1 Manje kwenteka emvakwekutsi sekwendlule iminyaka lembalwa, kwefika indvodza emkhatsini webantfu baNefi, libito layo kwakunguSheremu.

2 Futsi kwenteka kutsi yacala kushumayela emkhatsini webantfu, nekumemetela kubo kutsi angeke abe khona Khristu. Yashumayela tintfo letinyenti letayenga bantfu; futsi yakwenta loku kute icitse imfundziso yaKhristu.

3 Yasebenta ngekukhutsala kute iholele khashane tinhlitiyo tebantfu, kangangekutsi yatiholela khashane tinhlitiyo letinyenti; futsi yati kutsi mine, Jakobe, nganginelukholo kuKhristu lobekatofika, yalifuna kakhulu litfuba kute ite kimi.

4 Yayifundzile, kangangekutsi yayinelwati loluphelele lwelulwimi lwebantfu; ngaloko ke, yayikwati kusebentisa kuyenga lokunyenti, kanye nemandla ekukhuluma, ngekwemandla adeveli.

5 Yayineletsemba lekunginyakatisa elukholweni, nanoma ngasengibone tembulo kanye netintfo letinyenti mayelana naleti tintfo; ngoba ngempela ngase ngitibonile tingilosi, futsi tasetingisitile. Ngetulu kwaloko, ngasengilivile livi leNkhosi lucobo likhuluma kimi, tikhatsi ngetikhatsi; ngaloko-ke, ngangingeke nginyakatiseke.

6 Futsi kwenteka kutsi yeta kimi, yakhuluma kimi ngalendlela, yatsi: Mnaketfu Jakobe, sengilifune kakhulu litfuba lekutsi ngikhulume nawe; ngoba ngivile futsi ngetulu kwaloko ngiyati kutsi wena uhamba kakhulu, ushumayela loko lokubita ngelivangeli, noma imfundziso yaKhristu.

7 Futsi sewuholele khashane labanyenti balaba bantfu kute bagucule indlela lelungile yaNkulunkulu, bangawugcini umtsetfo waMosi loyindlela lelungile; nekutsi bawugucule umtsetfo waMosi kukhontwe umuntfu wena lotsi uyawufika eminyakeni lengemakhulu lamanyenti letako. Manje buka, mine, Sheremu, ngimemetela kuwe kutsi loku kuhlambalata; ngoba kute umuntfu lowatiko ngaleti tintfo letinje; ngoba angeke akwati kwatisa ngetintfo letisatofika. Sheremu waphikisana nami ngalendlela.

8 Kodvwa buka, iNkhosi Nkulunkulu yatfululela Moya wayo emphefumulweni wami, kangangekutsi ngamtfobisa kuwo onkhe emavi akhe.

9 Ngatsi kuye: uyamphika yini Khristu loyawufika na? Watsi: Uma kuyoba khona Khristu, anginakumphika; kodvwa ngiyati kutsi kute Khristu, nekutsi akate abe khona, futsi akayuze abe khona.

10 Ngatsi kuye: Ngabe uyayikholwa yini imibhalo lengcwele na? Watsi, Yebo.

11 Ngatsi kuye: Uma kunjalo-ke awuyicondzi; ngoba ifakaza ngekweliciniso ngaKhristu. Buka, ngitsi kuwe kute umphrofethi lobhalile, noma lophrofethile, ngaphandle kwekutsi akhulume mayelana naloKhristu.

12 Futsi akusiko loku kuphela—kwembuliwe kimi, ngoba ngivile futsi ngabona; ngetulu kwaloko kwembuliwe ngemandla aMoya loNgcwele; ngaloko-ke, ngiyati kutsi uma kute inhlawulo lengentiwa bonkhe bantfu kufanele balahleke.

13 Futsi kwenteka kutsi watsi kimi: Ngikhombise sibonakaliso ngalamandla aMoya loNgcwele, lowati kangaka ngawo.

14 Ngatsi kuye: Ngingubani mine kutsi ngingalinga Nkulunkulu kutsi akhombise wena sibonakaliso ngentfo loyatiko kutsi iliciniso na? Noma kunjalo uyayiphika, ngenca yekutsi unguwadeveli. Noko, akungentiwa intsandvo yami; kodvwa uma Nkulunkulu atokushaya, loko akube sibonakaliso kuwe kutsi yena unemandla, ezulwini kanye nasemhlabeni; futsi nekutsi Khristu uyawufika. Futsi intsandvo yakho, O Nkhosi, ayentiwe, hhayi yami.

