1 Futsi kwenteka kutsi ngaya emkhatsini wemaNefi, ngasihocisa sifungo sami lengangisentile sekutsi angeke nanini ngisaphindze ngiwasite; aphindze angibeka kutsi ngilawule emabutfo awo, ngoba abengitsatsa njengemuntfu lobekangakhona kutsi awakhulule etinhluphekweni tawo.

2 Kodvwa buka, ngangite litsemba, ngoba ngangitati tehlulelo teNkhosi letatitawukuta kuwo; ngoba akaphendvukanga ebubini bawo, kodvwa azabalazela timphilo tawo ngaphandle kwekubita loyo Muntfu lowawadala.

3 Futsi kwenteka kutsi emaLamani eta kutawusihlasela njengobe sasesibalekile edolobheni iJordane; kodvwa buka, abuyiselwa emuva kangangekutsi akatange alitsatse lelidolobha ngaleso sikhatsi.

4 Futsi kwenteka kutsi aphindze eta atawusihlasela, kodvwa saligcina lelidolobha. Ngetulu kwaloko bekukhona lamanye emadolobha labekagcinwe ngemaNefi, tincaba tawo letawavimbela kutsi angakhoni kungena eveni lelaliphambi kwetfu, kute abulale labebahlala eveni letfu.

5 Kodvwa kwenteka kutsi noma ngabe ngumaphi emave lesasendlule kuwo, nalabebahlala khona labebangakagcogcwa kuwo, babulawa ngemaLamani, nemadolobha abo, netigodzi tabo, kanye nemadolobhakati abo ashiswa ngemlilo; wendlula kanjalo-ke umnyaka wemakhulu lamatsatfu nemashumi lasikhombisa nemfica.

6 Futsi kwenteka kutsi ngemnyaka wemakhulu lamatsatfu nesiphohlongo emaLamani aphindze eta kutawukulwa natsi, sema salwa nawo ngesibindzi; kodvwa konkhe kwaba lite ngoba sasisikhulu kakhulu sibalo sawo kangangekutsi abagcobagcoba bantfu baNefi ngaphansi kwetinyawo tawo.

7 Futsi kwenteka kutsi saphindze sabaleka, labo labebanematubane kunemaLamani, baphunyula, kantsi labo ematubane abo labekangendluli emaLamani babulawa babhujiswa.

8 Manje buka, mine Mormon, angifuni kukhatsata imiphefumulo yebantfu ngekubeka phambi kwabo lesehlakalo lesibi kanje sengati kanye nekubulawa kwebantfu labanyenti njengobe kwenteka phambi kwemehlo ami; kodvwa mine, ngati kutsi letintfo kufanele nakanjani tembulwe, nekutsi tonkhe tintfo letifihlakele kufanele tivetwe ekukhanyeni—

9 Nekutsi lwati lwaletintfo kufanele lute kuyo insali yalabantfu, kanjalo nakubo beTive, iNkhosi leyatsi bayawuhlakata labantfu, nekutsi labantfu bayawutsatfwa njengetfo lengenalutfo emkhatsini wabo—ngako-ke ngibhala lokufinyetiwe lokuncane, ngingeke ngilokotse nakancane nginike indzaba lephelele yaleti tintfo lengitibonile, ngenca yemyaleto lengiwutfolile, nekutsi ningabi nelusizi lolukhulu ngenca yebubi balabantfu.

10 Manje buka, loku sengikukhuluma kuyo intalelwane yabo, kanjalo nakubo beTive labayikhatsalele indlu yaka-Israyeli, labo lababonako nalabatiko kutsi tibusiso tabo tivelaphi.

11 Ngoba ngiyati kutsi labanjalo bayawuba nelusizi ngenca yekuhlupheka kwendlu yaka-Israyeli; yebo, bayawuba nelusizi ngenca yekubulawa kwalabantfu; bayawuba nelusizi kutsi labantfu abatange baphendvuke kute bemukelwe nguJesu.

