25 Thiab Mekhixedes tsa nws lub suab thiab foom koob hmoov rau Anplas.

26 Nim no Mekhixedes yog ib tug neeg muaj kev ntseeg, uas ua tej yam ncaj ncees; thiab thaum nws yog ib tug me nyuam yaus nws hwm Vajtswv, thiab kaw tej tsov ntxhuav lub qhov ncauj, thiab tua tej hluav taws uas tsiv.

27 Thiab vim li ntawd, vim Vajtswv pom zoo, thiaj tau muab nws tsa ua ib tug pov thawj hlob raws li tus txheej txheem ntawm txoj kev khi lus uas Vajtswv tau khi nrog Enauj,

28 Tus txheej txheem ntawd yog raws li tus txheej txheem ntawm Vajtswv Leej Tub; tus txheej txheem uas tsis yog los ntawm tib neeg, los sis ntawm tib neeg lub siab nyiam; thiab tsis yog los ntawm txiv los yog niam; thiab tsis yog los ntawm hnub pib los yog xyoo kawg; tiam sis yog los ntawm Vajtswv;

29 Thiab tau muab lub pov thawj hwj rau tib neeg los ntawm nws tus kheej lub suab hu, raws li nws lub siab nyiam, mus rau tag nrho cov uas ntseeg nws lub npe.

30 Vim Vajtswv tau cog lus rau Enauj thiab rau nws cov tub ki nrog ib txoj kev lav lus los ntawm nws tus kheej; hais tias txhua tus uas muab tsa raws li tus txheej txheem thiab txoj kev hu no tsim nyog muaj hwj chim, los ntawm kev ntseeg, kom txav tau roob, cais tau dej hiav txwv, ua tau kom cov dej qhuav, ua tau kom khiav tawm ntawm lawv tus kwj mus;

31 Thaiv tau tej pab tub rog ntawm tej haiv neeg, ua tau ntiaj teb faib, ua tau txhua txoj hluas plam, sawv tau ntawm Vajtswv xub ntiag; ua tau txhua yam raws li nws lub siab nyiam, raws li nws lo lus txib, kav tau tej nom tswv thiab tej muaj hwj chim; thiab qhov no yog los ntawm Vajtswv Leej Tub lub siab nyiam uas tau muaj ua ntej ntuj tsim teb raug.

32 Thiab cov txiv neej muaj txoj kev ntseeg no, uas tau los rau Vajtswv tus txheej txheem no, Vajtswv tau muab lawv plhis thiab coj mus dua saum ntuj ceeb tsheej lawm.

33 Thiab nim no, Mekhixedes yog ib tug pov thawj ntawm tus txheej txheem no; yog li ntawd nws muab tau kev thaj yeeb nyob hauv Xalees, thiab hu ua tus Tub Vaj Ntxwv ntawm txoj kev thaj yeeb.

34 Thiab nws cov neeg ua neej ncaj ncees, thiab txais tau lub ntuj ceeb tsheej, thiab tau nrhiav Enauj lub nroog uas Vajtswv tau xub coj mus lawm, cais lub nroog ntawd tawm ntawm lub ntiaj teb, tau tshwj lub nroog ntawd tseg txog thaum hnub nyoog kawg, los yog thaum ntiaj teb kawg;

35 Thiab tau hais, thiab cog lus nrog ib txoj kev lav lus, hais tias lub ntuj ceeb tsheej thiab lub ntiaj teb yuav los ua ke; thiab yuav muab Vajtswv cov tub sim siab ib yam li no los ntawm hluav taws.

36 Thiab tus Mekhixedes no, vim nws tau tsa kev ncaj ncees, nws cov neeg thiaj hu nws ua tus vaj ntxwv ceeb tsheej, los yog hais tias, tus Vaj Ntxwv ntawm txoj kev thaj yeeb.

37 Thiab nws tsa nws lub suab, thiab nws foom koob hmoov rau Anplas, vim nws yog tus pov thawj hlob, thiab tus ceev Vajtswv lub tsev rau khoom;

38 Nws yog tus uas Vajtswv tau tsa mus sau ib feem kaum pub rau cov neeg pluag.

39 Yog li ntawd, Anplas them ib feem kaum rau Mekhixedes los ntawm txhua yam nws muaj, ntawm txhua yam kev nplua nuj nws tau, uas Vajtswv tau muab rau nws ntau tshaj qhov nws xav tau.

40 Thiab tau muaj tias, Vajtswv foom koob hmoov rau Anplas, thiab pub kev nplua nuj rau nws, thiab lub sam xeeb, thiab tej av rau nws muaj kav ib txhis; raws li txoj kev khi lus uas nws tau khi, thiab raws li txoj koob hmoov uas Mekhixedes tau foom rau nws.