24 Thiab Yauxej hais rau nws cov kwv tij tias, kuv yuav tuag, thiab yuav mus cuag kuv cov yawg koob; thiab kuv yuav mus hauv kuv lub qhov ntxa nrog kev xyiv fab. Kuv txiv Yakhauj tus Vajtswv nrog nej nyob, kom tso nej dim ntawm tej kev txom nyem hauv lub sij hawm nej ua cev qhev; vim tus Tswv tau los xyuas kuv, thiab kuv tau txais ib lo lus cog tseg los ntawm tus Tswv, hais tias, los ntawm kuv cov tub ki, tus Tswv uas yog Vajtswv yuav tsa ib ceg ncaj ncees los ntawm kuv cov tub ki los; thiab tsa los rau nej, cov uas kuv txiv Yakhauj tau muab hu ua Ixayees, ib tug yaj saub, (tsis yog tus Mexiyas ua hu ua Silaus;) thiab tus yaj saub no yuav tso kuv cov neeg dim tawm hauv Iyiv thaum lub sij hawm nej ua cev qhev.

25 Thiab yuav muaj tias lawv yuav tawg khiav ri niab dua; thiab ib ceg yuav ntshua mus; thiab yuav nqa lawv mus rau puag tim ib lub teb chaws deb; txawm li ntawd los yuav nco ntsoov lawv nyob hauv tus Tswv txoj kev khi lus, thaum tus Mexiyas los; vim nws yuav tshwm sim mus rau lawv nyob hauv hnub nyoog kawg, nrog tus Ntsuj Plig muaj hwj chim; thiab yuav coj lawv tawm hauv qhov tsaus ntuj los mus rau qhov kaj; tawm hauv qhov tsaus ntuj uas nraim, thiab tawm hauv kev poob cev qhev mus rau kev ywj pheej.

26 Tus Tswv uas yog kuv tus Vajtswv yuav tsa ib tug uas pom tau, yuav yog ib tug pom tau uas tseem ceeb heev los rau koj cov tub ki.

27 Kuv cov yawg koob tus Tswv uas yog Vajtswv hais li no rau kuv, Ib tug pom tau uas tseem ceeb heev yuav sawv tawm hauv koj cov tub ki los; thiab nws yuav yog ib tug uas koj cov tub ki yuav saib rau nqi heev. Thiab kuv yuav muab ib lo lus txib rau nws xwv kom nws yuav ua tau ib txoj hauj lwm pub rau koj cov tub ki, nws cov kwv tij.

28 Thiab nws yuav coj lawv los paub txog tej kev khi lus uas kuv twb tau khi nrog koj cov yawg koob lawm; thiab nws yuav ua txhua txoj hauj lwm uas kuv yuav txib nws.

29 Thiab kuv yuav ua kom nws muaj hwj chim rau kuv pom, vim nws yuav ua kuv txoj hauj lwm; thiab nws yuav muaj hwj chim zoo li tus uas kuv tau hais tias kuv yuav tsa los rau nej, los tso kuv cov neeg dim, auj tsev neeg Ixayees, tawm hauv lub teb chaws Iyiv mus; vim kuv yuav tsa ib tug pom tau sawv los tso kuv cov neeg tawm hauv teb chaws Iyiv mus; thiab nws yuav hu ua Mauxes. Thiab los ntawm lub npe no nws yuav paub hais tias nws yog ib tug ntawm koj tsev neeg; vim tus vaj ntxwv tus ntxhais yuav tu yug nws, thiab yuav hu nws ua tus tub.

