1 Oh met, kedekedeo mwurin nanmwarki Mosaia, e sapwellimankier popohl erein sounpar siluh, e ahpw kupwurehda en ese duwen aramas ako me kohdalahn kousoanla nan sahpw en Lihai-Nihpai, de kahnihmw en Lihai-Nihpai; pwehki sapwellime aramas akan saikinte rongasang irail sangete mwurin arail mweselsang nan sahpw en Saraemla; eri, sapwellime aramas akan katoutouwihalahr nan kupwure pwehki ahr kin kalapw patohwan kalelapak reh duwen irail.

2 Kedekedeo nanmwarki Mosaia ahpw pilada neirail ohl kehlail meh ehk wenemen re en kohdahla nan sahpw en Lihai-Nihpai, pwe re en diarada duwen rierailko.

3 Kedekedeo mandahn rahno irail ahpw mwesel kohdahla, emen irail adaniki Amon, me wia ohl kehlail oh komwad men, oh e wia kadaudok en Saraemla; oh ih me pil kaun arail pwihno.

4 Oh met, irail sohte ese ahl me irail pahn keidla ie nan sapwtehno pwe re en leldalahng nan sahpw en Lihai-Nihpai; eri erein rahn tohto irail kokohseli nan sapwtehno, iei rahn pahisek me irail wie kokohseli.

5 Oh mwurin arail kokohkiseli erein rahn pahisek irail ahpw lel pohn dohl ehu, me mihte paliepeng en sahpw en Sailom, oh irail ahpw kauwada imwarail impwal kan wasao.

6 Oh Amon kahrehda rie ohl silimen, oh adarail akan iei Amalekai, Ilem, oh Em, oh irail ahpw kohdihla nan sahpw en Nihpai.

7 Oh kilang, irail tuhwongidi nanmwarki en aramas akan me kin kousoan nan sahpw en Nihpai, oh nan sahpw en Sailom; oh sapwellimen nanmwarkio soun silasil kan kol iraildier, oh irail wisiksangehr, oh pirapirdier, oh selidi nan imweteng.

8 Kedekedeo ahnsou me irail mihmihkier nan imweteng rahn riau, re ahpw pwurehng wisikdohng mwohn nanmwarkio, oh sahl akan me pireirailpenehr ahpw sapwadekdahr; irail ahpw uh mwohn nanmwarkio, oh mweimweiongehr, de nanmwarki mahsanihong irail en sapeng kalelapak kan me e pahn ketin keinemwe rehrail.

9 E ahpw mahsanihong irail: Kilang, Ngehi iei Limahi, nein Noha pwutak, me wia nein Sihnep, me kohdahdosang nan sahpw en Saraemla pwe en kak sapwankihla sahpwet, me wia sahpw en arail pahpa kahlap ako, me wiahla nanmwarki sang ni pilipil en aramas pwukat.

10 Oh met, I men ese dahme kahrehda kumwail nohn kommwadki en keido limwahn kehl en aht kahnihmw, ni ahnsou me ngehi oh silepei kan wie patpatoseli maslikin kehlo?

11 Oh met, ih kahrepen ei mweidehng kumwail en mourla, pwe I en kak kalelapak rehmwail, pwe ma soh I ndahiongehr silepei ko re en kemeikumwaila. Kumwail mweimweiongehr koasoi.

12 Oh met, ni ahnsou me Amon kilangadahr me e mweimweiohngehr pato, e patohla oh poaridi mwohn nanmwarkio; oh patohda oh patohwan: Maing nanmwarki, I inenen kapingkihong Koht rahnwet pwehki ei momourte, oh ei mweimweidahr I en pato; oh I pahn song pato ni eimah;

13 Pwe I kamehlele ma komwi mwahngih ie komw sohte pahn mweidohng I en pirapirkihdi sahl pwukat. Pwe ngehi iei Amon, oh ngehi emen kadaudok en Saraemla, oh I patohdahdo sang nan sahpw en Saraemla pwe se en kak diarada duwen riat akan, me Sihnep kahluwa sang nan sahpwo.

14 Oh met, kedekedeo mwurin Limahi e karongehier en Amon koasoi kan, e uhdahn perenda, oh ketihtihki: Met, I esehier ni mehlel me riei kan me mihmi nan sahpw en Saraemla wie momourte. Oh met, I pahn pereperen; oh lakapw I pahn kupwurehda nei aramas akan re en pil iang pereperen.

15 Pwe kilang, se wialahr lidu kei pahn Mehn Leimen kan, oh kin wie pwapwain uwen daksis me udahn kansensuwed mehlel. Oh met, kilang, riatail ohl akat pahn kapitkitailla sang nan mour en kalidu, de sang nan pehn Mehn Leimen kan, oh kitail pahn wiahla neirail lidu; pwe e pahn mwahu ma kitail liduhla rehn Mehn Nihpai kan sang atail pahn wia nohpwei ong nanmwarki en Mehn Leimen kan.

16 Oh met, nanmwarki Limahi padahkihong sapwellime sounpei kan me re pahn sapwadada Amon oh rie ko, ahpw e ketin kupwurehda irail en kohla ni dohl me mih paliepeng en Sailom, oh kahrehdo iengarail ohl akan nan kahnihmwo, pwe irail en kak mwenge, oh nimpil, oh komoal sang doadoahk en arail seiloako; pwe irail lokolongkier soahng tohto; irail lokolongki ahr men mwenge, ahr men nimpil, oh ahr pwangadahr.

17 Oh met, kedekedeo mandahn rahno nanmwarki Limahi ahpw kadarpeseng pakair ehu ong sapwellime aramas koaros, irail en pokonpene ni tehnpas sarawio, pwe irail en karonge dahme e pahn ketin mahsanihong irail.

