Sehluko 7
Mormon umema emaLamani etinsuku tekugcina kutsi akholwe kuKhristu, emukele livangeli Lakhe, aphindze asindziswe—Bonkhe labalikholwako libhayibheli batawuyikholwa neNcwadzi yaMormon. Cishe ngemnyaka weNkhosi wema-385.
1 Manje, buka, sengitawukhuluma lokutsite kuyo insali yalabantfu labasindzile, nangabe Nkulunkulu angabanika emavi ami, kute bati ngetintfo tabokhokho babo; yebo ngikhuluma kini, nine nsali yendlu yaka-Israyeli; futsi ngulawa emavi lengiwakhulumako:
2 Yatini kutsi nibendlu yaka-Israyeli.
3 Yatini kutsi kufanele nite ekuphendvukeni, nakungenjalo angeke nisindziswe.
4 Yatini kutsi kufanele nitibeke phansi tikhali tenu temphi, ningasaphindzi nitfokote ekucitsekeni kwengati, futsi ningaphindzi nititsatse, ngaphandle kwekuyaletwa nguNkulunkulu kutsi nititsatse,
5 Yatini kutsi kufanele nitfole lwati lwabokhokho, niphendvuke kuto tonkhe tono tenu nasebubini, nikholwe kuJesu Khristu, kutsi uyiNdvodzana yaNkulunkulu, nekutsi wabulawa ngemaJuda, futsi ngemandla aBabe uphindze wavuka, ngako uzuze kuncoba ngetulu kwelithuna, nekutsi kuye ludvonsi lwekufa luncotjiwe.
6 Futsi ufeza kuvuswa kwalabafile, ngako umuntfu kufanele avuswe kute eme phambi kwesihlalo sakhe sekwehlulela.
7 Futsi ufeze nekuhlengwa kwemhlaba, ngako loyo loyawutfolakala angenacala phambi kwakhe ngelilanga lekwehlulela uyawunikwa kutsi ahlale naNkulunkulu embusweni wakhe, kute ahlabelele indvumiso lengapheli nemakwaya asezulwini, kuBabe, nakuNdvodzana kanye nakuMoya loNgcwele, labanguNkulunkulu munye, esimeni senjabulo lesingenasiphetfo.
8 Ngako-ke phendvukani, nibhajatiswe egameni laJesu, nibambelele evangelini laKhristu, leniyawuniketwa lona, hhayi kulombhalo lona kuphela kodvwa nasembhalweni loyawuta kubeTive uvela kumaJuda, lokungumbhalo loyawuvela kubeTive uta kini.
9 Ngoba bukani, loku kubhalwe ngenhloso yekutsi nikholwe nguloko; futsi uma nikholwa nguloko niyawukholwa nguloku; uma nikholwa nguloku, niyawukwati mayelana nabokhokho benu, kanjalo nangemisebenti lemangalisako leyentiwa ngemandla aNkulunkulu emkhatsini wabo.
10 Futsi ngetulu kwaloko niyawukwati kutsi niyinsali yentalelwane yakaJakobe; ngako-ke nibalwa nebantfu besivumelwano sekucala; futsi nangabe niyakholwa kuKhristu, nibhajatiswe, ngemanti kucala, bese kuba ngemlilo kanye nangaMoya loNgcwele, nilandzela sibonelo seMsindzisi wetfu, ngaloko lasiyaleta ngako, kuyawuba kuhle kini ngelilanga lekwehlulela, Amen.