Pwuhk Sarawih kan
Mosaia 16


Iralaud 16

Koht ketin doarehla aramas akan sang arail mour salongala oh mour pwupwula—Irail akan me mouriki mour en sampah pahn duduwehte oh sohte pahn poadoandoarla—Krais me ketin kahrehda iasadahng mour kohkohlahte de lekdekla kohkohlahte. Ele Sounpar 148 Mwohn Krais.

1 Oh met, kedekedeo mwurinte Apinadai eh koasoiahier mahsen pwukat e ahpw kapahwei peh oh patohwan: Ahnsouo pahn leledo me koaros pahn kilang sapwellimen Kauno manaman en komour; ahnsou me wehi koaros, keinek koaros, lokaia koaros, oh sahpw koaros pahn kilangki masarail Koht oh wehkada me sapwellime kadeik me pwung.

2 Oh me suwed kan pahn lekdekla liki, oh irail pahn weriwerki ar nsensuwed, oh sengiseng, oh mwahiei, oh ngihrail kan tehtehrek; oh met pwehki irail sohte men rong kepitien Kauno; eri Kauno sohte pahn doareirailla.

3 Pwehki irail kisehn sampah oh kisehn tepil, oh tepilo ahneki manaman pohrail; iei, serpent en kawao me pitihedi tepin atail nohno oh pahpao, me kahrehda ara pwupwudi; me kahrehda aramas koaros momourki mour en sampah, ineng en paliwar, re kisehn tepil, esehla me suwed sang me mwahu, oh mweidehng pein irail pahn manaman en tepilo.

4 Kahreda aramas koaros salongalahr; oh kilang, irail uhdahn pahn salongala douluhl ma Koht sohte doarehla sapwellime aramas akan sang nan arail mour salongala oh mour pwupwula.

5 Ahpw tamataman, mehmen me pahn wonlahte mwowe nan eh mour en sampah, oh uselahte nan eh wiewia dihp oh kahngohdiong Koht, e pahn mihmihte nan ah mour pwupwulao oh tepilo ahneki manaman koaros powe. Eri e pahn duwehte me sohte poadoandoarla wiawihong ih, oh e wia imwintihti ong Koht; oh pil duwehte tepilo me imwintihti ong Koht.

6 Oh met ma Krais sohte ketido sampah, a [I] koasokoasoia soahng kan me pahn wiawi ni mwomwen me re wiawiher, poadoandoarla sohte pahn mie.

7 Oh ma Krais sohte iasada sang mehla, de kamweidpeseng selin mehla pwe sousou en dehr powehdi, oh sohte en mehla tehtehn meninkau, eri sohte me pahn kak iasada.

8 Ahpw mie iasada, eri sousou sohte kak powehdi, oh Krais powehdier tehtehn meninkau en mehla.

9 Iei ih me marain oh ih me mour en sampah; ei, kamarain poatopoat, me sohte kak rotala; ei, oh pil mour poatopoat, me sohte pahn kak pwurehng mehla.

10 Iei mour en sampah me pahn kieweklahng mour me sohte kak mehla, oh me kin mwerpeseng pahn kieweklahng me sohte kak mwerepeseng, oh aramas pahn kesihnen mwohn mwoalen kopwung en Koht, pwe en pakadeingkihda arail wiewia kan ma e mwahu de e suwed—

11 Ma re mwahu, re pahn iasadahng mour kohkohlahte oh peren kohkohlahte; oh ma re suwed, re pahn iasadahng mour lekdekla kohkohlahte, kohlahng rehn tepilo, me me kakaun irail, me iei lekdekla—

12 Irail idawehnlahr pein nsenarail kan nan mour oh ineng en sampah; irail sohte kin men likweri Kauno ni ahnsou me sapwellime kalahngan en nin lime kan kin kapahdo rehrail; pwe kalahngan en nin lime kan kapkapahieng irail, ahpw irail sohte men alehda; kaparpen diparail akan kohieng irail, ahpw irail sohte men uhdihsang; oh e koasoanediong irail en koluhla ahpw re sohte men kapwaiada.

13 Eri, kumwail soh pahn anahne masapwekada oh koluhkihla dipamwail akan, oh tamataman me ihte rehn Krais oh sang Krais me kumwail pahn kak komourkihla?

14 Eri, ma kumwail pahn padahngki kosonned en Moses, kumwail pil padahngki me e wia kamwomwada ehu en mehkan me uhdahn pahn wiawi—

15 Padahkiong irail me komour kin pwilisang rehn Kauno Krais, me iei Sahm Soutuko. Ahmen.