1 Kag natabo ini, sa sinang amo man nga tuig may nagsugod nga giyera liwat sa tunga sang mga Nefinhon kag mga Lamanhon. Kag bisan bataon pa lang ako, dako ang akon lawas; gani ang katawhan ni Nefi nagpili sa akon nga ako ang ila mangin lider, ukon ang lider sang ila mga kasoldadohan.

2 Gani natabo ini nga sa akon ika-disesais nga tuig nagpanguna ako sa kasoldadohan sang mga Nefinhon batok sa mga Lamanhon; gani tatlo ka gatos kag beynte sais na ka tuig ang nagligad.

3 Kag natabo ini nga sa ika-tatlo ka gatos kag beynte siyete nga tuig ang mga Lamanhon nagsalakay sa amon upod ang tuman kadako nga puwersa, sa bagay nga nahadlok sa ila ang akon mga kasoldadohan; gani indi na sila mag-away, kag nagsugod sila sa pag-isol padulong sa mga pungsod sa norte.

4 Kag natabo ini nga nakaabot kami sa siyudad sang Angola, kag gin-agaw namon ang siyudad, kag naghimo sang mga pagpanghanda agud pangapinan ang amon mga kaugalingon batok sa mga Lamanhon. Kag natabo ini nga ginpamakuran namon ang siyudad sa amon bug-os nga ikasarang; apang sa pihak sang tanan namon nga mga pamakod ginsalakay kami sang mga Lamanhon kag gintabog kami pagwa sa siyudad.

5 Kag gintabog man nila kami pagwa sa duta sang David.

6 Kag naglakat kami kag nakaabot sa duta sang Josue nga yara sa mga dulonan sa weste malapit sa baybayon.

7 Kag natabo ini nga gintipon namon sing madasig ang amon katawhan tubtob sa mahimo, agud matipon namon sila sa isa ka grupo.

8 Apang tan-awa, ang duta napuno sang mga tulisan kag sang mga Lamanhon; kag sa pihak sang dako nga kalaglagan nga nagahana nga magtupa sa akon katawhan, wala sila naghinulsol sang ila malain nga mga hinimoan; gani may dugo kag pagpamatay nga naglapnag sa bug-os nga ibabaw sang kadutaan, sa bahin sang mga Nefinhon kag amo man sa bahin sang mga Lamanhon; kag isa yadto ka lubos nga pagrebelde sa bug-os nga ibabaw sang kadutaan.

9 Kag karon, ang mga Lamanhon may isa ka hari, kag ang iya ngalan amo si Aaron; kag nagsalakay sia sa amon upod ang kasoldadohan sang kwarenta’y kwatro ka libo. Kag tan-awa, gin-atubang ko sia upod ang kwarenta’y dos ka libo. Kag natabo ini nga ginpierde ko sia upod sa akon kasoldadohan sa bagay nga nalagyo sia sa akon atubang. Kag tan-awa, nahimo ini tanan, kag tatlo ka gatos kag treinta ka tuig na ang nagligad.

10 Kag natabo ini nga ang mga Nefinhon nagsugod sa paghinulsol sang ila kalainan, kag nagsugod sa pagsinggit bisan suno sa ginpropesiya ni Samuel nga propeta; kay tan-awa wala sing tawo nga makahupot sang iya kaugalingon nga mga pagkabutang tungod sang mga makawat, kag sang mga tulisan, kag sang mga manugpatay-tawo, kag sang pagsalamangka, kag sang pagpanghiwit nga yara sa kadutaan.

11 Gani nagsugod nga may pagkalisud kag pagpanalambiton sa bug-os nga kadutaan tungod sining mga butang, kag ilabi na gid sa katawhan ni Nefi.

12 Kag natabo ini nga sang ako, si Mormon, nakatalupangod sang ila panalambiton kag sang ila pagkalisud kag sang ila pagkasubo sa atubang sang Ginuo, ang akon tagipusuon nagsugod sa pagkasadya sa sulod nakon, kay nakahibalo sang mga kaluoy kag sang pagkamainantuson sang Ginuo, gani nagahunahuna ako nga mangin maluluy-on sia sa ila agud mangin isa sila liwat ka matarong nga katawhan.

13 Apang tan-awa ining kalipay nakon wala’y kapuslanan, kay ang ila pagpangasubo indi sa paghinulsol, tungod sang kaayo sang Dios; kundi ini amo ang pagpangasubo sang mga ginsilotan, tungod ang Ginuo dalayon nga indi magtugot sa ila nga magpangalipay sa sala.

14 Kag wala sila nagdangop kay Jesus nga may masinulub-on nga mga tagipusuon kag mahinulsulon nga mga espiritu, kundi nga ginsumpa nila ang Dios, kag naghandum nga mapatay. Apang naghimakas sila paagi sa espada para sa ila mga kabuhi.

