Iralaud 14
Aiseia karasaraski Mesaiao—Sapwellimen Mesaiao sarohdi oh lokolok sansalehr—E tounmeteikihla Sapwellime mour pwehki dihp oh e pahn ketin sewese me dipan akan—Karasahiong Aiseia 53. Ele Sounpar 148 Mwohn Krais.
1 Ei, Aiseia sou mahsanih: Ihs me pahn kamehlele dahme kitail pakairki, oh ihs me pahn dehdehkihla wiepen nin limen Kauno?
2 Pwe e pahn keirda mwohn [Kauno] rasehng kisin tuhke kis, oh kalewe kan wosadasang nan pwehl madekeng; sohte wahu ehu de lingan ehu me mie reh; oh ahnsou me kitail pahn kilang, sohte lingan me kitail pahn linganki reh.
3 Aramas akan pahn mwamwahliki oh soikala; ih aramas en lokolok men, oh e ahnlahr soahngen medek koaros; oh kitail sohte kin men kilang; oh aramas kin mwamwahliki likamwete ih sohte mwahn katepe;
4 Ahpw e ketin lokolongki atail lokolok, oh weuwa atail pahtou kan; ahpw kitail medemedewe me Koht me ketkihong kalokolok wet.
5 Ahpw dipatail kan me e ketin ohkihla, atail wiewia suwed kan me e ketin lipwalipwkihda; lokolok me e ketin sapwellimaniki me kihong kitail popohl; oh lipwen ohla kan ni paliwere me kaunsekeikitailla.
6 Kitail koaros, rasehng sihpw kei me salongalahr; emenemen kitail wiewia pein nsene; ahpw Kauno ketin pwukoakidier dipatail kan koaros.
7 E kamwamwahla pahn aramas, oh lokolok, ahpw sohte mwahn kisin kaulim kis kohsang nan dawase; e rasehng sihmpwul men me pakahrlahng kamakamala, oh rasehng sihpw men ni ahnsou me wune kan pahn seiseisang ahpw e sohte mwahn mahsanih mehkot.
8 E ketisang nan kalapwus oh pakadeikadahr; eri ihs me kak koasoia kadaudoke? Pwe e pahn kamakamala sang sapwen me momour kan; pwe e lokolongki dipen nei aramas akan.
9 Oh e seridi rehn me dipan akan, oh e ahpw nekinekidi nan sousoun me kepwepwe; mehndahte e sohte wiahda mehkot sapwung, de likamw ehu kohsang nan ewe.
10 Ahpw Kauno me ketin kupwurehda en kalipwelipwehda; ih me ketin kahrehda en lokolok; ni ahnsou me komwi pahn meirongkihla eh mour pwehki dihp e pahn kilangada kadaudoke kan, e pahn kareireila eh ahnsou, oh koasoandien kupwur en Kauno pahn pweida nin lime kan.
11 Mwurin sapwellime lokolok, oh pahn kupwurperenki; sang ni eh kupwurokong nei ladu loaloapwoat menet pahn kapitala aramas tohto; pwe e pahn ale kalokpen diparail akan.
12 Eri I pahn ketikihong nan dewe rehn me lapalap akan, oh e pahn patehng me kehlail kan nehkpeseng dipwsou kan; pwehki e ketin mweidala eh mour en mehla; oh e ketin wadawad ong me dipan akan; oh ale kalokpen dipen aramas ngeder, oh ketin sewese me dipan akan.