12 Manje letintfo tibhalelwe insali yendlu yakaJakobe; futsi tibhalwe ngalendlela, ngoba Nkulunkulu uyati kutsi bubi abunawutiletsa kubo; futsi kufanele tifihlelwe eNkhosini kute tivele ngesikhatsi sayo lesifanele.

13 Lona ngumyaleto lengiwutfolile; buka, tiyawuvela ngekwemyaleto weNkhosi, ngesikhatsi seyibona kutsi sekufanele, ngekuhlakanipha kwayo.

14 Buka, tiyawuya kulabangakholwa bemaJuda; futsi tiyawuya ngenca yalesizatfu—kute bentiwe bakholwe kutsi Jesu unguKhristu, iNdvodzana yaNkulunkulu lophilako; kute Babe afeze, ngaloTsandzekako kakhulu wakhe, inhloso yakhe lenkhulu neyaphakadze, kutsi kubuyiswe emaJuda, noma yonkhe indlu yaka-Israyeli eveni labo lelilifa, iNkhosi Nkulunkulu wabo labanikete lona, kute agcwalise sivumelwano sakhe.

15 Ngetulu kwaloko kutsi intalelwane yalabantfu ilikholwe ngalokuphelele livangeli lakhe, leliyawuta kubo livela kubeTive; ngoba labantfu bayawuhlakatwa, futsi bayawuba bantfu lababi, labangcolile nalabanengekile, ngetulu kwaloko lokuke kwachazwa ngunoma ngubani emkhatsini wetfu, yebo, ngisho nangetulu kwaloko lokuke kwachazwa ngunoma ngubani emkhatsini wemaLamani, loku kungenca yekungakholwa kwabo kanye nekukhonta kwabo tithico.

16 Ngoba buka, Moya weNkhosi besewuvele uyekele kuhlala nabokhokho babo; futsi bete Khristu naNkulunkulu emhlabeni; bayazulazula njengemakhoba emoyeni.

17 Bake baba bantfu labatsandzekako, futsi bebanaKhristu njengemelusi wabo; yebo, bebaholwa ngisho nanguBabe Nkulunkulu.

18 Kodvwa manje, buka, sebaholwa nguSathane, njengemakhoba lapheshulwa ngumoya, noma njengemkhumbi ujikijelwa lapha nalapha emagagasini, ngaphandle kwekuntanta noma kwesisimiso, noma ngaphandle kwanoma yini yekuwucondzisa; futsi njengawo, nabo banjalo.

19 Buka, iNkhosi itigodlile tibusiso tabo, lengabe batitfola kulelive, kute titfolwe beTive labayawulitsatsa lelive libe ngelabo.

20 Kodvwa buka, kuyawukwenteka kutsi bayawucoshwa baphindze bahlakatwe beTive; futsi emvakwekutsi sebacoshiwe baphindze bahlakatwe beTive, buka, ngaleso sikhatsi iNkhosi iyawusikhumbula sivumelwano leyasenta ku-Abrahama kanye nakuyo yonkhe indlu yaka-Israyeli.

21 Ngetulu kwaloko iNkhosi iyawuyikhumbula imithandazo yalabalungile, leyaletfwa kuyo ngenca yabo.

22 Uma kunjalo, O nine beTive, ningema kanjani phambi kwemandla aNkulunkulu, ngaphandle kwekutsi niphendvuke niphindze nigucuke etindleleni tenu letimbi na?

23 Anati yini kutsi nisetandleni taNkulunkulu na? Anati yini kutsi unemandla onkhe, futsi ngemyaleto wakhe lomkhulu umhlaba uyawugocotwa ndzawonye njengekugocotwa kwelicansi na?

24 Ngako-ke, phendvukani, nititfobe phambi kwakhe, funa ete ngekulunga ehlisele sijeziso sakhe kini—funa insali yentalelwane yakaJakobe ihambe emkhatsini wenu njengelibhubesi, linidzabudzabule nibe ticucu, kubebete namunye loyawunikhulula.