo ha taha naʻe ʻikai ke ne fai lelei atu kiate koe.
Ka kuó ke fakakaukau nai ke ke lotu ʻo kole ki he ʻOtuá ke fakamolū ho lotó? Mahalo pē ʻokú ke faingataʻaʻia ʻi hano fakamolemoleʻi ha taha. Pe ʻokú ke faʻa ʻita maʻu pē, neongo ʻoku ʻikai ke ke loto ke pehē. Pe ʻokú ke loto ke ongoʻi angaʻofa lahi ange ki ho ngaahi tokouá mo e tuofāfiné neongo ʻenau faʻa fakaʻitaʻi koe he taimi ʻe niʻihi.
“[Ko Sīsū Kalaisi] te Ne liliu ho lotó mo hoʻo moʻuí. Te ke tupulaki māmālie pea hoko ʻo hangē ange ko Iá. ʻE hanga ʻe hoʻo fehokotaki fuakava mo Iá ʻo fakafaingamālieʻi lahi ange koe ki Hono mālohí” (Ki Hono Fakamālohia ʻo e Toʻu Tupú: Ko ha Fakahinohino ki hono Fai ha Ngaahi Filí [2022], 8, tānaki atu hono fakamamafaʻí).
ʻIkai nai ko ha talaʻofa maʻongoʻonga ia? ʻE lava ke tokoni ʻa Sīsū Kalaisi, ʻi ha faʻahinga meʻa pē ʻokú ke faingataʻaʻia ai, ʻo aʻu ki ho lotó. Te ke lava ʻo tafoki fēfē kiate Ia he ʻahó ni?