Aberahama 5
nā mua a’e i muri iho


Pene 5

’Ua oti tā te mau Atua fa’anahora’a nō te hāmanira’a i te mau mea ato’a—’Ua fa’aoti rātou i te Hāmanira’a mai te au i tā rātou mau ’ōpuara’a—’Ua ma’iri Adamu i te i’oa o te mau mea ora ato’a.

1 ’E nō reira e fa’aoti ïa tātou i te mau ra’i ’e te fenua, ’e te mau mea ato’a i roto ra.

2 ’E ’ua paraparau ihora te mau Atua i rotopū ia rātou iho : ’E i te hitu o te taime e fa’aoti tātou i te ’ohipa, ’o tā tātou i ’ōpua ; ’e e fa’afa’aea tātou i te hitu o te taime i tā tātou ato’a ra mau ’ohipa ’o tā tātou i ’ōpua ra.

3 ’E ’ua fa’aoti ihora te mau Atua i te hitu o te taime, nō te mea i te hitu o te taime rātou e fa’afa’aea ai i tā rātou ato’a ra mau ’ohipa ’o tā rātou (te mau Atua) i ’ōpua i rotopū ia rātou iho ’ia hāmani ; ’e ’ua ha’amo’a ihora i te reira. ’E mai te reira iho ā tā rātou mau fa’aotira’a i te taime rātou i ’āparau ai i rotopū ia rātou iho nō te hāmani i te mau ra’i ’e te fenua.

4 ’E ’ua pou mai ra te mau Atua i raro ’e ’ua hāmani i teie mau u’i o te mau ra’i ’e te fenua, i tō rātou hāmanira’ahia i te mahana i hāmani ai te mau Atua i te fenua ’e te mau ra’i,

5 Mai te au i te mau mea ato’a tā rātou i parau nō ni’a i te mau rā’au ato’a o te ’āua hou te reira i vai ai i ni’a i te fenua nei, ’e te mau rā’au ri’i ato’a o te fenua nei hou te reira i tupu ai ; ’aita ho’i te mau Atua i ha’ama’iri mai i te ua i ni’a i te fenua ’a ’āparau ai rātou nō te rave i te reira, ’e ’aita ato’a i hāmani i te hō’ē ta’ata nō te fa’a’apu i te fenua.

6 ’Ua pe’e atu ra rā te māhu i ni’a nō te fenua mai, ’e ’ua fa’ararirari ihora i te fenua tā’āto’a.

7 ’E ’ua hāmani ihora te mau Atua i te ta’ata i te repo fenua, ’e ’ua rave i tōna vārua (’oia ho’i, tō te ta’ata vārua), ’e ’ua tu’u atu ra i roto iāna ; ’e ’ua puhipuhi atu ra i te aho ora i roto i tōna ra ’āpo’o ihu, e riro a’era te ta’ata ’ei vārua ta’ata ora.

8 ’E ’ua tanu ihora te mau Atua i te hō’ē ’ō, i te pae i te hiti’a o te rā i Edene ra, ’e ’ua tu’u ihora rātou i te ta’ata i reira, nōna te vārua tā rātou i tu’u i roto i te tino tā rātou i hāmani ra.

9 ’E ’ua fa’atupu te mau Atua i te mau tumu rā’au maitata’i ato’a mai roto mai i te repo ’o tei au ’ia hi’ohia ’e te maita’i ho’i ’ei mā’a ; ’e te tumu rā’au nō te ora ato’a i rōpū i taua ’ō ra, ’e te tumu rā’au nō te ’ite i te maita’i ’e te ’ino.

10 ’E tē vai ra te hō’ē ’ānāvai pape e tahe ra mai roto mai i Edene, nō te fa’ararirari i te ’ō, ’e mai reira mai te ma’ara’a mai e riro atu ra e maha ’ānāvai pape rarahi.

11 ’E ’ua rave ihora te mau Atua i te ta’ata, ’e ’ua tu’u atu ra iāna i roto i te ’Ŏ i Edene ra, nō te fa’a’apu ’e nō te tīa’i i te reira.

12 ’E ’ua fa’aue ihora te mau Atua i te ta’ata, nā ’ō atu ra : E ’amu noa ’oe i tō te mau tumu rā’au ato’a o te ’ō nei,

13 ’Āre’a rā i tō te tumu rā’au nō te ’ite i te maita’i ’e te ’ino, ’eiaha ’oe e ’amu i te reira ; nō te mea i te taime e ’amu ai ’oe i te reira, e pohe ïa ’oe. I teienei, ’ua ’ite au, ’o Aberahama, mai te au ho’i te reira i te taime o te Fatu ra, ’oia ho’i, mai te au ïa i te taime o Koloba ; ’aore ā ho’i te mau Atua i fa’ata’a ia Adamu tāna tai’ora’a i te taime.

14 ’E ’ua parau ihora te mau Atua : E hāmani tātou i te tauturu au nō te ta’ata, e ’ere ho’i i te mea maita’i ’ia pārahi noa te ta’ata ’o ’oia ana’e ra ; nō reira, e hāmani tātou i te tahi tauturu au nōna.

15 ’E ’ua ha’ama’iri ihora te mau Atua i te vare’a ta’oto rahi i ni’a ia Adamu ; ’e ’ua ta’oto ihora ’oia, ’e ’ua rave ihora rātou i te hō’ē ivi ’ao’ao nōna, ’e ’ua tā’ati ihora i te ’i’o i taua vāhi ra ;

16 ’E taua ivi ’ao’ao tā te mau Atua i rave mai i te ta’ata ra, ’ua hāmani ihora rātou i te vahine, ’e ’ua arata’i mai ra iāna i te ta’ata ra.

17 ’E ’ua nā ’ō ihora Adamu : E ivi teie nō tō’u nei ivi, e ’i’o ho’i nō tō’u nei ’i’o ; i teienei e parauhia ’oia e Vahine, nō te mea nō roto mai ’oia i te ta’ata i te noa’ara’a mai ;

18 Nō reira e fa’aru’e ai te ta’ata i tōna metua tāne ’e tōna metua vahine, ’a ’ati atu ai i tāna vahine, ’e e riro ho’i rāua ’ei hō’ē.

19 ’E ’ua vai taha’a noa rāua, te tāne ’e te vahine, ’e ’aita i ha’amā.

20 ’E mai roto mai i te repo fenua ’ua hāmani ihora te mau Atua i te mau ’ānimara ’āvae maha ato’a o te ’āua, ’e te mau manu ato’a o te reva, ’e ’ua arata’i mai ra ia rātou ia Adamu ra ’ia ’itea tāna i’oa e ma’iri i ni’a ia rātou, ’e tā Adamu i’oa e ma’iri i te mau mea ora ato’a ra, ’o te reira ïa tō rātou i’oa.

21 ’E ’ua ma’iri atu ra Adamu i te i’oa o te mau ’ānimara rata ’āvae maha ato’a ra, ’e tō te mau manu ato’a o te reva, ’e tō te mau ’ānimara ’āvae maha ato’a o te ’āua ; ’e nō Adamu, ’ua ’itea mai te hō’ē tauturu au nōna ra.