1 Kedekedeo mwurin nanmwarki Limahi, eh mahseniong sapwellime aramas akan, pwe soahng tohto me e mahsanihong irail oh ekeite me I ntingihdi nan pwuhk wet, e mahsaniong sapwellime aramas akan soahng kan koaros duwen riarail kan me mih nan sahpw en Saraemla.

2 Oh e mahsaniong Amon en patohda mwohn pokono, oh pwurehng koasoiahda soahng koaros me wiawihongehr riarail kan sang ni ahnsou me Sihnep kohdahdo sang nan sahpwo lao lel ahnsou me pein ih kohdahdo sang nan sahpwo.

3 Oh e pil pwurehng koasoiahda keimwisekalahn mahsen en nanmwarki Pensamin me e ketin mahsanihong irail, oh kawehwehiong sapwellimen nanmwarki Limahi aramas akan, pwe irail en kak wehwehki mahsen kan koaros me e ketin mahsaniher.

4 Kedekedeo mwurin eh wiahier soahng pwukat koaros, nahnmwarki Limahi ahpw ketin kadarpeseng pokono, oh mahsaniong irail en pwuralahng pein imwarail kan.

5 Kedekedeo e ahpw ketin kupwurehda me pileit kan me audaudki poadoapoad en sapwellime aramas akan sangete ni ahnsou me irail mweselsang nan sahpw en Saraemla, en wisikdo rehn Amon pwe en kak wadek.

6 Met, ni ahnsou me Amon wadekehr poadoapoado, nanmwarkio ahpw kalelapak reh ma e kak kawehwe mahsen kan, oh Amon sapengki me e sohte kak.

7 Nanmwarkio ahpw mahsanihong: Pwehki ei pahtoukihla lokolok kan me nei aramas akan mihla loale, I kadarala nei aramas pehk silimen en seiloakwei nan sapwtehno, pwe irail en kak diarada sahpw en Saraemla, pwe se en kak pekihda rehn riat akan en kohdo doareikitasang nan mour en kalidu.

8 Ahpw re salongala nan sahpwtehno erein rahn kei, ahpw re nannantihongete, oh re sohte diarada sahpw en Saraemla re ahpw pwurodo nan sahpwet, a ni arail kotehla sahpw me diren pihl, irail ahpw diarada sahpw ehu me direkihla tihn aramas, oh tihn mahn kei, oh wasao pil direkihla mohn kahnihmw kei, re diarada sahpw ehu me aramas ngeder koukousoan ie mwoweo me duwehte uwen tohtohn Mehn Israel.

9 Oh pwe en wia kadehdepen soahng kan me irail koasoia me e mehlel, irail wahdo pileit rieisek pahieu me audaudkihda nting kan, oh pileit pwukat uhdahn mehlel en kohl kei.

10 Oh kilang, irail pil wahdo mehn sansar kei, oh re me lapala, oh re wiawihda sang mete pirahs oh kapa, oh re kekehlailte.

11 Oh kilang, irail pil wahdo kedlahs kei, mangile kan ohla, oh wasa me kin keng ie kan merila; oh sohte emen nan sahpwet me kak kawehwehda lokaia de nting kan me mih pohn pileit pwukat. Eri I men idek rehmw mehkot: Ke kak kawehwe?

12 A pil ehu: Mie me ke ese me kak kawehwe? Pwe I men poadoapoad pwukat en kawehwehdi ni atail lokaia; pwe mwein ele kitail pahn uhd wehwehki duwen luhwen aramas akan me kamwomwomwlahr, wasa me poadoapoad pwukat kohsang ie; de, ele, e pahn kahrehiong kitail en wehwehki duwen aramas pwukat me kamwomwomwlahr; oh I men diarada dahme karehda arail kamwomwomwla.

13 Eri Amon ahpw ndahiong ih: Maing nanmwarki, I kak patohwanohng komwi duwen ohl emen me kak kawehwehda poadoapoad kan; pwe e sapwellimaniki dipwisou ieu me e kak kilenglongte loale oh kawehwehda poadoapoad kan koaros me sang mwein kawa; oh met iei kisakis ehu sang rehn Koht. Oh dipwisou wet kahdaniki mehn kawehwe kan, oh sohte aramas emen kak kilenglong loale ihte ma e ale mweimwei sang Koht, pwe e de pahn kilangada dahme sohte konehng oh mehkihla. Oh mehmen me kileldiong en kilenglong loale, iei aramas menet me kin adaniki ohl sarawi.

14 Oh kilang, nanmwarki en tohn Saraemla iei ih ohl me kileldiongehr en wia mepwukat, me sapwellimaniki kisakis kesempwal wet sang rehn Koht.

15 Oh nanmwarkio mahsanih me ohl sarawi men e lapalapasang soukohp men.

16 Oh Amon patohwan me ohl sarawi men iei sounkaudiahl oh pil soukohp; oh aramas sohte kak ale kisakis ehu me lapalap sang met, ihte ma e kolokol sapwellimen Koht manaman, me sohte emen kak kolokol; ahpw aramas men kak kolokol manaman laud me Koht ketkihong.

17 Ahpw ohl sarawi men kak ese duwen soahng kan en ahnsou samwalahr ako, oh pil soahng kan me pahn kohdo, oh irail kak kasalehda soahng koaros, de, soahng rir kan pahn sansalada, oh soahng kan me ekiekla pahn sansalda nan marain, oh re pahn kawehwehda soahng kan me aramas sehse, oh pil mie soahng kei me re pahn kasalehda, pwe ma soh, soahng ko sohte pahn sansal.

18 Koht kin ketin kaunopada wiepe kan me aramas, sang ni arail pwoson, re kak wiahda doadoahk kapwuriamwei kan; eri aramaso pahn doadoahk ong ni kamwahupen aramasteikan.

19 Eri, mwurin Amon koasoiahda mepwukat, nanmwarkio kupwurperenda kowahlap, oh kapingkalahngan ong Koht, mahsanih: Pwe mehlel me audepen pileit pwukat audaudiki padahk rir kesempwal ehu, oh e sansal me mehn kawehwe kan kaunopadahr pwe en kasalehda me rir kan ong aramas akan.

20 Ia uwen kapwuriamwei en sapwellimen Kauno wiewia kan, oh ia uwen werei en eh kin ketin kanekanengamahiong sapwellime aramas akan; ei, oh ia uwen maskun oh apwal en aramas akan en wehwehki; pwe irail sohte kin men rapahki marain, re pil sohte men momourki maraino me pahn kaunda nsenarail!

21 Ei, irail rasehng pelin sihpw lawalo me kin tangasang silepeo, oh mwarahkpeseng, oh kasarpeseng wasah kan, oh mahn en nanwel kan ahpw kang irailla.