E Rawa ni Vinaka Cake na Veika Eda Cakava tiko meda Vinaka Cake kina

Kemuni na taciqu lomani, e veivakauqeti dina meda raica yani na ivavakoso levu oqo ni mataivalu matabete ni Turaga. Ko ni sa dua na kaukauwa cecere ni caka vinaka! Keimami lomani kemuni. Keimami masulaki kemuni. Keimami sa vakavinavinakataki kemuni vakalevu.

Dua na gauna sa oti a uqeti na yaloqu ki na ivakasala ni Turaga a soli maivei Parofita Josefa Simici: “Mo kua tale ni dua na ka mo tukuna ia na veivutuni ga ena itabatamata oqo.”¹ Na itukutuku oqo e sa tukuni vakawasoma ena ivolanikalou.² E vakavuna e dua na taro taka levu: “E gadrevi beka e veivutuni na tamata kecega?” Na kena isau io.

E vuqa na tamata era raica na veivutuni ni sa itotogi—e dua na ka me levei vakavo ga ena veicala bibi sara. Ia na vakasama ni veitotogitaki oqo e vakavurea mai o Setani. E saga o koya me vakataotaka noda raici Jisu Karisito,³ e dedeka tu mai na ligana,⁴ e nuitaka ka yalona sara me vakabulai, vosoti, samaki, vaqaqacotaki, vakasavasavataki, ka vakatabui keda.

Na vosa veivutuni ena Veiyalayalati Vou Vakiriki na metanoeo. Na iliu vosa meta e kena ibalebale na “veisau.” Na imuri vosa noeo e sema ki na vosa Vakiriki e kena ibalebale “vakasama,” “kila,” “yalo,” kei na “icegu.”⁵

Koya gona, ni sa tarogi iko kei au o Jisu me daru “veivutuni,”⁶ Sa sureti keda tiko meda veisautaka na noda vakasama, noda kila, na yaloda—vakakina noda ivakarau ni cegu. Sa kerei keda tiko meda veisautaka na ivakarau ni noda loloma, vakanananu, veiqaravi, vakayagataki gauna, qarava na watida, vakavulica na luveda, kei na qaravi ni yagoda.

E sega na ka e veisereki cake, vakaturaga cake, se bibi cake ki na noda torocake yadudua me vakataka na raicimatua tiko e veisiga na veivutuni. Na veivutuni e sega ni caka ga vakadua; e tomani tikoga. Sai koya na idola ki na marau kei na vakacegu ni vakasama. Ni ovici vata kei na vakabauta, sa dolava na veivutuni na katuba meda taura na kaukauwa ni Veisorovaki i Jisu Karisito.⁷

Se o gu tiko ki liu ena sala ni veiyalayalati, o sa sikalutu se kalawa tani mai na sala ni veiyalayalati, se sega ni raica rawa na sala ni veiyalayalati mai na vanua o tiko kina oqo, au vakamasuti iko mo veivutuni. O na sotava na kaukauwa qaqaco ni veivutuni e veisiga—ni ko cakava ka vinaka cake vakalailai e veisiga.

Ni da sa digitaka meda veivutuni, eda sa digitaka meda veisau! Eda sa vakatara na iVakabula me vakavoutaki keda ki na keda ituvaki vinaka duadua. Eda sa digitaka meda tubu vakayalo ka ciqoma na reki—na reki ni noda vueti Vua.⁸ Ni da sa digitaka meda veivutuni, eda sa digitaka meda vakataki Jisu Karisito cake!⁹

Kemuni na taciqu, e gadrevi vinaka cake na veika eda cakava ka meda vinaka cake talega o keda baleta eda valu tiko oqo. Na ivalu kei na ivalavala ca e ka dina. Sa veitaqaitaka tiko mai o vunimeca na nona saga me vakataotaka na ivakadinadina ka tarova na cakacaka ni Turaga. Sa tuvaivalutaki ira tiko na nona imuri ena iyaragi kaukauwa me tarova noda bulataka na reki kei na loloma ni Turaga.¹⁰

Na veivutuni sa idola me levei kina na rarawa e veivakamavoataki kina na dai nei vunimeca. Na Turaga e sega ni namaka meda uasivi sara ena gauna oqo ni da torocake tawamudu tiko. Ia sa namaka vei keda meda na savasava cake tikoga. Na veivutuni e veisiga sai koya na sala ki na savasava, ni savasava e kauta mai na kaukauwa. Na savasava ni tamata yadua sa iyaragi kaukauwa ni liga ni Kalou. Na noda veivutuni—noda savasava—ena vakaukauwataki keda meda vukea me sokumuni o Isireli.

