1 Ndvodzana yami letsandzekako, ngiyaphindza ngiyakubhalela kute wati kutsi ngisaphila, kodvwa ngibhala ngaloko lokutsite lokungikhatsatako.

2 Ngoba buka, ngibe nemphi lematima nemaLamani, lesingakancobi kuyo; futsi Akhiyantusi ufile wabulawa ngenkemba, kanjalo naLuramu kanye na-Emroni; yebo, futsi silahlekelwe sibalo lesinyenti semadvodza etfu lakhetsekile.

3 Manje buka, ndvodzana yami, ngiyesaba funa emaLamani atawubabhubhisa labantfu, ngoba abaphendvuki, naSathane ubaphehla njalo kutsi batfukutselelane lomunye nalomunye.

4 Buka, ngisebenta nabo njalo; uma ngikhuluma livi laNkulunkulu ngekucina bayatfutfumela baphindze bangitfukutselele; futsi uma ngingasebentisi kucina bacinisa tinhlitiyo tabo ngekumelana nalo; ngaloko-ke, ngiyesaba funa Moya weNkhosi sewuyekelile kusebenta kubo.

5 Ngoba sebatfukutsele kakhulu ngendlela yekutsi sekubonakala kimi shangatsi abakwesabi kufa; futsi sebalahlekelwe kutsandzana, lomunye kulomunye; bomele ingati kanye nekutiphindziselela njalo.

6 Manje, ndvodzana yami letsandzekako, nanoma kungenca yebulukhuni babo, tsine asisebente ngekukhutsala; ngoba uma siyekela kusebenta, siyawuletfwa ekulahlweni ngelicala; ngoba sinemsebenti lekufanele siwente uma sisemtimbeni welubumba, kute sincobe sitsa sako konkhe kulunga, futsi siphumute imiphefumulo yetfu embusweni waNkulunkulu.

7 Manje sengibhala lokutsite mayelana netinhlupheko talabantfu. Ngoba ngekwelwati lengilutfolile ku-Amoroni, buka, emaLamani anetiboshwa letinyenti, latitsatsa embhoshongweni waSheriza; futsi bekubesilisa, besifazane, kanye nebantfwana.

8 Emadvodza kanye naboyise balabo besifazane nebantfwana bababulele; futsi bondla labesifazane ngenyama yemadvodza abo, kanye nebantfwana ngenyama yaboyise; futsi kute emanti, ngaphandle kwalamancane nje, lababanika wona.

9 Nanoma kungenca yesinengiso lesikhulu semaLamani, asisendluli sebantfu betfu labaseMoriyantumi. Ngoba buka, lamanyenti emadvodzakati emaLamani bawatsetse bawenta tiboshwa; futsi emvakwekubemuca loko lokwakutsandzeka kuphindze kuligugu ngetulu kwato tonkhe tintfo, lokubumsulwa nebucotfo—

10 Emvakwekutsi sebente lentfo, bababulala ngesihluku lesikhulu, babavisa buhlungu emitimbeni yabo bate bafa; emvakwekutsi sebakwentile loku, badla inyama yabo njengetilwane tesiganga, ngenca yebulukhuni betinhlitiyo tabo; futsi bakwenta loku njengesiboniso sekuba nesibindzi.

11 O ndvodzana yami letsandzekako, kungenteka kanjani kutsi bantfu labanjengalaba, labete imphucuko—

12 (Futsi kuseyiminyaka lembalwa nje kuphela leseyendlulile, kantsi bebabantfu labaphucukile nalabatsandzekako)

13 Kodvwa O ndvodzana yami, kungenteka kanjani kutsi bantfu labanjengalaba, kutfokota kwabo kungaba sesinengisweni lesingaka—

14 Singalindzela kanjani kutsi Nkulunkulu angavimbela sandla sakhe ekusehluleleni na?

15 Buka, inhlitiyo yami iyakhala itsi: Maye kulabantfu. Wota ngekwehlulela, O Nkulunkulu, ufihle tono tabo, nebubi babo, netinengiso tabo phambi kwebuso bakho!

