1 Manje, bukani, bomnaketfu, njengobe ngishito kini kutsi ngiyophrofetha, bukani, lesi siphrofetho sami—kutsi tintfo lomphrofethi Zenoshi latikhuluma, mayelana nendlu yaka-Israyeli, lapho ayifananisa nesihlahla semncumo lesitsanjisiwe, kufanele nakanjani senteke.

2 Futsi lilanga lapho ayawukwelula khona sandla sakhe futsi kwesibili kubuyisa bantfu bakhe, ngilo lilanga, yebo, sikhatsi sekugcina, lapho tinceku teNkhosi tiyawuhamba ngemandla ayo, kondla kanye nekutsena sivini sayo; emvakwaloko siphetfo siyawuta masinyane.

3 Futsi babusiseke kangakanani labo labasebente ngekukhutsala esivinini sayo; bacalekiswe kangakanani labo labayawulahlwa ngaphandle endzaweni yabo! Futsi umhlaba uyawushiswa ngemlilo.

4 Futsi unemusa kangakanani Nkulunkulu wetfu kitsi, ngoba uyayikhumbula indlu yaka-Israyeli, kokubili timphandze kanye nemagala; welula tandla takhe kubo bonkhe lilanga lonkhe; futsi babantfu labanenkhani nalabanekuphikisa; kodvwa bonkhe labo labangeke batente lukhuni tinhlitiyo tabo bayawusindziswa embusweni waNkulunkulu.

5 Ngaloko-ke, bomnaketfu labatsandzekako, ngiyanincenga ngemavi lanesizotsa kutsi niphendvuke, futsi nite ngenhloso lephelele yenhlitiyo, ninamatsele kuNkulunkulu njengobe naye anamatsele kini. Futsi ngesikhatsi lapho umkhono wakhe wemusa welulelwe kini ekukhanyeni kwelilanga, ningatenti lukhuni tinhlitiyo tenu.

6 Yebo, lamuhla, uma ningalalela livi lakhe, ningatenti lukhuni tinhlitiyo tenu; ngoba kuya ngani nitawufa na?

7 Ngoba bukani, emvakwekutsi senondliwe ngelivi lelihle laNkulunkulu lilanga lonkhe, ngabe nitawuveta sitselo lesibi, kute nisuswe futsi nilahlwe emlilweni na?

8 Bukani, ngabe nitawalahla yini lamavi na? Nitawalahla yini lamavi ebaphrofethi; futsi nitawuwalahla onkhe yini lamavi lakhulunywa mayelana naKhristu, emvakwekutsi labanyenti kangaka sebakhulumile mayelana naye; niphindze nililahle livi lelihle laKhristu, nemandla aNkulunkulu, kanye nesipho saMoya loNgcwele, nicishe Moya loNgcwele, nente inhlekisa ngelisu lelikhulu lekuhlengwa, lelibekelwe nine na?

9 Anati yini kutsi uma nitawukwenta leti tintfo, emandla ekuhlengwa kanye newekuvuka, lakuKhristu, atonenta nime ninemahloni nekuba nelicala phambi kwesihlalo saNkulunkulu na?

10 Futsi ngekwemandla ekulunga, ngoba kulunga angeke kwaliwe, kufanele nihambe niye kulelo chibi lemlilo nesibabule, lelinemalangabi langacimeki, futsi lelinentfutfu lekhuphukela etulu phakadze naphakadze, lelo chibi lemlilo nesibabule lokukuhlupheka lokungapheli.

11 O uma kunjalo-ke, bomnaketfu labatsandzekako, phendvukani, ningene esangweni lelincane, futsi nichubeke endleleni lengumntjuntju, nite nitfole kuphila lokuphakadze.

12 O hlakaniphani; yini lenye lengingayisho na?

13 Kwekugcina, ngiyanivalelisa, ngite ngihlangane nani phambi kwesihlalo lesitfokotisako saNkulunkulu, sihlalo leso lesishaya lababi ngeluvalo lolubi kanye nekwesaba. Amen.