1 Ket siak, ti Apo a Dios, nagsaoak ken ni Moises, a kinunak: Dayta a ^aSatanas, a binilinmo iti nagan ti Bugbugtongko, isu met laeng daydi naggapu iti ^bpunganay, ket immay kaniak, a kinunana—Adtoy, adtoyak, ibaonnak, siakto ti anakmo, ket subbotek amin a sangkataw-an, tapno awan ti mapukaw nga uray no maysa a kararua, ket awan duadua nga ^caramidek, gapuna itdem ti panagraemmo.

2 Ngem, adtoy, Patpatgek nga ^aAnakko, nga isu ti Patpatgek ken ^bPilik manipud idi punganay, kinunana kaniak—^cAma, maaramid ti ^dpagayatam, ket kukuam ti ^egloria iti agnanayon.

3 Gapuna, gapu ta ^aimmalsa kaniak ni Satanas, ket pinanggepna a dadaelen ti ^bkinawaya ti tao nga agpili, nga intedko kenkuana, siak, ti Apo a Dios, ken kasta met nga itedko kenkuana ti bilegko; babaen ti bileg ti Bugbugtongko, imbilinko a nasken a ^cmapapanaw;

4 Ket nagbalin a Satanas, wen, nga isu ti sairo, ti ama ti amin a ^akinaulbod, a mangallilaw ken mangbulsek kadagiti tao, ken mangitunda kadakuada a balud iti pagayatanna, a kas iti kaadu dagiti saan a dumngeg iti timekko.

5 Ket ita ^anarungrungsot ti serpiente ngem iti ania man nga ayup iti talon nga inaramidko, siak, ti Apo a Dios.

6 Ket inkabil ni Satanas iti puso ti serpiente, (ta adu ti naallukoyna nga umasideg kenkuana), ken kasta met a kinalikagumanna nga allilawen ni ^aEva, ta dina ammo ti panunot ti Dios, gapuna kinalikagumanna a dadaelen ti lubong.

7 Ket kinunana iti babai: Wen, kinuna kadi ti Dios—Dika mangan iti ania man a kayo iti ^aminuyongan? (Ket nagsao babaen ti ngiwat ti serpiente.)

8 Ket kinuna ti babai iti serpiente: Mabalinmi ti mangan iti bunga dagiti kayo iti minuyongan;

9 Ngem iti bunga ti kayo a makitam iti tengnga ti minuyongan, kinuna ti Dios—Dikayo mangan iti dayta, wenno uray no sagidenyo la koma, ta mataykayo.

10 Ket kinuna ti serpiente iti babai: Awan duadua a saankayo a matay;

11 Ta ammo ti Dios nga iti aldaw a mangankayo iti dayta, malukatan dagiti ^amatayo, ket agbalinkayo a kas kadagiti dios, a ^bmakaammo iti naimbag ken dakes.

12 Ket idi makita ti babai a nasayaat a kanen ti kayo, ken kasta met a makaay-ayo a buyaen, ken kayo a ^amakagargari a mamagsirib kenkuana, pimmuros iti bungana, ket ^bnangan, ken kasta met nga inikkanna ti asawana, ket nangan met.

13 Ket agpadpada a naluktan dagiti matada, ket naammuanda a ^alamulamoda. Ket nangdaitda iti bulbulong ti igos nga inaramidda a bidangda.

14 Ket nangngegda ti timek ti Apo a Dios, bayat ti ^apannagnada iti minuyongan, iti kalamiisan ti aldaw; ket naglemmeng da Adan ken ti asawana iti imatang ti Apo a Dios iti kakaywan iti minuyongan.

15 Ket siak, ti Apo a Dios, inawagak ni Adan, ket kinunak kenkuana: Sadino ti ^apapanam?

16 Ket kinunana: Nangngegko ti timekmo iti minuyongan, ket nagbutengak, gapu ta nakitak a lamulamoak, ket naglemmengak.

17 Ket siak, ti Apo a Dios, kinunak ken ni Adan: Asino ti nagkuna a lamulamoka? Nanganka kadi iti bunga ti kayo nga imbilinko a dimo kankanen, no kasta awan duadua a ^amatayka?