E vakavulici Josefa Simici na Turaga ni “kaukauwa vakabete sa semati tudei tu kei na kaukauwa vakalomalagi, ia e sega ni rawa me taurivaki se vakayacori na kaukauwa vakalomalagi ena sala tani, ena ivakavuvuli duadua ga ni buladodonu.”¹¹

Eda sa kila tu na cava ena solia vei keda vakalevu na kaukauwa kei lomalagi. Eda sa kila talega na cava ena tarova noda torocake—na veika meda sa kakua ni cakava me tubu kina noda rawata na kaukauwa kei lomalagi. Kemuni na taciqu, masulaka mo ni kila na veika e vakataotaka tiko nomu veivutuni. Mo kila na cava e tarova tiko nomu veivutuni. Ni oti, veisau sara! Veivutuni! Eda rawa kece ni vinaka cake ka vinaka cake mai na kena e liu.¹²

Sa tu na sala eso eda rawa ni vakatorocaketaka. E dua o ya na sala eda qarava kina na yagoda. Au tu ka qoroqoro ena cakamana ni yago ni tamata. Sa dua dina na ibulibuli totoka, sa ka bibi ki na noda kalawa tiko yani ki na noda icavacava vakalou. Eda na sega ni torocake ke sega oqo. Ni sa solia vei keda na isolisoli ni yago, sa vakatara na Kalou meda kalawa cecere yani meda vakataki Koya cake.

E kila vinaka tu o Setani. Sa cudruvaka tiko na nona a vukitani ena bula taumada ka sa sega tale ni rawata na madigi oqo, me sa qai bula tu ga ena vuvu kei na yalo ca. O koya gona, e vuqa se levu sara na veitemaki e biuta ena noda sala e vakavuna meda vakacacana kina na yagoda se yagodra eso tale. Me baleta ga ni rarawataka o Setani ni sega na yagona, e gadreva kina meda rarawa baleta ni da vakayago.¹³

Na yagomu sa nomu valetabu vakai iko, a buli me vakavaletaka na yalomu tawamudu.¹⁴ Na nomu qarava na valetabu oqo e ka bibi. Meu tarogi kemuni na taciqu, o taleitaka cake beka mo vakasuluma ka sauna na yagomu mo totoka vei vuravura se mo vakalomavinakataka na Kalou? Na nomu sauma sa itukutuku vakadodonu sara Vua me baleta na yalomu ki na Nona isolisoli cecere vei iko. Ena kena dokai na yagoda, kemuni na taciqu, au nanuma ni da rawa ni caka vinaka cake ka vinaka cake.

Dua tale na sala meda caka vinaka cake kina ka vinaka cake o ya meda dokai ira na marama ena noda bula, tekivu vei watida kei na luveda yalewa, na tinada kei na ganeda.¹⁵

Vica na vula sa oti, au a taura e dua na ivola vakamosi yalo maivei dua na sisita lomani. A vola mai: “Keitou nanuma [na veitinani yalewa] ni keitou sa veisisivi vakaukauwa sara tiko kei wati keitou’ kei luvei keitou tagane era lomavata tiko, ena sigabogi ni rogo qito, qito vidio, irogo ni makete ni ivoli, [kei na] dikevi tawayalani kei na saravi ni [isotasota ni qito] lelevu yadua. Sa vaka me sa cawadru laivi na neitou idabedabe e liu kei wati keitou kei luvei keitou tagane baleta ni sa tudei tu na nodratou idabedabe e liu ni [isotasota kei na qito].”¹⁶

Kemuni na taciqu, na imatai ka iliu taumada ni itavi vakalewe ni matabete oya mo lomana ka qarava na watimu. Mo duabau kei koya. Mo nona itokani. Mo vakarawarawataka vua me gadreva me nomu itokani. E sega tale na ka talei ena bula oqo me vakaliuci mai na kena tarai cake na veimaliwai tawamudu kei watimu. E sega na ka ena TV, gacagaca ni veivosaki, se komipiuta e bibi cake mai na bula nei watimu. Dikeva na nomu vakayagataki gauna kei na vanua o dinata kina na nomu sasaga. Oqo ena tukuna na vanua e tiko kina na yalomu. Masu me sema na yalomu vata kei na yaloi watimu. Vakasaqara me marau o koya. Vakasaqara nona ivakasala, ka rogoca. Na nona cau ena toroya cake nomu cau.

