Meda iVakaraitaki Uasivi ni Yalododonu Edaidai
Oqo na noqu loloma kei na kalougata vei kemuni, mo ni kana magiti ena vosa ni Turaga ka taurivaka na Nona ivakavuvuli ena nomuni dui bula.
Oqo e dua na koniferedi veivakauqeti ka itukutuku ni veigauna. Eda rai yani ki liu ena yalo maqusa. Eda sa mai vakauqeti meda caka vinaka cake ka ia meda vinaka cake. Na itukutuku totoka a cauraki mai na itutu ni vunau oqo mai vei ira na Vakaitutu Raraba kei na Vakailesilesi Raraba kei na sere sa uasivi sara! Au veisureti mo ni vulica na itukutuku oqo, tekivu ena macawa oqo.1 Era tukuna tiko na nanuma kei na lewa ni Turaga baleti ira nona tamata, nikua.
Na veilewenivuli vou tokona na Lotu e kena usutu na vuvale sa rawa me vakaukauwataka na matavuvale, ni ra muria lako vakayalomatua ena qaqarauni me vakavoutaki kina nodra itikotiko me vanua tabu ni vakabauta. Au yalataka ni ko cakacaka vagumatua mo vakatura vou nomuni itikotiko me vale ni vuli kosipeli, ena yaco nomuni Siga ni Vakacecegu me ka rekitaki vakaidina. Era na nanamaki na luvemuni mera vulica ka bulataka na ivakavuvuli ni iVakabula, ka me na yaco na veiuqeti nei vu-ni-meca ena nomuni bula kei na nomuniitikotiko me malumalumu. Na veisau ena nomu matavuvale ena totoka ka veitokoni.
Ena koniferedi oqo eda sa vaqaqacotaka noda lewa meda cakava na sasaga bibi me doka kina na Turaga o Jisu Karisito ena veigauna eda tukuna kina na Nona Lotu. Au yalataka ni noda qarauna vinaka noda cavuta dodonu na yaca ni Lotu ni iVakabula kei ira na lewenilotu ena vakavuna me tubu na vakabauta ka ra rawata na kaukauwa vakayalo cecere na lewe ni Nona Lotu.
Meda sa gole sara ki na ulutaga ni valetabu. Eda sa kila tu ni noda gauna e valetabu sa ka bibi ki na noda vakabulai ka vakacerecerei vakakina noda vuvale.
Ni da ciqoma oti noda cakacaka vakalotu ni valetabu ka veiyalayalati tabu kei na Kalou, eda na gadreva yadua meda vaqaqacotaki tikoga vakayalo kei na vuli e rawa walega ena vale ni Turaga. Era sa gadrevi keda na noda qase e liu meda sosomitaki ira.
Meda raica na loloma cecere kei na vinaka ni Kalou, ni se bera ni buli na vuravura oqo, a vakarautaka na sala me solia na kalougata ni valetabu vei ira sa mate era a sega tu ni kila na kosipeli. Na cakacaka tabu ni valetabu oqo sa mai liu sara. Vei au na ka makawa oqo e totoka ka sa ivakadinadina tale ni ra sa ka dina.2
Kemuni na taciqu kei na ganequ lomani, na ravuravu nei vu-ni-meca sa tubu cake tikoga, kaukauwa ka levu.3 Na noda gagadre meda tiko vakawasoma e valetabu ena kena gauna sa kaukauwa sara nikua. Au kerei kemuni mo ni raica ena masumasu na nomuni vakayagataki gauna. Mo vakayagataka na nomu gauna ena nomu veisiga ni mataka vakakina ena nomu matavuvale. Kevaka o rawa ni yaco vakarawarawa ki valetabu, au kerei iko mo raica na sala mo lokuca vakawasoma kei na Turaga—mo tiko ena Nona vale tabu—ka maroroya na veiloku oqo ena dodonu kei na reki. Au yalataka ni Turaga ena kauta mai na mana e kila o Koya ni ko gadreva ni ko solibula mo veiqaravi ka sokalou ena Nona valetabu.
Ena gauna oqo sa 159 na valetabu sa vakatabui oti. Na kena qarauni vakamatau kei na vakasavasavataki ni valetabu eso oqo e bibi sara vei keda. Ni toso tiko na gauna, e gadrevi ena veivaletabu na gagadre me vakavoutaki ka vakavinakataki. Mai na veika oqori, e tuvai tiko me na vakavinakataki ka vakavoutaki na Valetabu e Salt Lake kei na veivaletabu ni itabatamata painia. Ena qai wasei yani na matailalai ni cakacaka oqo ni toso na kena tauyavutaki.
Sa ka marautaki nikua me kacivaki yani na ituvatuva me tara e 12 na valetabu. Era na tara na veivaletabu oqori ena veivanua oqo: Mendoza, Argentina; Salvador, Brazil; Yuba City, California; Phnom Penh, Cambodia; Praia, Cape Verde; Yigo, Guam; Puebla, Mexico; Auckland, New Zealand; Lagos, Nigeria; Davao, Philippines; San Juan, Puerto Rico; kei Washington County, Utah.
Na tara kei na vakavinakataki ni valetabu ena sega beka ni veisautaka na nomuni bula, ia na nomu gauna e loma ni valetabu. Kivei kemuni sa dede nomuni yali mai valetabu, au vakauqeti iko mo vakavakarau ka lesu kusarawa mai vakatotolo. Au sureti iko kina mo sokalou e valetabu ka masu mo vakila vakatitobu nona lomani iko tawamudu na iVakabula, ka rawata nomuni ivakadinadina ni sa dusimaka tikoga o Koya na cakacaka tabu tawamudu oqo.4
Kemuni na taciqu kei na ganequ, vinaka vakalevu nomuni vakabauta kei na sasaga veitokoni. Oqo na noqu loloma kei na veivakalougatataki vei kemuni, mo ni kana magiti ena vosa ni Turaga ka taurivaka na Nona ivakavuvuli ena nomuni dui bula. Au vakadeitaka ni ivakatakila sa yaco tikoga ena Lotu ka na tomani tiko me yacova “na inaki ni Kalou ena yaco kusarawa, ka kaya o Jiova sa Cecere sa vakayacori na cakacaka.”5
Au vakalougatataki kemuni mo ni vakabauti Koya vakalevu cake kei na Nona cakacaka tabu, ena vakabauta kei na vosota ka gutaka nomuni ibolebole ni bula. Au vakalougatataki kemuni mo ivakaraitaki uasivi ni Yalododonu Edaidai. Mo ni kalougata kau vakadinadinataka ni bula tiko na Kalou! Sai Jisu na Karisito! Oqo na Nona Lotu. Eda sa Nona tamata, ena yaca i Jisu Karisito, emeni.