1 Ngehi Sihnep, sang ni ei kasukuhlkidahr lokaiahn Mehn Nihpai kan, oh ni ei wehwehkier duwen sahpw en Nihpai, de sahpw me aht pahpa kahlap ako tepin sapwasapw ie, oh sang ni ei pekederla rehn Mehn Leimen kan, nin duwen lipahrok men, pwe I en kak lipahroke neirail karis kan, pwe nait sounpei kan en kak kaloweiraildi oh kamwomwirailla—ahpw ni ahnsou me I kilangada soahng kan me mwahu rehrail I sohte mwahuki irail en kamakamala.

2 Eri, ngehi oh iengei ohl ako ahpw akamaikihda nan sahpwtehno, pwehki I men aht kaun en pwihn en wiahda inou en miniminiongirail; ahpw pwehki eh wia ohl keptakai oh mwahuki kam aramas, e ahpw ruwese me I en kamakamala; ahpw I mourla oh pitkihla kakerehdien nta laud; pwe pahpa kan peipene, oh pwutak kan peipene, lao pali laud en nait sounpei kan kamakamala nan sapwtehno; oh kiht akan me mourla ahpw pwuralahng nan sahpw en Saraemla, oh ehukihong arail pwoud kan oh neirail seri kan soai me re wiahdao.

3 Ahpw, pwehki ei loalenohng sohsohki sahpw en atail pahpa kahlap ako, I ahpw kihpene koaros me inengieng kohdahla sapwasapw nan sahpwo, oh se ahpw pwurehng tepida seiloak nan sapwtehno pwe se en kak kohdahla nan sahpwo; ahpw se lelohng nan apwal laud oh lokolok; pwehki at kin seukautihong taman Kauno at Koht.

4 Ahpw, mwurin rahn tohto ni aht wie kakahngseli nan sapwtehno, se ahpw kauwada imwat impwal kan ni wasa me iangat ohl akan kamakamala ie, me kerenlahngete sahpw en aht pahpa kahlap ako.

5 Kedekedeo I ahpw pwurehng pwurala nan kahnihmwo iangahki nei ohl pahmen, eri, se patohlongala rehn nanmwarkio, pwe I en kak esehda kupwur en nanmwarkio, oh pwe I en kak ese ma I kak patohla iangahki nei aramas akan oh sapwankihla sahpwo ni meleilei.

6 Oh I patohlongala rehn nanmwarkio, oh e ketin inoukihong ie me I kak sapwasapw nan sahpw en Lihai-Nihpai oh nan sahpw en Sailom.

7 Oh e pil mahsanihong sapwellime aramas akan re en pidohi sang nan sahpwo, oh ngehi oh nei aramas akan patohla nan sahpwo pwe se en kak sapwanikihla.

8 Oh se ahpw tepida kawada ihmw kan, oh onehda sapahl kehl en kahnihmwo, iei, kehl en kahnihmw en Lihai-Nihpai, oh kahnihmw en Sailom.

9 Oh se tepida deipwelihada sahpwo, ei, se padokedi soangsoangen weren tuhke, weren kohn, oh wihd, oh parli, oh iangahki nehas, oh iangahki seum, oh iangahki soangsoangen weren wahn tuhke kan; oh se tepida kaparaparala oh pweida nan sahpwo.

10 Ahpw met iei widing oh koasoandi mwersuwed en nanmwarki Leimen, en kaliduwihala nei aramas akan, ihme e mweidkihong kiht se en sapwanikihla sahpwo.

11 Eri kedekedeo, mwurin aht koukousoankier nan sahpwo erein sounpar eisek riau, nanmwarki Leimen perkidahr nei aramas akan arail pahn kehlailla nan sahpwo, oh irail pahn solahr kak kalohweiraildi oh kaliduwihirailla.

12 Pwe irail aramas pohnkahke kei oh kin mwahuki pwongih dikadik en eni; pwe re men se en wiahla neirail lidu, pwe irail en kak kepwehpwehkihla wahn aht doadoahk kan oh pwe irail en kak kamakamadipwki uduk en nait pelinmen akan en aht mohs kan.

13 Eri kedekedeo nanmwarki Leimen tepida kamwakidada sapwellime aramas akan pwe irail en uhwong oh pelianda nei aramas akan; eri mahwin oh pingiping ahpw tepida wiawi nan sahpwo.

14 Pwe, nan pahr ke-eisek siluh en ei kakaun sahpw en Nihpai, ni palieir en sahpw en Sailom, ahnsou me nei aramas akan wie kanikanimpile oh kamwekamwenge neirail pelin mahn akan, oh deideipwelih sahpwarailo, karis kalaimwun en Mehn Leimen kan kohdo mahweniong irail oh tepida kemeirailla, oh neirail pelinmen kan, oh kohn en arail mwaht akan ahpw pehdsang irail.

15 Ei, oh kedekedeo irail koaros me sohte lohdi ahpw sopolahng nan kahnihmw en Nihpai, oh peki rehi I en doareirailla.

16 Kedekedeo I ahpw kihong irail kesik ketieu kan, oh arep kan, iangahki kedlahs kan, oh naipokos kan, oh mehn wowoki kan, oh pahi kan, oh iangahki soangsoangen dipwisoun mahwen me se kak wiahda, oh ngehi oh nei aramas akan kohla mahweniong Mehn Leimen kan.

17 Ei, sang ni roson en Kauno se ahpw mahwinkihong Mehn Leimen ko; pwe ngehi oh nei aramas akan pekipeki ni ngidingid ong Kauno pwe en doareikitasang at imwintihti kan, pwe se pirkidahr aht tamanda kasaledeklahn aht pahpa kahlap ako.

18 Oh Koht ahpw ketin karonge aht pekipek kan oh ketin sapeng aht kapakap kan; oh se wonlahte mwowe ni sapwellime roson lapalap; ei, se kolahng peiong Mehn Leimen kan, oh ni rahnteieu oh pwohng ehute se kemehla aramas silikid pehk silimen; se kemekemeirailla lao se pwakihirailieisang nan sapwato.

19 Oh pein ngehi iang sarepedi arail mehla kan. Oh kilang, se inenen nsensuwed mehlel oh mwahmwahieiki kamakamalahn riat me riepwiki isiakan duwemen.