Hōho’a 2
nā mua a’e i muri iho


E Hōho’a nō roto mai i te Buka a Aberahama

Nūmera 2

Hōho’a

Ha’amāramaramara’a

Hōho’a 1. ’O Koloba teie, e tāpa’o ïa nō te ao mātāmua i hāmanihia, te mea piri roa a’e i te ao tiretiera, ’oia ho’i te vāhi pārahira’a o te Atua. ’O te mātāmua ïa nō ni’a i te fa’aterera’a, ’e ’o te hope’a ïa nō ni’a i te fāitora’a i te taime. Te fāitora’a i reira mai te au ïa i te taime tiretiera, ’e te taime tiretiera ’ua fa’a’itehia ïa hō’ē mahana nā roto i te kubiti hō’ē. Hō’ē mahana i Koloba hō’ē ïa tauatini matahiti i ni’a i teie fenua, ’o tei parauhia e tō ’Aiphiti ’o Tiha-o-e.

Hōho’a 2. Tei pīha’i iho teie i Koloba, ’o tei parauhia e tō ’Aiphiti, ’o Olibiliti, ’e ’o te piti ïa o te ao rahi fa’atere, tāpiri i te ao tiretiera, ’oia ho’i te vāhi fa’aeara’a o te Atua ; e tāviri mana ato’a tō taua palaneta nei i ni’a a’e i te tahi atu ā mau palaneta ; mai tei heheuhia mai e te Atua ia Aberahama, ’a pūpū atu ai ’oia i te tusia i ni’a i te hō’ē fata tāna i hāmani i te Fatu.

Hōho’a 3. E fa’aaura’a teie i te Atua, ’o tē pārahi ra i ni’a iho i tōna terōno, ’e tei fa’a’ahuhia i te mana ’e te ha’amanara’a ; ma te korona nō te māramarama mure ’ore i ni’a i tōna upo’o ; e fa’aaura’a ato’a ïa i te mau Parau-Tāviri rahi nō te Autahu’ara’a Mo’a, mai tei heheuhia ia Adamu i roto i te ’Ō i Edene, ’e ’oia ato’a ia Seta, Noa, Melehizedeka, Aberahama, ’e ia rātou pā’āto’a ’o tei heheuhia ia rātou te Autahu’ara’a.

Hōho’a 4. E au te reira i te parau Hebera ’o Raukiana, ’e te aura’a ’o te hō’ē ārea rahi ïa, ’oia ho’i te reva o te mau ra’i ; ’oia ato’a e tāpa’o ’Aiphiti nō te nūmera hō’ē tauatini, e fa’aaura’a i te fāitora’a taime nō Olibiliti, ’o tei ’aifāito i Koloba i roto i tōna ’ohura’a ’e tōna fāitora’a taime.

Hōho’a 5. ’Ua parauhia ïa nā roto i te reo ’Aiphiti, Enisi-go-ana-dati ; ’o te hō’ē ato’a ïa palaneta fa’atere, ’e ’ua parauhia e tō ’Aiphiti ’o te Rā, ’e tē fāri’i nei ’oia i tōna māramarama nō ’ō mai ia Koloba, nā roto ia Kae-’ē-vanarati, te Tāviri rahi, ’oia ho’i, te mana fa’atere, ’o tē fa’atere nei i te mau palaneta ’e ’aore rā i te mau feti’a hō’ē ’ahuru ’e ma pae ’o tē vai tāmau noa, mai ia Foloisi ato’a, ’oia ho’i te Marama, te Fenua nei ’e te Rā, i roto i tō rātou ’ohura’a i te mau matahiti ato’a. Tē fāri’i nei teie palaneta i tōna mana nā roto ia Kili-folasi-isi-esa, ’oia ho’i Ha-ko-kau-bema, ’o te mau feti’a ïa i fa’a’itehia i roto i nā hōho’a 22 ’e te 23, ’o tē fāri’i i te māramarama nā roto i te mau ’ohura’a o Koloba.

Hōho’a 6. E fa’aaura’a teie i te fenua nei ’e tōna nā tufa’a e maha.

Hōho’a 7. E fa’aaura’a teie i te Atua e pārahi ra i ni’a iho i tōna terōno, ma te heheu mai nā roto i te mau ra’i i te mau Parau-Taviri rahi nō te Autahu’ara’a ; ’e, ’oia ato’a, te tāpa’o ïa ia Aberahama nō te Vārua Maita’i, mai te hōho’a o te ’ū’upa ra.

Hōho’a 8. E mau pāpa’ira’a teie ’o tē ’ore e ti’a ’ia fa’a’itehia i tō te ao nei ; ’āre’a rā e nehenehe te reira ’ia ’itehia i roto i te hiero mo’a o te Atua.

Hōho’a 9. E ’ere i te mea ti’a ’ia fa’a’itehia mai teie i teie nei taime.

Hōho’a 10. ’O teie ato’a.

Hōho’a 11. ’O teie ato’a. Mai te mea rā e manuia tō te ao nei i te tātarara’a i teie mau nūmera, nā reira ïa. ’Āmene.

Hōho’a 12, 13, 14, 15, 16, 17, 18, 19, 20 ’e 21, e fa’a’itehia te aura’a o teie mau tufa’a i te tau i ha’apa’ohia e te Fatu.

’Ua hōro’ahia mai teie tātarara’a i ni’a nei mai te au i tei fa’ati’ahia mai i teie nei taime.