5 Thiab nim no, koj ob tug tub, Efala-is thiab Manaxes, uas tau yug los rau koj nyob hauv teb chaws Iyiv, ua ntej kuv los cuag koj nyob hauv Iyiv; saib seb, nkawd yog kuv li, thiab kuv cov yawg koob tus Vajtswv yuav foom koob hmoov rau nkawd; nkawd yuav tau koob hmoov ib yam li Lunpees thiab Xime-oos nkawd, vim nkawd yog kuv li; yog li ntawd yuav hu nkawd raws li kuv lub npe. (Yog li ntawd thiaj hu nkawd ua Ixayees.)

6 Thiab koj cov me nyuam uas koj muaj tom qab nkawd, yuav yog koj li, thiab yuav muab hu raws li nkawd ob tug tij laug lub npe hauv nkawd qub txeeg qub teg, nyob hauv tej xeem neeg; yog li ntawd thiaj hu lawv ua xeem Manaxes thiab xeem Efala-is.

7 Thiab Yakhauj hais rau Yauxej tias, Thaum kuv cov yawg koob tus Vajtswv tshwm sim los rau kuv nyob hauv lub nroog Luxes, hauv teb chaws Kana-as; nws tau cog lus rau kuv tias, nws yuav muab thaj av rau kuv, thiab rau kuv cov tub ki ua lawv tug kav ib txhis.

8 Yog li ntawd, auj kuv tus tub, Vajtswv tau foom koob hmoov rau kuv ntawm kev tu koj hlob los ua ib tug tub qhe rau kuv, los cawm kuv tsev neeg ntawm txoj kev tuag;

9 Ntawm kev cawm kuv cov neeg dim, koj cov kwv tij, los ntawm kev tshaib kev nqhis uas hnyav heev hauv thaj av; yog li ntawd koj cov yawg koob tus Vajtswv yuav foom koob hmoov rau koj, thiab koj cov tub ki, kom lawv yuav tau koob hmoov tshaj koj cov kwv tij tej, thiab tshaj koj txiv tsev neeg li;

10 Vim koj tau kov yeej, thiab koj txiv tsev neeg tau txhos caug pe koj, ib yam li tau ua rau koj pom, ua ntej koj cov tij laug muab koj muag mus rau hauv Iyiv; yog li ntawd koj cov tij laug yuav txhos caug pe koj, ntawm ib tiam neeg mus rau ib tiam, mus rau koj cov tub ki mus ib txhis;

11 Vim koj yuav yog ib lub teeb rau kuv cov neeg, los cawm lawv dim nyob rau lub sij hawm lawv poob cev qhev, ntawm kev ua qhev; thiab coj kev cawm seej los rau lawv, thaum kev txhaum ua rau lawv khoov hlo.