Sehluko 4
Imphi kanye nekubulawa kwebantfu labanyenti kuyachubeka—Lababi bajezisa lababi—Bubi lobukhulu buyadlanga ngendlela lengatange seyibonwe ngaphambilini kulo lonkhe laka-Israyeli—Besifazane kanye nebantfwana banikelwa etithicweni—EmaLamani acala kuwasusa emaNefi phambi kwawo. Cishe ngemnyaka weNkhosi wema-363–375.
1 Manje kwenteka kutsi ngemnyaka wemakhulu lamatsatfu nemashumi lasitfupha nakutsatfu emaNefi enyuka nemabutfo awo kute ayawukulwa nemaLamani, ngaphandle kwelive iNcitsakalo.
2 Futsi kwenteka kutsi emabutfo emaNefi acoshwa kutsi aphindze abuyele emuva eveni leNcitsakalo. Ngesikhatsi sebakhatsele, libutfo lelisha lemaLamani latseleka etikwabo; baba nemphi lematima kakhulu, kangangekutsi emaLamani alitsatsa lidolobha iNcitsakalo, abulala labanyenti bemaNefi, aphindze atsatsa letinyenti tiboshwa.
3 Labasala babaleka bayohlangana nalabebahlala edolobheni iTheyankhumi. Manje lidolobha iTheyankhumi belingasemnceleni edvute nelugu lwelwandle; Ngetulu kwaloko belisedvute nelidolobha iNcitsakalo.
4 Futsi bekungenca yekutsi emabutfo emaNefi akhuphuka aya kumaLamani kutsi ate ashaywe; ngoba kube bekungasiko njalo, emaLamani bekangeke abe nemandla ngetulu kwabo.
5 Kodvwa, bukani, tehlulelo taNkulunkulu titawuta kulababi; futsi lababi bajeziswa ngalababi; ngoba lababi baphehla tinhlitiyo tebantfwana bebantfu kutsi bacitse ingati.
6 Futsi kwenteka kutsi emaLamani enta emalungiselelo ekutsi ayohlasela lidolobha iTheyankhumi.
7 Futsi kwenteka kutsi ngemnyaka wemakhulu lamatsatfu nemashumi lasitfupha nakune emaLamani alihlasela lidolobha iTheyankhumi, kute aphindze alitsatse lelo dolobha.
8 Futsi kwenteka kutsi akhalinywa aphindze abuyiselwa emuva ngemaNefi. Ngesikhatsi emaNefi abona kutsi besekawabuyisele emuva emaLamani aphindze atichayisa ngemandla awo; ahamba ngemandla awo, aphindze alitsatsa lelidolobha iNcitsakalo.
9 Manje tonkhe leti tintfo besetentekile, futsi bese kubulewe tinkhulungwane etinhlangotsini totimbili, kumaNefi kanye nakumaLamani.
10 Futsi kwenteka kutsi bese kwendlule umnyaka wemakhulu lamatsatfu nemashumi lasitfupha nesitfupha, emaLamani aphindze abuya kutawuhlasela emaNefi kute alwe nawo; noko emaNefi akaphendvukanga ebubini lebekabentile, kodvwa aphikelela ebubini bawo njalonjalo.
11 Futsi ngeke lukwati lulwimi kuchaza, noma umuntfu abhale inchazelo lephelele ngesehlakalo lesesabekako sengati kanye nekubulawa kwebantfu labanyenti lokwaba semkhatsini walabantfu, emaNefi kanye nemaLamani; futsi tonkhe tinhlitiyo taba lukhuni, kangangoba bakujabulela kucitsa ingati njalonjalo.
12 Futsi bekungakate kube khona bubi lobukhulu kangaka emkhatsini webantfwana bonkhe baLehi, noma ngisho emkhatsini wayo yonkhe indlu yaka-Israyeli, ngekwemavi eNkhosi, njengobe baba khona emkhatsini walabantfu.
13 Futsi kwenteka kutsi emaLamani alitsatsa lelidolobha iNcitsakalo, loku bekungenca yekutsi sibalo sawo besisendlula leso semaNefi.
14 Aphindze ahamba ayawuhlasela lidolobha iTheyankhumi, akhipha labebahlala kulo, atsatsa letinyenti tiboshwa tebesifazane kanye nebantfwana, anikela ngabo njengemihlatjelo etithicweni tawo.
15 Futsi kwenteka kutsi ngemnyaka wemakhulu lamatsatfu nemashumi lasitfupha nesikhombisa, emaNefi atfukutsele ngenca yekutsi emaLamani bekente umhlatjelo ngebesifazane bawo kanye nebantfwana bawo, kangangekutsi awahlasela emaLamani ngentfukutselo lenkhulu kakhulu, kangangekutsi aphindze awehlula emaLamani, awakhipha kutsi abaleke emaveni awo.
16 EmaLamani akatange aphindze abuye kutawuhlasela emaNefi kwate kwaba ngumnyaka wemakhulu lamatsatfu nemashumi lasikhombisa nesihlanu.
17 Futsi ngalomnyaka eta atawuhlasela emaNefi ngemandla awo onkhe; bekangabaleki ngenca yebunyenti besibalo sawo.
18 Futsi kusukela ngalesi sikhatsi kuya phambili emaNefi akatange asaba nemandla ngetulu kwemaLamani, kodvwa acala asuswa ngiwo njengematolo phambi kwelilanga.
19 Futsi kwenteka kutsi emaLamani ehla alihlasela lelidolobha iNcitsakalo; kwaba nemphi lematima kakhulu leyaliwa eveni iNcitsakalo, lapho awehlula khona emaNefi.
20 Aphindze awabalekela, ate ayofika edolobheni iBhowazi; ema lapho alwa nemaLamani ngesibindzi lesikhulu, kangangekutsi emaLamani akawehlulanga ate abuyela kwesibili.
21 Ngesikhatsi sekabuyela kwesibili, emaNefi acoshwa aphindze abulawa kakhulu; besifazane bawo kanye nebantfwana bawo baphindze bentiwa umhlatjelo wetithico.
22 Futsi kwenteka kutsi emaNefi aphindze awabalekela, ahamba nabo bonkhe labebahlala emadolobheni kanye nasetigodzini.
23 Manje mine, Mormon, ngekubona kutsi emaLamani besekatolibhubhisa lelive, ngako-ke ngaya egcumeni iShimi, ngatsatsa yonkhe imibhalo Amaroni lebekayifihle eNkhosini.