15 Futsi kwenteka kutsi emvakwekutsi mine, Jakobe, sengiwakhulumile lamavi, emandla eNkhosi ehlela kuye, kangangekutsi wawela phansi. Futsi kwenteka kutsi wondliwa sikhatsi lesingemalanga lamanyenti.

16 Futsi kwenteka kutsi watsi kubantfu: Butsanani ndzawonye kusasa, ngoba ngitawufa; ngaloko-ke, ngifisa kukhuluma kubantfu ngaphambi kwekutsi ngife.

17 Futsi kwenteka kutsi ngakusasa sicuku sabutsana ndzawonye; wakhuluma ngalokusobala kuso futsi watiphika tintfo lebekabafundzise tona, wamvuma Khristu, nemandla aMoya loNgcwele, kanye nekusitwa tingilosi.

18 Futsi wakhuluma ngalokusobala kubo, kutsi bekakhohliswe ngemandla adeveli. Wakhuluma ngesihogo, nangeliphakadze, kanye nangesijeziso lesingapheli.

19 Watsi: Ngiyesaba funa sengente sono lesingacoleleki, ngoba ngicale emanga kuNkulunkulu; Ngoba ngiphike Khristu, ngatsi ngiyayikholwa imibhalo lengcwele, nekutsi ngempela ifakaza ngaye. Ngenca yekutsi ngicale emanga kuNkulunkulu ngiyesaba kakhulu funa licala lami libe libi kakhulu; kodvwa ngiyavuma kuNkulunkulu.

20 Futsi kwenteka kutsi emvakwekutsi sekawashito lamavi akatange asakwati kusho lamanye, wabese uyafa.

21 Emvakwekutsi sicuku sesibonile kutsi wakhuluma leti tintfo ngesikhatsi sekatawukufa, bamangala kakhulu; kangangekutsi emandla aNkulunkulu ehlela etikwabo, futsi abancoba kangangekutsi bawela phansi.

22 Manje, lentfo yayitfokotisa kimi, Jakobe, ngoba ngangiyicelile kuBabe losezulwini; ngoba wakuva kukhala kwami futsi wawuphendvula umthandazo wami.

23 Futsi kwenteka kutsi kuthula kanye nelutsandvo lwaNkulunkulu kwaphindze kwabuyiselwa emkhatsini webantfu; futsi bayihlolisisa imibhalo lengcwele, bangaphindzi balalela emavi alendvodza lembi.

24 Futsi kwenteka kutsi tindlela letinyenti tatisungulelwe kugucula kanye nekubuyisela emaLamani ekwatini liciniso; kodvwa konkhe loku kwaba lite, ngoba bekatfokotela timphi kanye nekucitsa ingati, futsi bekanenzondo lengapheli ngekumelana natsi, bomnakabo. Afuna ngemandla etikhalini tawo kusibhubhisa njalonjalo.

25 Ngaloko-ke, bantfu baNefi baticinisa ngekumelana nawo ngetikhali tabo, kanye nangawo onkhe emandla abo, batsembela kuNkulunkulu lolidvwala nensindziso yabo; ngaloko-ke, bachubeka kwaleso sikhatsi, baba bancobi betitsa tabo.

26 Futsi kwenteka kutsi mine, Jakobe, ngacala kuba mdzala, futsi imibhalo yalaba bantfu njengobe igcinwe kulabanye bongcwengcwe baNefi, ngaloko-ke, ngiyawephetsa lombhalo, ngatisa kutsi ngibhale njengekwelwati lwami, ngekusho kutsi sikhatsi sendlula natsi, ngetulu kwaloko netimphilo tetfu tendlula kwangatsi kwakunjengeliphupho kitsi, tsine sibantfu labanesitunge futsi labanesizotsa, singulabazulazulako, sicoshwe eJerusalema, sitalelwe ekuhluphekeni, ehlane, futsi sitondvwa bomnaketfu, lokwadala timphi kanye netincabano; ngaloko-ke, sakhala ngemalanga etfu onkhe.

27 Futsi mine, Jakobe, ngabona kutsi kwasekufanele masinyane ngehlele phansi ethuneni lami; ngaloko-ke, ngatsi kundvodzana yami Enoshi: Tsatsa laba bongcwengcwe. Ngamtjela leto tintfo umnaketfu Nefi labekangiyalete ngato, futsi watsembisa kuyilalela lemiyaleto. Ngenta siphetfo sekubhala kwami kulaba bongcwengcwe, lobekungumbhalo lomncane; futsi kumfundzi ngiyavalelisa, ngetsemba kutsi labanyenti babomnaketfu batawafundza lamavi ami. Bomnaketfu, salani kahle.