Kevaka sa gadrevi mo veivutuni baleta na veika o cakava tiko vei ira na yalewa era voleka vei iko, tekivu qo. Mo nanuma talega, e nomu ilesilesi mo vukei ira na yalewa ena nomu bula mera vakalougatataki ni ra bulataka na lawa ni tiko savasava ni Turaga Mo kakua ni vuna na nona sega ni ciqoma o koya na nona kalougata ni valetabu.

Kemuni na taciqu, sa gadrevi kece meda veivutuni. Sa gadrevi meda tucake mai na idabedabe, biuta na rimote, ka yadra mai na noda moce lutu vakayalo. Sa kena gauna meda dara na iyaragi kecega ni Kalou me da vakaitavi ena cakacaka bibi duadua e vuravura. Sa gauna oqo meda “curumaka na [noda] isele takelo, ka ia na tatamusuki ena [noda] igu, vakasama, kei na kaukauwa kecega.”¹⁷ Na kaukauwa ni butobuto a sega mada ni kaukauwa cake e liu me vaka ena kena nikua. Ni da sa italai ni Turaga, eda na sega ni moce tiko ni yaco tiko na ivalu oqo.

E gadreva na nomu vuvale na nomu veiliutaki kei na loloma. E gadreva na nomu kuoramu kei ira ena nomu tabanalevu se tabana na nomu kaukauwa. Kei ira kece era sotavi iko era gadreva mera kila na kedra irairai na tisaipeli dina ni Turaga kei na nodra ivakarau.

Kemuni na taciqu lomani, sa digitaki kemuni na Tamada mo ni gole mai ki vuravura ena gauna bibi oqo baleta na nomuni qaqa vakayalo ena vuravura taumada. Sai kemuni o ni wili me dua vei ira sa cecere , ka qaqa vei ira na se bau yaco mai ki vuravura. E kila tu o Setani o cei o iko mai na bula taumada ka kila tu na cakacaka e dodonu me caka ni bera Nona lesu mai ni iVakabula. Ni oti e udolu na yabaki ni nona cakacaka lawaki, sa qaseqase ka sega tale ni veisau rawa.

Eda vakavinavinaka, ni matabete eda lewena e kaukauwa cake mai na ivadi nei vunimeca. Au vakamasuti kemuni mo ni sa tagane ka cauravou sa gadreva na Turaga mo ni vakataka. Mo raicamatua e veisiga mo veivutuni ni sa ka bibi ena nomu bula mo cakacakataka kina na matabete ena kaukauwa cecere cake ena kena e liu. Oqo ga na sala ena taqomaki kina vakayalo o iko kei na nomu vuvale ena veisiga veibolei sa tu mai liu.

Na Turaga sa gadrevi ira na tagane dauveinanumi era vakaliuca cake na nodra bula eso mai na nodra bula. Sa gadrevi ira na tagane era cakacaka ena inaki mera rogoca na domo ni Yalo ena savasava. E gadrevi ira na tagane ni veiyalayalati era maroroya na nodra veiyalayalati ena dodonu. E gadrevi ira na tagane era vakadeitaka mera tiko savasava—tagane kilikili era rawa ni kacivi ena gauna cava ga mera veivakalougatataki ena yalo dodonu, vakasama savasava, kei na liga sa lomasoli. Sa gadreva na Turaga na tagane sa gu me veivutuni—na tagane sa maqusa mera veiqaravi ka lewe ni mataivalu ni Turaga era lewe ni matabete kilikili.

Au sa vakalougatataki kemuni mo ni sa tagane vaka oqori. Au sa vakalougatataki kemuni ena yaloqaqa mo ni veivutuni e veisiga ka vulica mo ni cakacaka ena kaukauwa taucoko ni matabete. Au vakalougatataki iko mo solia na loloma ni iVakabula vei watimu kei ira na luvemu kei ira kece o kila. Au vakalougatataki iko me rawa ni vinaka cake na veika ko cakava me rawa ni ko vinaka cake vinaka cake talega. Kau sa vakalougatataki iko ni ko sasagataka oqo, o na sotava na cakamana ena nomu bula.

Eda sa vakaitavi tiko ena cakacaka ni Kalou. O Jisu na Karisito. Eda sa Nodrau italai. Au sa vakadinadinataka oqo ena yaca i Jisu Karisito, emeni.