Tej Nqe Xaiv Los ntawm Joseph Smith Kev Txhais phau Npaivnpaum

Tej yam nram qab no yog tej uas tau xaiv los ntawm Joseph Smith txoj kev muab phau Npaivnpaum King James Version txhais (JST). Tus Tswv tau tshoov tus Yaj Saub Joseph Smith lub siab kom muab tej kev tseeb, uas tau ploj lawm los yog muab hloov lawm txij thaum tau muab cov tseem lus ntawd sau tseg, txum tim rov qab rau hauv phau Npaivnpaum King James. Tej kev tseeb uas tau muab txum tim rov qab los no yuav ua rau tej lus qhuab qhia meej pem thiab to taub vaj lug kub zoo dua tuaj.

Vim tus Tswv tau ua tshwm sim los rau Joseph Smith tej yam kev tseeb uas cov tseem kws sau thaum ub tau muab teev cia, Joseph Smith Kev Txhais Lus tsis zoo li lwm tej kev txhais phau Npaivnpaum nyob hauv ntiaj teb. Yog li no, lo lus kev txhais lus yog siv dav zog thiab txawv ntawm lo lus uas niaj hnub siv, vim Joseph txoj kev txhais lus yog kev tshwm sim ntau dua li cia li txhais raws kiag cov ntawv ntawm ib yam lus mus rau lwm yam lus.

Ob peb tshooj nyob hauv phau Lus Qhuab Qhia thiab Kev Khi Lus muaj feem los sis hais txog Joseph Smith txoj kev txhais phau Npaivnpaum King James (saib tshooj 37, 45, 73, 76, 77, 86, 91, thiab 132). Tsis tas li ntawd, phau Mauxes thiab Joseph Smith—Mathais yog tej uas tau los ntawm Joseph Smith Kev Txhais Lus.

Yog xav paub kev qhia ntxiv ntsig txog Joseph Smith Kev Txhais Lus, saib “Joseph Smith Kev Txhais Lus (JST)” nyob hauv Phau Qhia txog Vaj Lug Kub.

Cov lus qhia nram qab no qhia txog ib qho piv txwv uas tau xaiv los ntawm Joseph Smith Kev Txhais Lus:

JST, Mathais 4:1, 5–6, 8–9. Piv rau Mathais 4:1, 5–6, 8–9; tau hloov ib yam rau Lukas 4:2, 5–11

Tus Ntsuj Plig coj Yexus, tsis yog Dab Ntxwg Nyoog coj.

1 Tom qab ntawd tus Ntsuj Plig coj Yexus mus rau tom roob moj sab qhua, mus nyob nrog Vajtswv.

5 Tom qab ntawd tus Ntsuj Plig coj Yexus mus rau hauv lub nroog dawb huv, thiab tus Ntsuj Plig coj nws mus rau saum lub tuam tsev qhov chaw uas siab tshaj plaws.

6 Tom qab ntawd tus dab phem los cuag nws thiab hais tias, Yog koj yog Vajtswv Leej Tub tiag, koj cia li dhia rau hauv av, rau qhov twb tau sau tseg lawm hais tias, Vajtswv yuav kom nws cov tim tswv tsom kwm koj, thiab lawv ob txhais tes yuav txhawb nqa koj, tsam koj ob txhais ko taw mus tsoo pob zeb.

8 Thiab ntxiv, Yexus muaj tus Ntsuj Plig, thiab tus Ntsuj Plig coj nws mus rau saum ib lub roob siab siab, thiab ua rau nws pom tag nrho tej teb chaws hauv ntiaj teb thiab tej ntawd lub yeeb koob.

9 Thiab tus dab phem rov qab los cuag nws dua, thiab hais tias, Kuv yuav muab txhua yam no rau koj, yog koj pe thiab teev tiam kuv.

Nqe vaj lug kub dub dub yog cov lus ntawm Joseph Smith kev txhais phau Npaivnpaum King James. Vim nws txoj kev txhais lus muab tej lus txum tim rov qab los rau hauv phau Npaivnpaum, tej zaum tus zauv ntawm tej nqe yuav txawv ntawm phau uas koj siv.

Nqe lus no qhia nqe lus nyob hauv koj phau Npaivnpaum uas koj yuav tsum muab piv rau Joseph Smith kev txhais lus.

Zaj lus no piav saib Joseph Smith tau qhia txog tej lus qhuab qhia twg kom meej pem los ntawm nws txoj kev txhais lus.

Cov no yog cov lus uas Joseph Smith tau muab txhais (Cov ntawv qaij yog lub cim txog tej yam uas txawv ntawm Joseph Smith Kev Txhais Lus thiab phau King James Version.)