3 Nej yuav tsum paub qhov no ua ntej, hais tias nyob hauv hnub nyoog kawg yuav muaj cov neeg thuam los, uas coj raws li lawv tus kheej lub siab ntshaw.

4 Xyeej tus Tswv Yexus Khetos, thiab hais tias, Kev cog lus tias nws yuav los yuav muaj thaum twg? vim thaum cov yawg koob twb tsaug zog lawm, txhua yam yuav tsum mus zoo li muaj tam sim no, thiab tau mus zoo li muaj tam sim no txij thaum chiv keeb ntuj tsim teb raug los.

5 Vim lawv txaus siab tsis paub txog qhov no, hais tias puag thaum ub tau tsim lub ntuj, thiab lub ntiaj teb nyob hauv dej thiab tshwm hauv dej los, yog tsim los ntawm Vajtswv txoj lus;

6 Thiab los ntawm Vajtswv txoj lus, lub ntiaj teb thaum ntawd, uas muaj dej nyab thoob plaws, raug piam sij;

7 Tiam sis lub ntuj, thiab lub ntiaj teb tam sim no, los tib txoj lus ntawd muab ceev cia, raug muab tshwj tseg rau hluav taws npaj rau hnub uas txiav txim thiab puas tsuaj ntawm cov neeg uas tsis mloog Vajtswv lus.

8 Tiam sis hais txog tus Tswv txoj kev los, cov uas kuv hlub, kuv tsis xav kom nej tsis paub txog qhov no, hais tias rau tus Tswv ces ib hnub zoo li ib txhiab xyoos, thiab ib txhiab xyoo zoo li ib hnub.

9 Tsis yog tus Tswv tsis quav ntsej txog nws txoj kev cog lus thiab txoj kev los, raws li ib txhia neeg xav; tiam sis nws ua siab ntev rau peb, tsis xav kom ib tug piam sij li, tiam sis xav kom txhua tus los hloov siab lees txim.

10 Tiam sis tus Tswv hnub yuav los zoo li ib tug tub sab thaum hmo ntuj, hnub ntawd lub ntuj yuav co nto thiab lub ntiaj teb los kuj yuav tshee hnyo, thiab tej roob yuav yaj mus, thiab ploj mus nrog ib lub suab nrov nrov, thiab tej huab cua yuav muaj kev kub heev puv tag nrho; lub ntiaj teb los kuj yuav puv tag nrho, thiab tes hauj lwm uas txawj lwj uas nyob haud yuav raug muab hlawv.

11 Yog tias tag nrho txhua yam no yuav raug puas tsuaj, nej yuav tsum ua neeg zoo li cas raws li kev coj dawb huv thiab kev coj zoo li Vajtswv,

12 Saib rau, thiab npaj rau hnub uas tus Tswv yuav los thaum uas tej yam txawj lwj ntawm lub ntuj uas raug muab hlawv, yuav yaj mus, thiab tej roob yuav ploj mus vim kub heev?

13 Txawm li ntawd los, yog peb yuav nyiaj mus, tus Tswv yuav ceev peb cia raws li nws cog lus. Thiab peb nrhiav ib lub ntuj tshiab, thiab ib lub ntiaj teb tshiab uas muaj kev ncaj ncees nyob rau haud.