16 Ngetulu kwaloko, ndvodzana yami, kukhona bafelokati labanyenti kanye nemadvodzakati abo labasele eSheriza; kanye naleyo ncenye yemphako emaLamani langayitsatsanga, buka, libutfo laZenefi liyitsetse, labashiya bazulazula baya noma ngukuphi lapho bangaya khona kuyawufuna kudla; futsi labanyenti besifazane labadzala bayaculeka endleleni bayafa.

17 Nelibutfo lelinami libutsakatsaka; kanjalo nemabutfo emaLamani asemkhatsini wami naSheriza; futsi bonkhe labo lababalekele emphini ya-Aroni babulewe ngesihluku lesikhulu.

18 O kukhohlakala kwebantfu bami! Bete kuhleleka nebubele. Buka, ngingumuntfu nje, futsi nginemandla emuntfu nje, angeke ngisayiphocelela imiyaleto yami.

19 Futsi sebacinile ebubini babo; sebagcwele lunya ngalokufanako, kute lonjani, umdzala noma umncane; batfokotela tonkhe tintfo ngaphandle kwaloko lokuhle; nekuhlupheka kwebesifazane betfu kanye nebantfwana betfu eveni lonkhe kwendlula konkhe; yebo, lulwimi angeke lukuchaze, noma kubhalwe.

20 Manje, ndvodzana yami, angeke ngisahlala kulesimo lesibi kangaka. Buka, uyabati bubi balabantfu; uyati kutsi abanamgomo, futsi nemizwa seyitfuntfubetekile; nebubi babo sebendlula lobo bemaLamani.

21 Buka, ndvodzana yami, angeke ngibakhulumele kuNkulunkulu funa angishaye.

22 Kodvwa buka, ndvodzana yami, wena ngiyakukhulumela kuNkulunkulu, futsi ngiyetsemba kuKhristu kutsi uyawusindziswa; ngiyathandaza kuNkulunkulu kutsi ayisindzise imphilo yakho, kute utibonele kubuyela kwebantfu bakhe kuye, noma kubhujiswa kwabo baphele nya; ngoba ngiyati kutsi kufanele babhubhe ngaphandle kwekutsi baphendvuke babuyele kuye.

23 Futsi uma babhubha kuyawuba njengekwemaJaredi, ngenca yekufisa kwetinhlitiyo tabo, bafuna ingati nekutiphindzisela.

24 Futsi nangabe bayabhubha, siyati kutsi linyenti labomnaketfu lihlubukele kumaLamani, futsi banyenti labanye labasetawuhlanganyela nawo; ngaloko-ke, bhala tintfo letitsite letimbalwa, uma kwenteka usindza mine ngifa ngingasakuboni; kodvwa ngiyetsemba kutsi ngitawukubona masinyane; ngoba nginemibhalo lengcwele lengitawuyiletsa kuwe.

25 Ndvodzana yami, tsembela kuKhristu; futsi shangatsi letintfo lengitibhalile tingahlala tingakukhatsati, bese tikudvonsela phansi ekufeni; kodvwa shangatsi Khristu angakuphakamisa, nekuhlupheka kanye nekufa kwakhe, nekukhombisa umtimba wakhe kubokhokho betfu, nebubele bakhe, nekumela bulukhuni kwakhe, nelitsemba lenkhatimulo yakhe kanye nekuphila lokuphakadze, kungahlala engcondvweni yakho ingunaphakadze.

26 Futsi shangatsi umusa waNkulunkulu Babe, lo sihlalo sakhe sebukhosi singetulu emazulwini, kanye neNkhosi yetfu Jesu Khristu, lohleti ngasesandleni sangesekudla semandla akhe, tite tonkhe tintfo tibe ngephansi kwakhe, ungaba nawe, futsi uhlale naye ingunaphakadze. Amen.