1 Oh met kedekedeo Sihnep ketikihongehr manaman en kaunda wehio ong Noha, emen sapwellime pwutak ko; eri Noha weliandi seme oh wiahla nanmwarki; oh e sohte kalemengih wiewiahn semeo.

2 Pwe kilang, e sohte kin kapwaiada sapwallimen Koht kosonned akan, ahpw e kin idawehn ineng en nan kapehde. Oh e pwoudki oh pekehiki lih tohto. Oh e kin kupwurehda sapwellime aramas akan en wiahda dihp, oh wia dahme suwed mwohn silangin Kauno. Ei, oh irail wiadahr tiahk kanamenek kan oh soangen mour suwed kan koaros.

3 Oh e koasoanehdi limakis ehu en daksis ong soahng koaros me irail ahneki, limakis ehu en neirail kohl oh neirail siliper, oh limakis ehu en neirail sip, oh neirail kapa, oh neirail prahs oh neirail airon; limakis ehu en neirail mahn akan; oh pil limakis ehu en arail weren tuhke koaros.

4 Oh e ale mepwukat koaros pwe en kamouriki pein ih, oh sapwellime werek kan oh pekehi kan; oh pil sapwellime samworo kan, oh arail tungoal werek kan oh pekehi kan; eri e wekidalahr koasoandi en nan wehio.

5 E kakommoalehdi samworo kan me semeo kasarawialahr, oh weliankiniraildi me kapw akan nan dewerail kan, irail akan me kin direki pohnmwahso nan kapehdirail.

6 Ei, oh re kin aliale sawas nan arail mour pohnkahke, oh nan arail pwongih dikedik en eni, oh nan arail kamwahl kan, sang ni daksis me nanmwarki Noha ketikihong sapwellime aramas akan; eri, aramas akan kin wie doadoahk mwuledek ong ni epwelpen mour suwed.

7 Ei, oh irail pil tepda pwongih dikediken eni, pwehki arail lohdiongehr pahn widing oh likamw en nanmwarkio oh samworo kan; pwe irail kin kadek koasoi ong irail.

8 Kedekedeo nanmwarki Noha ahpw kauwada ihmw tohto me kaselel oh lapala; oh e kapwatahki tuhke kaselel, oh soangen dipwisou kesempwal kan koaros, kohl, oh siliper, oh mete, oh prahs, oh sip, oh kapa;

9 Oh e pil kauwada tehnpese kalaimwun ehu, oh mwoahl ehu nan werenge, soahng koaros wiawihkihda tuhke kaselel oh kapwatki kohl oh siliper oh iangahki dipwisou kesempwal akan.

10 Oh e pil ketin kupwurehda sapwellime tohn doadoahk kan en wiahda soangsoangen doadoahk kaselel kan nan masloalehn tehnpas sarawio, sang ni tuhke kaselel, oh kapa, oh prahs.

11 Oh sehr kan me wiawihdahr ong samworo lapalap ako, ileilehdasang sehr teikan, oh kapwatki kohl tohr; oh e pil wiahda wasahn idengekwei mwowe, pwe irail en kak idengek oh pwil pehrail kan powe ni ahnsou me irail pahn kin koasoi likamw oh pitipitih sapwellime aramas akan.

12 Kedekedeo e ahpw kauwada wasahn iroir ehu karanih tehnpas sarawio; ei, wasahn iroir ileile ehu, iei ileile mehlel me e kak ketida powe oh iroirlahng nan sahpw en Sailom, oh pil nan sahpw en Semlon, wasa Mehn Leimen kan sapwasapw ie; oh e kak kilang nan sahpwo pwon me kapilpene.

13 Kedekedeo e ahpw ketin kupwurehda irail en kauwada ihmw tohto nan sahpw en Sailom; oh e kupwurehda me imwen iroir laud ehu en koukouda pohn dohl en paliepeng en sahpw en Sailom, wasa me mehn Nihpai ko kin kohpene ie nan ahnsou me irail sopohsang nan sahpwo; oh met iei ihme e wiahkihong dipwisou kan me e alehdi sang daksis en sapwellime aramas akan.

14 Nan kupwure kin uhlahng sapwellime reken kepwe, oh e kin pereniki mour suwed oh tiahk suwed rehn eh pwoud kan oh eh pekehi kan; oh sapwellime samworo kan pil kin pereniki ieiang lihen netiki paliwararail kan.

15 Kedekedeo e ahpw padokedi mwetin wain kei nan sahpwo; oh e wiahda wasahn tiak wain, oh wiahda reken wain; ih eri tepda kamam sakau, oh pil iangahki sapwellime aramas akan.

