1 Eri Apinadai mahsanih ong irail: I men kumwail en wehwehki me pein Koht pahn ketidihdo rehn aramas akan, oh pahn komourala sapwellime aramas akan.

2 Oh pwehki e kousoan nan paliwar en uduk e pahn kahdaniki Sapwellimen Kohto, oh pwehki e powehdi paliwar ong kupwur en Sahmo, e ketin wia Sahmo oh Sapwellimeo—

3 E wia Sahmo, pwehki e ipwikihdi manaman en Koht; oh e wia Sapwellimeo, pwehki paliwar; eri ihme e wiakilahr Sahmo oh Sapwellimeo—

4 Oh re wia Koht tehmen, iei, Sahm Soutuk en nanleng oh sampah.

5 Oh paliwar mihlahr pahn manaman en Ngehno, de Sapwellimeo ong Sahmo, me wia Koht tehmen, lokolongki kasongosong kan, oh sohte dukiong kasongosong kan, ahpw mweidohng pein ih en kamwamwahlla, oh kalokolok, oh lekdekla, oh sosoikla sang rehn kiseh kan.

6 Oh mwurin mepwukat koaros eh pahn wiawi, mwurin eh doadoahk kapwuriamwei kan rehn aramas akan, e pahn pakahrla, iei, nin duwen me Aiseia mahsanih, e pahn rasehng sihpw men me nektehn seiseisang wune kan ahpw sohte mwahn mahsanih mehkot.

7 Ei, e pahn pakahrwei, kalohpwuwala, oh kamakamala, paliwaro ahpw pahn mehla, kupwur en Sapwellimeo pahn duhla pahn kupwur en Sahmo.

8 Oh iei met me Koht pahn kamweidkipeseng selin mehla, pwehki eh ketin powehdi mehla; kahrehda Sapwellimeo eh sapwellimaniki manaman en ketin wiliandi aramas akan—

9 Oh e ketdalahr nanleng, oh e ketin sapwellimaniki kupwur kalahngan; oh e ketin sapwellimaniki limpoak ong aramas akan; oh e ketin uh nanpwungen irail oh kopwungo; oh kamweidpesengehr selin mehla, pein ih alehdahr diparail kan oh arail sapwung kan, ni eh ketin doareiraillahr, oh kapwungalahr anahn en kopwungo.

10 Oh met I pahn ndahiong kumwail, eri ihs me pahn kalohngki ih sang nan kadaudoke? Kilang, I ndahiong kumwail, me ni ahnsou me e pahn ketin meirongkihla eh mour pwehki dihp, e pahn ketin mahsanihada sapwellime kan. Oh met dahme kumwail pahn nda? Oh ihs me pahn wiahla sapwellime?

11 Kilang I ndahiong kumwail, me irail akan me rongehr mahsen en soukohp akan, ei, soukohp sarawi kan koaros me kohpadahr duwen ketidohn Kauno—I ndahiong kumwail, me irail akan koaros me rongehr irail oh kin kamehlele me Kauno pahn ketin kamourala sapwellime aramas akan, oh kin kasikasik rahno ong lapwepen diparail akan, I ndahiong kumwail, iei ih irail akan me pahn wiahla sapwellime, de irail me pahn sohsohki wein Koht.

12 Pwe iei irail pwukat me e ketin lokolongki diparail akan; iei irail pwukat me e ketin pwoukihla, pwe en kamaurirail sang arail sapwung kan. Eri, kaidehn irail me wia sapwellime kan?

13 Ei, oh kaidehn soukohp koaros me kihpesengehr ewerail kan pwehn kokohp, me sohte kin pwupwidiong nan sapwung, ei soukohp sarawi ko koaros sangete ni tepin sampah? I ndahiong kumwail, me iei irail me sapwellime kan.

14 Oh ih irail pwukat me kin kalokalohki popohl, me kin wahdo rongamwahu, me kin kalohki duwen komourla; oh ndahiong Saion: Omwi Koht me ketin kakaun!

