1 Kedekedeo sapwellimen nanmwarkio sounpei ko pwurodo, ni arail raparapahki ahpw sohte kak diar sapwellimen Kauno aramas akan.

2 Oh met kilang, sapwellimen nanmwarkio sounpei kan malaulaulahr, oh aramas me luhwehdi ko ahpw tohrohrpeseng oh uhpene nanpwungarail.

3 Oh ekei irail ahpw tepida kamasak nanmwarkio, oh pingiping laud tepida mie nanpwungarail.

4 Oh met mie ohl emen rehrail me adaniki Kidion, oh e wia ohl kehlail men oh imwintihti ong nanmwarkio, eri e ahpw usada nah kedlahso, oh kahukihla ni eh lingeringer me e pahn kemehla nanmwarkio.

5 Kedekedeo e ahpw peieng nanmwarkio; oh ni ahnsou me nanmwarkio mwahngiadahr me ohlo pahn kalowehdi ih, e ahpw ketin tangasang oh ketidahla pohn wasahn iroir ehu me karanih tehnpas sarawio.

6 Oh Kidion pwakih oh pahn doudalahng pohn wasahn iroiro pwe en kemehla nanmwarkio, a nanmwarkio ahpw mahsenlahng ni sahpw en Semlon, oh mahsaniada sounpei en Leimen kan mihmiher ni irepen sahpwo.

7 Eri met nanmwarkio ahpw ketin werikihla sang ni eh masepwehk, mahmahsanih: Kidion, komw dehr kemeiehla, pwe Mehn Leimen kan kohkohdohng kitail, oh irail pahn kamwomwkitailla; ei, irail pahn kamwomwala nei aramas akan.

8 Ahpw met nanmwarkio sohte mwahn katapaniki sapwellime aramas akan ihte pein eh mour; ahpw, Kidion mweidohng en mourla.

9 Oh nanmwarkio ahpw poahngok aramas akan re en tangasang Mehn Leimen kan, oh pein ih ketiketla mwohrail, oh irail sopohla tangalahng nan sapwtehno, iangahki arail pwoud kan oh neirail seri kan.

10 Kedekedeo Mehn Leimen kan pwakih irail, oh koliraildi oh tepida kemeirailla.

11 Kedekedeo nanmwarkio ahpw mahsanih me ohl koaros pahn pwilikihdi arail pwoud kan oh neirail seri kan, oh sopohsang Mehn Leimen kan.

12 Ahpw tohto me sohte men kohkohsang irail, ahpw irail itariki mihmi oh iang irail mehla. Oh luhwe ko koaros tangasang arail pwoud kan oh neirail seri kan oh tangdoui.

13 Kedekedeo irail akan me mihmihte rehn arail pwoud kan oh neirail seri kan ilakihala neirail serepein masamwahu kan en kesihnen mwohn Mehn Leimen kan oh peki ni ngidingid re en dehr kemeirailla.

14 Kedekedeo Mehn Leimen kan ahpw poakeirailla, pwehki arail lelikihda lingan en neirail serepein kan.

15 Eri Mehn Leimen kan sohte kemeirailla, oh koliraildi oh kapwureirailla nan sahpw en Nihpai, oh mweidohng irail en sapwasapw nan sahpwo, ma re pahn wahdo nanmwarki Noha nan pehn Mehn Leimen kan, oh kihong irail arail dipwisou kan, iei elep en soahng koaros me irail ahneki, elep en neirail kohl, oh silper, oh neirail dipwisou kesempwal akan koaros, oh irail pahn kin nohpweiong nanmwarki en Mehn Leimen kan nan ehu ehu pahr.

16 Oh met mie emen sapwellimen nanmwarkio pwutak me iang irail kolkoldi, me adaniki Limahi.

17 Oh met Limahi sohte men eh pahpa en kamakamala; ahpw, Limahi wehwehki wiewia suwed me eh pahpa wia, pwe pein ih e wia aramas mwahu men.

18 Kedekedeo Kidion kadarala ohl ekei nan sapwtehno ni rir, pwe irail en rapahki nanmwarkio oh irail ako me iang ih. Kedekedeo irail diar aramas oko koaros nan sapwtehno, ihte me soh, nanmwarkio oh sapwellime samworo ko.

19 Met irail inoukidahr nan ahr mohngiong kan, ma re pahn pwurala nan sahpw en Nihpai, oh ma arail pwoud kan oh neirail seri kan kamakamalahr, oh pil irail akan me mihmihte rehrail, irail pahn dupuk, oh pil iang irail mehla.

20 Oh nanmwarkio ahpw mahsanih me irail sohte mwahn pahn pwurala; oh irail lingeringer pahn nanmwarkio, oh koasoanehdi me e pahn kalokolok, iei e pahn kamakamkihla kisiniei.

21 Oh irail ahpwtehn pahn ale samworo ko oh kemeiraila, ahpw irail tangehrdoui.

22 Kedekedeo irail ahpwtehn pahn pwurala nan sahpw en Nihpai, oh irail tuhwong nein Kidion ohl oko. Oh nein Kidion ohl oko ndahiong irail soahng koaros me wiawihong arail pwoud kan oh neirail seri kan; oh me Mehn Leimen kan kamanahiong irail en mihmi nan sahpwo sang ni arail pahn kin nohpweiki elep en soahng koaros me irail ahneki ong Mehn Leimen kan.

23 Oh aramas oko ahpw ndahiong nein Kidion ohl oko me irail kemelahr nanmwarkio, oh sapwellime samworo ko tangasang irail kokohla nan sapwtehno.

24 Kedekedeo mwurin arail kaimwisekala tuhpeneo, irail pwuralahng nan sahpw en Nihpai, pereperen, pwehki arail pwoud kan oh neirail seri kan ahr sohte kamakamala; oh irail ndahiong Kidion dahme irail wiahiong nanmwarkio.

25 Kedekedeo nanmwarki en Mehn Leimen kan ahpw kahukihong irail, me sapwellime aramas akan sohte pahn kemeirailla.

26 Oh pil Limahi, pwehki eh wia sapwellimen nanmwarki pwutak, e alehdier manaman en kaunda wehio sang aramas akan, oh kahukihong nanmwarki en Mehn Leimen kan me sapwellime aramas akan pahn kin nohpweiong, iei elep en soahng koaros me irail tungoaleniki.

27 Kedekedeo Limahi ahpw ketin koasoanehdi wehio oh popohl rehn sapwellime aramas akan.

28 Oh nanmwarki en Mehn Leimen kan ahpw ketin koasoanehdi sounsilasil kan en kapilkipene sahpwo, pwe en ketin koledi sapwellimen Limahi aramas akan nan sahpwo, pwe irail en dehr kohkohla nan sapwtehno; oh epwelpen sapwellime sounsilasil kan kin kohsang ni nohpwei me e kin ale sang Mehn Nihpai kan.

29 Oh met nanmwarki Limahi ahpw ahneki popohl nan sapwellime wehio erein sounpar riau, me Mehn Leimen kan sohte peiong irail de song en kemeirailla.