16 Kedekedeo mehn Leimen kan ahpw tepida kokohlongodohng sapwellime aramas akan nan arail mwaht akan pwe re en pelian aramas malaulau kei oh kemeirailla nan arail mwaht akan ni ahnsou me irail wie apwapwalih neirail pelin mahn akan.

17 Oh nanmwarki Noha ketin poaronehla soun silasil kei en kapilpene sahpwo pwe irail en deh kolongodo; ahpw uwen me e kadarala ko sohte itar, a Mehn Leimen kan kodohng irailte oh kemeirailla, oh katangapeseng neirail pelin mahn tohto sang nan sahpwo; eri mehn Leiman kan tepier kauweirailla, oh kasalehda arail kailok ong irail.

18 Kedekedeo nanmwarki Noha ahpw ketin kadarala sapwellime sounpei kan, oh mehn Leimen ko pakasarala, de re kasarehsang irail nan sahpwo erein ahnsou kis; irail eri pwurodo oh wie perepereniki arail kaloweiraildi.

19 Oh met, pwehki arail poweiraildio, irail pohnmwahsohkihda nan kapehdirail kan; oh suhsuweiki uwen arail kehlail, ndinda me neirail sounpei limehk kak powehdi kidalap en Mehn Leimen kan; oh iei met me irail kin suweiki, oh kin pereniki nta, oh kakerehdi ntahn riarail kan, oh mepwukat pwehki suwed en arail nanmwarki oh samworo kan.

20 Kedekedeo mie ohl emen nanpwungerail me adaniki Apinadai; oh e kohla nanpwungerail, oh tepiada kokohp ong irail, patowahn: Kilang, Kauno ketin mahsanih, oh e ketin mahsanih ong ie, Kohwei, oh patohwanohng aramas pwukat, Kauno me mahmahsen—Meid suwediong aramas pwukat, pwe I kilangehr arail wiewia suwed akan, oh arail mour suwed akan, oh arail tiahk kanamenek kan; oh ma re sohte pahn koluhla I pahn kaloke irail nan ei engieng.

21 Oh ma irail sohte pahn koluhla oh sohpeilahng Kauno arail Koht, kilang, I pahn mweidirailahng pahn manaman en arail imwintihti kan; ei, oh irail pahn kaliduhla; oh irail pahn lokolok pahn arail imwintihti kan.

22 Oh ni ahnsouo, ih arail pahn esehki me ngehi iei Kauno arail Koht, oh ngehi iei Koht luwakahk emen, me kin kalokehki nei aramas akan diparail kan.

23 Oh ni ahnsouo ma aramas pwukat sohte pahn koluhla oh sohpeilahng Kauno arail Koht, irail pahn kaliduhla; oh sohte me pahn kak doareirailla, ihte Kauno Koht Wasa Lapalap.

24 Ei, oh ni ahnsouo me irail pahn kin likwerih ie I pahn pwand en karonge arail pekipek kan; ei, oh I pahn mweidohng irail en kamakam pahn arail imwintihti kan.

25 Oh I sohte pahn karonge arail kapakap akan, de pil doareirailsang nan arail lokolok kan; ihte ma irail pahn pwuhrieng nan likoun nsensuwed oh pehs kan oh koluhla, oh pekpeki ni ngidingid ong Kauno arail Koht, oh iei met me e ketin poahngok ong ie.

26 Eri ni en Apinadai patohwanohng irail mahsen pwukat, irail ahpw lingeringerda pah, oh song en kemehla; ahpw Kauno ketin kapitasang ih rehrail.

27 Ni en nanmwarki Noha eh karongehda dahme Apinadai patohwanohng aramas akan, e pil engiengda; oh mahsanih: Pwe ihs me Apinadai, pwe en kadeikiehda oh nei aramas akan, de ihs Kauno, me pahn ketkihong nei aramas akan soahngen kalokolok wet?

28 Kumwail pitipit karedohngie Apinadai ahnsou wet, pwe I en kemehla, pwe e koasoiaier soahng kan me pahn kamwoarongehda nei aramas akan irail en uhpene nanpwungarail, oh en kahrehda pingiping nanpwungen nei aramas akan; eri I pahn kemehla.

29 Pwe kilang, mesen aramas pwukat maskunlahr; re keptakaila nan ar sohte men rong dahme Apinadai mahsanihong irail, oh sang ahnsouo kohla irail kin song en koledi ih. Oh nanmwarki Noha kakeptakailahr eh mohngiong nan eh uhwong mahsen en Kauno, oh e sohte koluhkihla eh wiewia suwed kan.