15 Oh meid lingan oh kaselel pohn nahna kan en paten nehn irail akan!

16 Oh pil, meid lingan oh kaselel pohn nahna kan en paten nehn irail akan me kin wie kalkalohkihte popohl!

17 Oh pil, meid lingan oh kaselel pohn nahna kan en paten nehn irail akan me pahn kalohki popohl mwurin ahnsou wet, ei, sang met kohkohlahte!

18 Oh kilang, I pahn ndahiong kumwail, kaidehn ih koaros met. Meid lingan oh kaselel pohn nahna en paten nehn ih me wahdo rongamwahuo, me ketin koasoanehdi popohl, iei, Kauno, me komouralahr sapwellime aramas akan; ei, ih me ketin kamanalahr komour ong sapwellime aramas akan;

19 Pwe ma sohte poadoandoar me e ketin wiadahro ong sapwellime aramas akan, me kaunopadahr sang ni tepin sampah, I ndahiong kumwail, ma sohte koasoandi wet, aramas koaros uhdahn pahn mehla.

20 Ahpw kilang, selin mehla pahn kamweimweipeseng, oh Sapwellimeo pahn kaunda, oh e pahn sapwellimaniki manaman en powehdi mehla; eri, e ketikihda iasadahn me melahr akan.

21 A mwuri iasadao ahpw pahn wiawi, iei tepin iasada; ei, iasadahn irail akan me melahr, oh me momour met, oh me pahn ipwidi kan, lao ahnsou en iasadahn Krais—pwe ih me e pahn mwareniki.

22 Oh met, iasadahn soukohp akan koaros, oh irail akan koaros me kin kamehlele mahsen en soukohp akan, de irail akan koaros me kin kapwaiada sapwellimen Koht kosonned akan, re pahn iasada nan keieu en iasadao; iei ih irail me pahn tepin iasada.

23 Irail iasadahng kousoanla rehn Koht me ketin komourirailla; eri irail alehdi mour soutuk sang Krais, me kamweidpesengehr selin mehla.

24 Oh iei irail pwukat me pahn iang tepin iasadao; oh irail pwukat me mehlahr mwohn Krais eh ketido, nan arail sawehwe, sohte iang alehdi padahk en komourlao. Eri Kauno pahn ketin kapwureiraildo; oh irail pahn iang tepin iasadao, de alehdi mour soutuk oh komourla sang Kauno.

25 Oh kisin seri kan pahn pil iang ahneki mour soutuk.

26 Ahpw kilang, oh masak, oh lemwiki Koht, pwe uhdahn kumwail pahn rerrer; pwe Kauno sohte kin komourala me kin kahngohdiong ih oh mehla nan diparail kan; iei, irail koaros me melahr nan diparail akan sangete tepin sampah, me peliandahr Koht sang pein nsenarail, me kin ese sapwellimen Koht kosonned akan ahpw sohte men kapwaiada; ih irail pwukat me sohte pahn iang tepin iasadao.

27 Eri kumwail sou konehng wie rerrerki? Pwe komourla sohte kin kohieng soangen aramas pwukat; pwe Kauno sohte kin komourala soangen aramas pwukat; ei, de pil kamwakeleirailda; pwe e sohte kak pein likamw; pwe e sohte kak kapweiekidi repenpwung en kopwung pahrek.

28 Oh met I ndahiong kumwail me ahnsouo pahn leledo me sapwellimen Kauno komour pahn kalohkseli wasa koaros en nan wehi kan, oh keinek kan koaros, oh lokaia koaros, oh sahpw koaros.

29 Maing ei Kaun, sapwellimomwi soun silepen kahnihmwo kan pahn werkihda; ni ngihl ehu te re pahn koul; pwe irail pahn kilangki pein meserail kan ahnsou me Kauno pahn kapwurehdo Saion.

30 Ngisingiski amwail peren; oh koulkipene, wasa apwal kan en Serusalem; pwe Kauno ketin koaloalamwahwiala sapwellime aramas akan, e ketin doarehla Serusalem.

31 Kauno pahn ketin doadoahngki lime kan mwohn mesen wehi kan koaros; oh wasa koaros nin sampah pahn kadehdehda komour en atail Koht.