15 Kag natabo ini nga ang akon pagkasubo nagbalik sa akon liwat, kag nakita ko nga ang adlaw sang grasya naglipas sa ila, pareho nga dutan-on kag espirituhanon; kay nakita ko ang linibo sa ila nga nagkalamatay sa hayag nga pagrebelde batok sa ila Dios, kag ginpanumpok pareho sang ipot sa ibabaw sang kadutaan. Kag gani tatlo ka gatos kag kwarenta’y kwatro ka tuig na ang nagligad.

16 Kag natabo ini nga sa ika-tatlo ka gatos kag kwarenta’y singko nga tuig ang mga Nefinhon nagsugod sa pagpalagyo halin sa atubang sang mga Lamanhon; kag ginpanglagas sila tubtob nga nakaabot sila bisan sa duta sang Jason antes sila nahimo nga mapunggan sa ila pag-isol.

17 Kag karon, ang siyudad sang Jason malapit sa duta nga sa diin ginlubong ni Amaron ang mga kasulatan para sa Ginuo agud indi maguba ang mga ini. Kag tan-awa nagkadto ako suno sa pulong ni Amaron, kag ginkuha ang mga lamina ni Nefi, kag naghimo sing isa ka kasulatan suno sa mga pulong ni Amaron.

18 Kag sa mga lamina ni Nefi naghimo ako sang bug-os nga kasaysayan sang tanan nga kalainan kag mga kangil-aran; apang sa sining mga lamina nagpaiway ako sa paghimo sang bug-os nga kasaysayan sang ila kalainan kag mga kangil-aran, kay tan-awa, isa ka dalayon nga talan-awon sang kalainan kag mga kangil-aran ang natampad sa atubang sang akon mga mata sugod sang nagakaigo na ang akon paghangop sang mga paggawi sang tawo.

19 Kag nagakalisud ako tungod sang ila kalainan; kay ang akon tagipusuon napuno sang pagpangasubo tungod sang ila kalainan, sa tanan ko nga adlaw; apang, nakahibalo ako nga pagabayawon ako sa katapusan nga adlaw.

20 Kag natabo ini nga sa sini nga tuig ang katawhan ni Nefi liwat ginpanglagas kag ginpanabog. Kag natabo ini nga gintabog kami tubtob nga nakaabot kami pa-norte sa duta nga ginatawag nga Sem.

21 Kag natabo ini nga ginpamakuran namon ang siyudad sang Sem, kag ginpanipon namon ang amon katawhan tubtob sa mahimo agud nga basi pa lang maluwas namon sila halin sa kalaglagan.

22 Kag natabo ini, sa ika-tatlo ka gatos kag kwarenta’y sais nga tuig nagsugod sila liwat sa pagsalakay sa amon.

23 Kag natabo ini nga naghambal ako sa akon katawhan, kag ginpaisog sila nga may tuman nga kabaskog, nga magtindog sila sing maisog sa atubang sang mga Lamanhon kag mag-away para sa ila mga asawa, kag ila mga anak, kag ila mga balay, kag ila mga puluy-an.

24 Kag ang akon mga pulong nagpukaw sa ila nga medyo magpagsik, sa bagay nga wala sila nagpalagyo halin sa atubang sang mga Lamanhon, kundi nagtindog sing may kaisog batok sa ila.

25 Kag natabo ini nga nakig-away kami nga may kasoldadohan sang treinta ka libo batok sa kasoldadohan sang singkwenta ka libo. Kag natabo ini nga nagtindog kami sa atubang nila nga may lubos nga kalig-on sa bagay nga nagpinalagyo sila halin sa amon atubang.

26 Kag natabo ini nga sang nagpinalagyo sila ginlagas namon sila upod ang amon mga kasoldadohan, kag gin-atubang sila liwat, kag ginpierde sila; apang ang kusog sang Ginuo wala sa amon; huo, ginbayaan kami sa amon kaugalingon nga ang Espiritu sang Ginuo wala nagpabilin sa amon; gani nangin maluya kami pareho sa amon mga kauturan.

27 Kag ang akon tagipusuon nagkasubo tungod sining dako nga kalamidad sang akon katawhan tungod sang ila kalainan kag sang ila mga kangil-aran. Apang tan-awa, nagsulong kami batok sa mga Lamanhon kag sa mga tulisan ni Gadianton tubtob nga nabawi namon liwat ang mga duta nga amon napanubli.

28 Kag ang ika-tatlo ka gatos kag kwarenta’y nuebe nga tuig nagligad na. Kag sa ika-tatlo ka gatos kag singkwenta nga tuig naghimo kami sang kasugtanan upod sa mga Lamanhon kag sa mga tulisan ni Gadianton nga sa diin ginbahin-bahin namon ang mga duta nga amon palanublion.

29 Kag ginhatag sa amon sang mga Lamanhon ang duta pa-norte, huo, bisan tubtob sa makitid nga alagyan nga nagapadulong sa duta pa-sur. Kag ginhatag namon sa mga Lamanhon ang tanan nga duta pa-sur.