18 Kedekedeo ahnsou me irail pokonpenehr e ahpw mahsanihong irail, ketihtihki: Kumwail, nei aramas akan, kumwail sarada oh ahneki koapwoaroapwoar; pwe kilang, ahnsowo leledohr, de e sohte pahn pwand ni ahnsou me kitail sohla pahn mih pahn manaman en atail imwintihti kan, mendahte lokolok laud me kitail ahnekier, me sohte katepe; ahpw I kamehlele me miehte doadoahk apwal me kitail anahne wia.

19 Eri, kumwail sarada, oh perenda, oh kumwail koapwoaroapwoarki Koht, iei Koht en Eipraam, oh Aisek, oh Seikop; oh pil, Kohto me ketin kahluwa Mehn Israel kan sang nan Isip, oh ketin kupwurehda irail en kotehla Sehd Weitahtao pohn ngalangal, oh kamwengehkin irail mana pwe irail en dehr mehla nan sahpwtehno; oh pil soahng tohto me e ketin wia ong irail.

20 Oh pil, Kohtohte me ketin kahluwa atail pahpa kahlap ako sang nan sahpw en Serusalem, oh ketin kolokol oh doandoare sapwellime aramas akan lao lel rahnwet; oh kilang, met iei pwehki atail wiewia suwed kan oh tiahk suwed kan me kahrehda e ketin mweidohng kitail en mihla pahn apwal en mour en lidu.

21 Oh kumwail koaros wiahier sounkadehde rahnwet, me Sihnep, me wiahla nanmwarki en aramas pwukat, pwehki e nohn loalenohng sohsohki sahpw en eh pahpa kahlap ako, kahrehda e lohdi pahn widing oh mwersuwed en nanmwarki Leimen, me wiahda inou ehu ong nanmwarki Sihnep, oh mweidohng en sapwanikihla wasa kei nan sahpwe, de iei kahnihmw en Lihai-Nihpai, oh kahnihmw en Sailom; iangahki sahpw me kapilpene—

22 Oh e ketin wia mepwukat koaros pwe aramas pwukat en mihla pahn sapwellime manaman de mihla pahn mour en lidu. Oh kilang, ahnsou wet se kin nohpweikihong nanmwarki en Mehn Leimen kan, ni uwen elep en aht kohn, oh aht parli, oh pil iangahki aht wahn soangsoangen werentuhke kan koaros, elep en tohtohlahn nait pelinmen kan; nanmwarki en Mehn Leimen kan pil kin pehdsang kiht elep en mehkoaros me se ahneki, de aht mour kan.

23 Oh kilang, met sou udahn kansensuwed mehlel? Oh kaidehn mehkot laud ieu met, atail kahpwal kan? Met kilang, ia uwen atail ahneki kahrepe laud en mwahiei.

24 Ei, I ndahiong kumwail, me lapalahn kahrepe kei me kitail en sengisengki; pwe kilang riatail depehier me kamakamalahr, oh kakerehdi en ntarail kan wiawi mwahl, oh mepwukat wiawi pwehki wiewia suwed.

25 Pwe ma aramas pwukat sohte pwupwidi nan arail sapwung Kauno sohte pahn mweidohng suwed laud wet en wiawihong irail. Ahpw kilang, irail sohte men rong sapwellime mahsen kan; pingiping ahpw wiawi nanpwungerail, iei uwen laud irail kakerehdi nta nanpwungarail.

26 Oh irail kemehla soukohp en Kauno men; ei, ohl en Koht pilipilda men, me patohwanohng irail duwen arail wiewia suwed oh tiak suwed kan, oh kohpadahr soahng tohto me pahn kohdo, ei, iei pil ketidohn Krais.

27 Oh pwehki e patohwanohng irail me Krais iei Koht, Sahm en soahng koaros, oh patohwan me e pahn ketin pwaredo ni mwohmw en aramas, oh e pahn mih ni mwohmw en aramas me kepikipikda nin tapio; me pil wehwehki, e patohwan me aramas wiawihda rasehng Koht, oh me Koht pahn ketidihdo rehn aramas akan, oh ketin alehda paliwar uduk oh nta, oh ketket pohn sampah—

28 Oh met, pwehki e patohwanohng irail mepwukat, irail kemehla ohlo; oh soahng tohto me irail wiahda me kahredahr engieng en Koht lellohng irail. Eri, e soh sansal kahrepen arail mihla nan mour apwal en kalidu, oh kin wie lokolongki kahpwal laud akan?

29 Pwe kilang, Kauno ketin mahsanih: I sohte pahn sewese nei aramas akan ahnsou me irail wiewia suwed; ahpw I pahn kerempwa irail pwe irail en dehr pweida; oh arail wiewia kan pahn duwehte takain dipekelekel mwohrail.

30 Oh e pil ketin mahsanih: Ma nei aramas akan pahn wiewia me suwed irail pahn dolung wahn melimelo; oh kasuwedpe kan me pwoisin.

31 Oh e pil mahsanih: Ma nei aramas akan pahn wiewia me suwed irail pahn dolung kisinieng en palimese, me kin mwadangete kamwomwala wasa.

32 Oh met, kitail kilangehr, sapwellimen Kauno inou pweidahr, oh kumwail lelohng nan apwal oh lokolok.

33 Ahpw ma kumwail pahn sohpeiong Kauno sang ni mohngiong unsek, oh koapwoaroapwoarki ih, oh papah ih sang ni loaloapwoat mehlel, ma kumwail pahn wia met, e pahn ketin kapitkumwailsang nan mour en lidu nin duwen kupwure.