JST, Chiv Keeb 9:4–6. Piv rau Chiv Keeb 8:20–22
Tom qab Dej Nyab Thoob Ntiaj Teb, Nau-as thov tus Tswv kom tsis txhob foom tsis zoo rau lub ntiaj teb ntxiv lawm.
4 Thiab Nau-as teeb tau ib lub thaj rau tus Tswv, thiab muab tej tsiaj huv, thiab tej noog huv, ib yam ib tug coj los muab hlawv fij saum lub thaj ntawd; thiab nws ua tus Tswv tsaug, thiab xyiv fab nyob hauv nws lub siab.
5 Thiab tus Tswv hais lus rau Nau-as, thiab tus Tswv foom koob hmoov rau nws. Thiab Nau-as hnov tej pa tsw qab, thiab nws hais nyob hauv nws lub siab;
6 Kuv yuav hu txog tus Tswv lub npe, kom nws tsis txhob foom tsis zoo rau cov av ib zaug ntxiv vim yog tib neeg, vim neeg yeej ib txwm xav phem hauv lawv lub siab thaum yau los; thiab kom nws tsis txhob muab txhua yam uas muaj sia nplawm ntxiv, ib yam li nws tau ua los no, thaum lub ntiaj teb tseem muaj nyob;
JST, Chiv Keeb 9:10–15. Piv rau Chiv Keeb 9:4–9
Tib neeg lav ris kev tua neeg thiab kev tua tsiaj txhu nkim pov tseg. Vajtswv khi lus nrog Nau-as thiab nws cov tub ib yam li Nws tau khi nrog Enauj.
10 Tiam sis, cov ntshav ntawm txhua yam tsiaj uas kuv tau muab rau nej ua nqaij noj, yeej yuav ua kom ntshav nrog rau hauv av, qhov uas txo nws txoj sia, thiab cov ntshav los nej yuav tsum tsis txhob noj.
11 Thiab tseeb tiag, yuav tsum tsis txhob tua tsiaj kom los ntshav, tsuas yog tua ua nqaij noj, los cawm nej txoj sia xwb; thiab cov ntshav ntawm txhua tus tsiaj kuv yuav kom nej ris.
12 Thiab yog leej twg tua neeg, nws yuav raug neeg muab tua; vim neeg yuav tsum tsis txhob tua neeg.
13 Vim kuv muab ib lo lus txib, hais tias txhua tus neeg tus kwv tij yuav tsum muab tib neeg txoj sia tshwj tseg, vim kuv tau tsim neeg muaj tus yam ntxwv zoo li kuv.
14 Thiab kuv muab ib lo lus txib rau nej, Nej cia li muaj tub muaj ki thiab huaj vam; ua kom muaj coob coob nyob hauv lub ntiaj teb, thiab huaj vam nyob rau haud.
15 Thiab Vajtswv hais lus rau Nau-as, thiab rau nws cov tub uas nrog nws, hais tias, Thiab kuv, saib seb, kuv yuav cog kuv txoj kev khi lus nrog nej, qhov uas kuv tau khi nrog nej yawg koob Enauj, ntsig txog nej cov tub ki tom qab nej.
JST, Chiv Keeb 9:21–25. Piv rau Chiv Keeb 9:16–17
Vajtswv tau ua tus duab zaj sawv saum ntuj ua kom neeg nco txog Nws txoj kev khi lus rau Enauj thiab rau Nau-as. Nyob rau hauv hnub nyoog kawg cov neeg sib txoos hauv tus Tub Hlob lub Koom Txoos yuav los koom cov neeg ncaj ncees nyob hauv ntiaj teb.
21 Thiab yuav muaj tus duab zaj sawv nyob saum cov huab; thiab kuv yuav ntsia zaj sawv, kom kuv yuav nco txog txoj kev khi lus uas kav ib txhis, uas kuv tau khi nrog nej yawg koob Enauj; hais tias, thaum tib neeg ua raws li tag nrho kuv tej lus txib, Xi-oos yuav rov qab los rau hauv lub ntiaj teb, Enauj lub nroog uas kuv tau coj mus rau kuv tus kheej.
22 Thiab qhov no yog kuv txoj kev khi lus uas kav ib txhis, hais tias thaum nej cov xeeb leej xeeb ntxwv yuav txais yuav qhov tseeb, thiab ntsia lawm saum ntuj, thaum ntawd Xi-oos yuav ntsia saum ntuj los, thiab tag nrho lub ntuj yuav co nrog kev zoo siab, thiab lub ntiaj teb yuav tshee hnyo nrog kev xyiv fab;
23 Thiab cov neeg sib txoos hauv tus tub hlob lub koom txoos yuav tawm saum ntuj ceeb tsheej nqis los, thiab tau lub ntiaj teb ua lawv li, thiab yuav muaj chaw nyob kom txog qhov kawg. Thiab qhov no yog kuv txoj kev khi lus uas kav ib txhis, uas kuv tau khi nrog nej yawg koob Enauj.
24 Thiab yuav muaj tus duab zaj sawv nyob saum cov huab, thiab kuv yuav tsa kuv txoj kev khi lus nrog nej, uas kuv tau khi nyob ntawm kuv thiab nej, rau txhua txhia yam muaj cev nqaij daim tawv uas yuav nyob rau hauv lub ntiaj teb.
25 Thiab Vajtswv tau hais rau Nau-as tias, Qhov no yog lub cim ntawm txoj kev khi lus uas kuv tau tsa nyob ntawm kuv thiab nej; rau txhua tus neeg uas yuav nyob hauv lub ntiaj teb.