JST, Chiv Keeb 17:3–12. Piv rau Chiv Keeb 17:3–12
Tib neeg tsis ua raws li txoj moo zoo tej kab ke, xws li kev cai raus dej. Vajtswv piav rau Anplaham txog txoj kev khi lus ntawm kev cai txiav thiab me nyuam yaus lub hnub nyoog paub tab.
3 Thiab tau muaj tias, Anplas txawm txhos caug ntua nyo hau ua ntsej muag ti nkaus av, thiab hu txog tus Tswv lub npe.
4 Thiab Vajtswv hais lus rau nws tias, Kuv cov neeg tau khiav ntawm kuv tej lus qhuab qhia, thiab tsis tau ua raws li kuv tej kab ke, uas kuv muab rau lawv cov yawg koob;
5 Thiab lawv tsis tau coj raws li kuv txoj kev pleev roj, thiab txoj kev faus, los yog kev cai raus dej uas kuv txib lawv;
6 Tiam sis tau tig mus deb ntawm lo lus txib, thiab lawv tus kheej cia li mus muab tej me nyuam yaus ntxuav, thiab kev muab ntshav nchos rau;
7 Thiab tau hais tias tau muab Anpees tus uas ncaj ncees cov ntshav nrog theej rau kev txhaum; thiab tsis tau paub hais tias los ntawm tej ntawd lawv yuav lav ris nyob ntawm kuv xub ntiag.
8 Tiam sis hais txog koj, saib seb, kuv yuav ua kuv txoj kev khi lus nrog koj, thiab koj yuav ua ib leej txiv rau ntau haiv neeg.
9 Thiab kuv ua txoj kev khi lus no, kom yuav muaj koj cov me nyuam nyob hauv txhua haiv neeg. Koj lub npe yuav tsis hu ua Anplas ntxiv lawm, tiam sis yuav hu koj lub npe ua Anplaham; rau qhov kuv tau tsa koj ua ib leej txiv rau ntau haiv neeg.
10 Thiab kuv yuav ua kom koj huaj vam coob heev, thiab kuv yuav ua ntau haiv neeg los ntawm koj los, thiab yuav muaj vaj ntxwv los ntawm koj los, thiab los ntawm koj cov tub ki los.
11 Thiab kuv yuav tsa ib txoj kev khi lus ntawm kev cai txiav nrog koj, thiab qhov ntawd yuav yog kuv txoj kev khi lus rau ntawm kuv thiab ntawm koj; thiab koj cov tub ki tom qab koj, nyob hauv lawv tiam neeg; kom koj yuav paub mus ib txhis hais tias me nyuam yaus tsis muaj kev lav ris ntawm kuv txog thaum lawv muaj yim xyoo tso.
12 Thiab koj yuav tsum mob siab ua raws li tag nrho kuv tej kev khi lus uas kuv tau khi lus nrog koj cov yawg koob; thiab koj yuav tsum ua raws li tej lus txib uas kuv tau muab rau koj los ntawm kuv tus kheej lub qhov ncauj, thiab kuv yuav ua ib tug Vajtswv rau koj thiab rau koj cov tub ki tom qab koj.
JST, Chiv Keeb 17:23–24. Piv rau Chiv Keeb 17:17–18
Anplaham xyiv fab thaum qhia tias yuav muaj Ixaj thaum yav tom ntej thiab thov Vajtswv pab Ixama-ees.
23 Thaum ntawd Anplaham txawm txhos caug ntua nyo hau ua ntsej muag ti nkaus av thiab xyiv fab, thiab xav nyob rau hauv nws lub siab tias, Yuav muaj ib tug me nyuam yug los rau tus uas twb muaj ib puas xyoo lawm, thiab Xalas tus uas twb muaj cuaj caum xyoo lawm yuav yug.
24 Thiab Anplaham hais rau Vajtswv hais tias, Auj kheev lam Ixama-ees ua neej ncaj ncees rau koj pom!