1 Kag karon, tan-awa, luyag ko nga maghambal sing pila ka bagay sa nagkalabilin sining katawhan nga naluwas, kon ihatag sang Dios sa ila ang akon mga pulong, agud mahibal-an nila ang mga butang parte sa ila mga amay; huo, nagahambal ako sa inyo, kamo nga nagkalabilin sang panimalay ni Israel; kag amo ini ang mga pulong nga akon ihambal:

2 Luyag ko mahibal-an ninyo nga iya kamo sang panimalay ni Israel.

3 Luyag ko mahibal-an ninyo nga kinahanglan gid kamo nga maghinulsol, ukon indi kamo maluwas.

4 Luyag ko mahibal-an ninyo nga kinahanglan gid ninyo nga buy-an ang inyo mga armas sa giyera, kag indi na magkalipay sa pagpaagay sang dugo, kag indi na magkapot sang mga ini, luwas lang nga ang Dios magsugo sa inyo.

5 Luyag ko mahibal-an ninyo nga kinahanglan gid kamo nga magdangat sa ihibalo parte sa inyo mga amay, kag maghinulsol sang tanan ninyo nga mga sala kag mga kalainan, kag magpati kay Jesucristo, nga sia ang Anak sang Dios, kag ginpatay sia sang mga Judio, kag paagi sa gahum sang Amay nabanhaw sia liwat, nga sa sini nga paagi naangkon niya ang kadalag-an batok sa lulubngan; kag sa iya man gindaug ang kasakit sang kamatayon.

6 Kag ipahanabo niya ang pagkabanhaw sang mga minatay, nga sa sini nga paagi ang tawo sigurado gid nga bangonon agud magtindog sa atubang sang iya hukom-lingkuranan.

7 Kag ginpahanabo niya ang pagtubos sang kalibutan, nga sa sini nga paagi sia nga masapwan nga wala’y sala sa iya atubang sa adlaw sang paghukom igahatag sa iya nga magpuyo sa presensya sang Dios sa iya ginharian, sa pagkanta sang wala’y untat nga mga pagdayaw upod sa mga koro sang kalangitan, sa Amay, kag sa Anak, kag sa Balaan nga Espiritu, nga isa ka Dios, sa kahimtangan sang kalipayan nga wala sing katapusan.

8 Gani maghinulsol, kag magpabunyag sa ngalan ni Jesus, kag magkapyot sa ebanghelyo ni Cristo, nga ipahamtang sa inyo atubang, indi lamang sa sini nga kasulatan kundi sa kasulatan man nga magaabot sa mga Gentil halin sa mga Judio, nga ang amo nga kasulatan magaabot sa inyo halin sa mga Gentil.

9 Kay tan-awa, ginasulat ini para sa tinutuyo nga magpati kamo sa sina; kag kon nagapati kamo sa sina magapati man kamo sa sini; kag kon nagapati kamo sa sini mahibal-an ninyo ang parte sa inyo mga amay, kag amo man ang dalayawon nga mga binuhatan nga ginhimo paagi sa gahum sang Dios sa ila.

10 Kag mahibal-an man ninyo nga nagkalabilin kamo sang kaliwatan ni Jacob; gani naisip kamo sa katawhan sang una nga kasugtanan; kag kon magpati kamo kay Cristo, kag mabunyagan, una sa tubig, dayon sa kalayo kag sa Balaan nga Espiritu, nga nagasunod sang ehemplo sang aton Manluluwas, suno sa sinang ginsugo niya sa aton, mangin maayo ini sa inyo sa adlaw sang paghukom. Amen.