INcwadzi yaMoroni
Sehluko 1
Moroni ubhalela kutsi kuzuze emaLamani—EmaNefi langeke amphike Khristu ayabulawa. Cishe ngemnyaka weNkhosi wema-401–421.
1 Manje mine, Moroni, emvakwekutsi sengicedzile kufinyeta indzaba yebantfu baJaredi, bengingacabangi kutsi ngitawubuye ngibhale lokunye, kodvwa ngisengakafi kwamanje; futsi angitiveti kumaLamani funa angibulale.
2 Ngoba bukani, timphi tawo tiyesabeka kakhulu emkhatsini wawo lucobo; futsi ngenca yenzondo yawo abulala onkhe emaNefi langeke amphike Khristu.
3 Mine, Moroni, angeke ngimphike Khristu; ngaloko-ke, ngizulazula noma ngukuphi lapho ngingaya khona kute ngisindzise imphilo yami.
4 Ngaloko-ke, ngibhala letinye tintfo letimbalwa, lokungasiko lebengikucabanga; ngoba bengingacabangi kutsi ngitawubuye ngibhale lokunye; kodvwa ngibhala letinye tintfo letimbalwa, kute mhlawumbe tibe lusito kubomnaketfu emaLamani, ngalelinye lilanga lelitako, ngekwentsandvo yeNkhosi.