18 Ket kinuna ti lalaki: Ti babai nga intedmo kaniak, ken imbilinmo a nasken nga agtalinaed kaniak, inikkannak iti bunga ti kayo ket nanganak.

19 Ket siak, ti Apo a Dios, kinunak iti babai: Ania daytoy banag nga inaramidmo? Ket kinuna ti babai: ^aInallilawnak ti serpiente, ket nanganak.

20 Ket siak, ti Apo a Dios, kinunak iti serpiente: Gapu ta inaramidmo daytoy ^amailunodka iti kadagupan dagiti dinguen, ken iti kadagupan ti tunggal ayup iti talon; magnaka babaen ti barukongmo, ket mangankanto iti tapok iti unos ti panagbiagmo;

21 Ket pagginnuraenkayonto iti babai, dagiti bukelmo ken dagiti bukelna; ket tarigagayannanto a pis-iten ti ulom, ket tarigagayamto a kagaten ti mukodna.

22 Iti babai, siak, nga Apo a Dios, kinunak: Paaduekto ti rigatmo ken ti sikogmo. Iti ^arigat ipasngaymonto dagiti annak, ket agtarigagaykanto iti asawam, ket iturayannakanto.

23 Ket ken ni Adan, kinunak, siak, nga Apo a Dios: Gapu ta dimngegka iti timek ti asawam, ket nanganka iti bunga ti kayo nga imbilinko kenka, a kinunak—Saankanto a mangan iti dayta, mailunodto ti daga gapu kenka, iti rigat mangankanto kenkuana iti unos ti panagbiagmo.

24 Sisiit pay, ken ruruot ti maitedto kenka, ket mangankanto kadagiti ruot iti talon.

25 Mangankanto iti tinapay babaen ti ^aling-et dayta rupam, agingga iti panagsublim iti daga—ta awan duadua a mataykanto—ta dita ti nagtaudam: ta no nagtaudka iti ^btapok, agsublikanto met laeng iti tapok.

26 Ket ninaganan ni Adan ti asawana iti Eva, gapu ta isu ti ina dagiti amin a nabiag; ta kasta ti impanaganko, siak, ti Apo a Dios iti inauna kadagiti amin a babbai, nga ^aadu.

27 Ken ni Adan, ken kasta met iti asawana, inyaramidak ida, siak, ti Apo a Dios, iti pagan-anay a lalat, ket ^akinawesak ida.

28 Ket siak, ti Apo a Dios, kinunak iti Bugbugtongko: Adtoy, agbalin ti ^atao a kas kadata a ^bmakaammo iti nasayaat ken dakes; ket ita itanggayana ti imana ket ^cmakiranud met iti ^dkayo ti biag, ket mangan ken agbiag iti agnanayon.

29 Ngarud siak, ti Apo a Dios, papanawekto manipud iti Minuyongan ti ^aEden, a mangsukay iti daga a nagtaudanna;

30 Ta kas iti kaaddak, siak, ti Apo a Dios, kasta met ti saan a pannakadadael dagiti ^abalikasko, ta no agtaudda iti ngiwatko nasken a matungpalda.

31 Isu a pinapanawko ti tao, ken inkabilko iti dayaen ti Minuyongan ti Eden, ti ^akerubin ken ti umap-apuy nga espada, a mangsalaknib iti kayo ti biag.

32 (Ket dagitoy ti balikas nga insaok ken ni katulongak a Moises, ket pudnoda a kas iti kinapudnok; ket naisaok ida kadakayo. Saluadanyo a di ipakita iti asino man a tao, agingga a bilinenkayo, malaksid kadakuada a mamati. Amen.)