ʻAi Hangatonu

Ko e hā e tauhi mai ʻa e kau ʻāngeló? Pea ko e hā ʻoku fakafehokotaki ai ia ki he mafai ʻo e Lakanga Taulaʻeiki Faka-ʻĒloné?

ʻI he taimi naʻe fakafoki mai ai ʻe Sione Papitaiso ʻa e Lakanga Taulaʻeiki Faka-ʻĒloné, naʻá ne pehē ʻokú ne “maʻu ʻa e ngaahi kī ʻo e tauhi mai ʻa e kau ʻāngeló” (Tokāteline mo e Ngaahi Fuakava 13:1). Naʻe fakamatala ʻe Palesiteni Tāleni H. ʻOakesi, ko e Tokoni ʻUluaki ʻi he Kau Palesitenisī ʻUluakí, ʻa e fehokotaki ʻi he vahaʻa ʻo e Lakanga Taulaʻeiki Faka-ʻĒloné pea mo e tauhi mai ʻa e kau ʻāngeló ʻi he foungá ni:

“Ko hono fakakātoá, ko e ngaahi tāpuaki ʻo e feohi mo e fetuʻutaki fakalaumālié ʻoku lava pē ke maʻu ʻe kinautolu ʻoku maʻá. … ʻOku fakamaʻa kitautolu mei heʻetau ngaahi angahalá tuʻunga ʻi he ngaahi ouau papitaiso mo e sākalamēniti ʻo e Lakanga Taulaʻeiki Faka-ʻĒloné pea mo e talaʻofa ko ia kapau te tau tauhi ʻetau ngaahi fuakavá ʻe ʻiate kitautolu maʻu ai pē ʻa Hono Laumālié. ʻOku ou tui ʻoku ʻikai ʻuhinga pē ʻa e talaʻofa ko iá ki he Laumālie Māʻoniʻoní ka ʻoku toe ʻuhinga foki ki he tauhi mai ʻa e kau ʻāngeló, he ʻʻoku lea ʻa e kau ʻāngeló ʻi he mālohi ʻo e Laumālie Māʻoniʻoní; ko ia, ʻoku nau lea ʻaki ʻa e ngaahi folofola ʻa Kalaisí’ (2 Nīfai 32: 3). Ko ia ʻoku fakaava ʻe kinautolu ʻoku nau maʻu ʻa e Lakanga Taulaʻeiki Faka-ʻĒloné ʻa e matapaá ki he kāingalotu kotoa ʻo e Siasí ʻoku nau maʻu ʻi he taau ʻa e sākalamēnití, ke nau fiefia ʻi he takaua ʻa e Laumālie ʻo e ʻEikí pea mo e tauhi mai ʻa e kau ʻāngeló” (konifelenisi lahi ʻo ʻOkatopa 1998 [Ensign, Nov. 1998, 39]).