1 Met kedekedeo mwurin sapwellimen Mosaia pwutak ko ar wiahier mepwukat koaros, irail kahrehda ekei oh pwurala rehn samarail nanmwarkio, oh peki reh ma e kak kamanahieng irail, iangahki me re pilada kan, en kak kohdahla nan sahpw en Nihpai pwe re en kak kalohki soahng kan me re rongehr, oh pwe re en kak padahkihong riarail Mehn Leimen kan, mahsen en Koht—

2 Pwe re en kak wahlahng irail marain en Kauno arail Koht, oh kawekirailla duwen dipen arail pahpa ko; oh ele mwein re pahn kak kamwahuiala arail kin kailongki Mehn Nihpai kan, pwe irail en pil kak iang pereperenki Kauno arail Koht, pwe re en kak kadekpene nanpwungarail, oh pwe en kak sohla mie pingiping nan sahpwo me Kauno arail Koht ketikihong irail.

3 Met irail inangih me padahk en komourla pahn kalohkohng aramas koaros, pwe irail sohte kak medewehiong mweidala ngenen aramas emen en mehla; iei, medemedewe me ngehn emen pahn wie lokolongki kalokolok kohkohlahte kahrehda arail mwekidida oh rerada.

4 Iei met me Ngehn en Kauno kapehmihkin irail, pwe irail wia uhdahn aramas dipan ekei. Oh Kauno sang ni sapwellime kupwurkalahngan poatopoat e ketin mwahngih me e konehng doareirailla; ahpw irail lokolongki pwunod kowahlap pwehki diparail kan, lokolok laud oh masak pwe irail de lekdekla kohkohlahte.

5 Kedekedeo irail ahpw pekipeki rehn arail pahpa erein rahn ekei pwe irail en kak kohdahla nan sahpw en Nihpai.

6 Oh nanmwarki Mosaia ahpw ketla oh peki rehn Kauno ma e pahn konehng en mweidohng sapwellime pwutak kan en kohdahla rehn Mehn Leimen kan oh kalohki mahseno.

7 Oh Kauno ahpw ketin mahsanihong Mosaia: Mweidohng irail en kohdahla, pwe tohto me pahn kamehlele arail padahk kan, oh irail pahn alehdi mour soutuk; oh I pahn doarehsang noumw pwutak kan sang pahn manaman en Mehn Leimen kan.

8 Kedekedeo Mosaia ahpw kapwaiong nsenarail en kohla oh wia nin duwen dahme irail peki.

9 Oh irail ahpw doula nan arail seiloak kohla nan sapwtehno pwe re en kohdala kalohki mahseno rehn Mehn Leimen kan; oh I pahn wiahda poadoapen arail wiewia kan mwurin met.

10 Eri met solahr me nanmwarki Mosaia pahn ketikihong manaman en kaunda wehio, pwe sohte emen sapwellime pwutak ko men ale pwukoa en kaunda wehio.

11 Eri e ale poadopoad kan me ntingdi pohn pileit en prahs kan, oh pil pileit en Nihpai kan, oh mehkoaros me e kolokol oh nekinekid nin duwen sapwellimen Koht kosonned akan, mwurin eh ketin kawehwehdi oh kupwurehda en ntingihedi poadopoad akan me ntingdi pohn pileit en kohl me sapwellimen Limai aramas akan diarada, me pein Limai wahdohng reh;

12 Oh met e ketin wia pwehki ineng laud me sapwellime aramas tungoalenki; pwe irail inangih kehlail en esehda duwen aramas akan me kamakamalahr.

13 Oh met e kawehwehdi sang ni eh doadoahngki takai riau me katengepene ni dipwisou en iroir ehu.

14 Met mepwukat kaunopdahr sangete ni tapio, oh kadakadaur kohdo sang ehu dih lel ehu dih, pwe en doadoahk ong kawehwehdi lokaia kan;

15 Oh mepwukat wie nekinek oh kadakadaur kohdo sang nin limen Kauno, pwe en kak kadierekada ong aramas koaros me pahn sapwaniki sahpwet duwen wiewia suwed oh mour suwed en sapwellime aramas akan;

16 Oh mehmen me kolokol mepwukat e kin kahdaniki ohl sarawi, nin duwen koasoandi en mahs oko.

17 Met mwurinte Mosaia e kawehwehdier poadopoad pwukat, kilang, e kasalehda soiepen aramas akan me kamwomwalahr, sang ni ahnsou me irail kamwomwala pwuralahng ahnsou me doulik lapalapo wie kokouda, ni ahnsou me Kauno ketin wekidala en aramas akan ar lokaia oh kamarakirailpeseng pohn sampah, iei, oh sang ni ahnsouo kohla lao lel ni kepikipikdahn Adam.

18 Met, poadopoad wet kahrehda sapwellimen Mosaia aramas akan ar mwahieiki mehlel, ei, irail pahtoukihla; ahpw e pil kamarainihrailda laud, me kahrehda arail peren.

19 Oh poadopoad wet pahn ntingdi mwuhr; pwe kilang, e konehng aramas koaros pahn ese duwen soahng kan me ntingdi nan poadopoad wet.

20 Oh met, nin duwen ei ndaiong kumwail, me mwurin nanmwarki Mosaia e ketin wiahier mepwukat koaros, e ale pileit en prahs kan, oh mehkoaros me e wie nekinekid, oh ketikihong Alma, me wia nein Alma; ei, poadopoad koaros, oh e pil ketkihong mehn kawehwe ko, oh kehkehlingkihong me e pahn kolokol oh nekinekid dipwisou pwukat, oh pil ntintingih poadopoad en aramas akan, oh kadakadaur sang ehu dih kohlahng ehu dih, duwehte ar kadakadaur kohdo sang ni ahnsou me Lihai mwesel sang Serusalem.