30 Thiab ntxiv, kuv yuav tsa ib tug pom tau sawv tawm hauv koj cov tub ki los; thiab kuv yuav muab hwj chim rau nws los qhuab qhia kuv tej lus rau koj cov xeeb leej xeeb ntxwv; thiab tus Tswv hais tias, tsis yog yuav los qhuab qhia kuv tej lus xwb, tiam sis yuav los yaum kom lawv ntseeg kuv tej lus, tej uas twb xub tau muab rau lawv lawm nyob hauv hnub nyoog kawg;

31 Yog li ntawd koj cov tub ki yuav sau ntawv, thiab Yudas cov tub ki los yuav sau ntawv; thiab zaj uas koj cov tub ki yuav sau, thiab zaj uas Yudas cov tub ki yuav sau, yuav loj hlob ua ib ke los rhuav tej lus qhia uas tsis tseeb thiab los txo tej kev sib cav sib ceg tseg, thiab los tsim kev nyob kaj siab lug pub rau koj cov tub ki, thiab los coj lawv kom los paub txog lawv cov yawg koob nyob hauv hnub nyoog kawg; thiab kom los paub txog kuv tej kev khi lus thiab, tus Tswv hais li ntawd.

32 Thiab los ntawm kev qaug zog yuav ua rau nws muaj zog, nyob rau hnub uas kuv txoj hauj lwm yuav tawm mus rau tag nrho kuv cov neeg, uas yuav rov qab txum tim lawv, cov uas yog ntawm tsev neeg Ixayees, nyob hauv hnub nyoog kawg.

33 Thiab kuv yuav foom koob hmoov rau tus pom tau ntawd, thiab lawv cov uas nrhiav kev ua kom nws puas tsuaj yuav raug puas tsuas tas huv tib si; vim kuv muab txoj kev cog lus no rau nej; vim kuv yuav nco ntsoov nej ntawm ib tiam neeg mus rau ib tiam neeg; thiab nws lub npe yuav hu ua Yauxej, thiab yuav hu nws raws nws txiv lub npe; thiab nws yuav zoo tib yam li koj; vim yam uas tus Tswv yuav ua tawm ntawm nws txhais tes los yuav coj tau kuv cov neeg los mus rau txoj kev cawm seej.

34 Thiab tus Tswv cog lus rau Yauxej tias nws yuav muab nws cov tub ki tshwj tseg mus ib txhis, hais tias, Kuv yuav tsa Mauxes, thiab tus pas nrig yuav nyob hauv nws txhais tes, thiab nws yuav sau kuv cov neeg los ua ke, thiab nws yuav coj lawv zoo li ib pab yaj, thiab nws yuav xuas nws tus pas nrig ntaus cov dej ntawm tus Dej Hiav Txwv Liab.

35 Thiab nws yuav txiav txim, thiab yuav muab tus Tswv txoj lus sau cia. Thiab nws yuav tsis hais lus ntau, vim kuv yuav sau kuv tej kev cai rau nws los ntawm kuv tus kheej tus ntiv tes. Thiab kuv yuav muab ib tug cev lus rau nws, thiab nws lub npe yuav hu ua Aloos.

36 Thiab yeej yuav muaj li no rau koj nyob hauv hnub nyoog kawg thiab, ib yam li kuv tau cog lus. Yog li ntawd, Yauxej thiaj hais rau nws cov tij laug tias, Vajtswv yeej yuav los xyuas nej, thiab coj nej tawm hauv lub teb chaws no, mus rau lub teb chaws uas nws tau cog lus rau Anplaham, thiab rau Ixaj, thiab rau Yakhauj.

37 Thiab Yauxej hais meej txog ntau yam rau nws cov tij laug, thiab cog lus nrog cov neeg Ixayees, hais rau lawv tias, Vajtswv yeej yuav los xyuas nej, thiab nej yuav tsum nqa kuv tej pob txha tawm ntawm no mus.

38 Ces Yauxej tuag thaum nws muaj ib puas thiab kaum xyoo; thiab lawv muab tshuaj pleev nws, thiab lawv muab nws tso rau hauv ib lub hleb hauv Iyiv; thiab cov neeg Ixayees tsis muab nws lub cev faus, kom tau nqa nws lub cev mus tso rau hauv lub qhov ntxa nrog nws txiv. Thiab lawv nco ntsoov txoj kev lav lus uas lawv cog lus rau nws li no.