INcwadzi yaJakobe
Umnakabo Nefi
Emavi enshumayelo yakhe kubomnakabo. Utfobisa indvodza lefuna kucitsa imfundziso yaKhristu. Emavi lambalwa mayelana nemlandvo webantfu baNefi.
Sehluko 1
Jakobe kanye naJosefa betama kukhutsata bantfu kutsi bakholwe kuKhristu futsi bagcine imiyaleto Yakhe—Nefi uyafa—Bubi buyadlanga emkhatsini wemaNefi. Cishe ngemnyaka wema-544–421 ngaphambi kwekutalwa kwaKhristu.
1 Ngoba buka, kwenteka kutsi kwase kwendlule iminyaka lengemashumi lasihlanu nesihlanu kusukela ngesikhatsi Lehi ashiya eJerusalema; ngaloko-ke, Nefi wanginika mine, Jakobe, umyaleto mayelana nabongcwengcwe labancane, lapho leti tintfo ticoshwe khona.
2 Futsi wanginika mine, Jakobe, umyaleto wekutsi kufanele ngibhale kulaba bongcwengcwe tintfo letimbalwa lebengicabanga kutsi tiligugu lelikhulu; nekutsi kufanele ngingatsintsi, ngaphandle kwekutsi kube kukancane nje, mayelana nemlandvo walaba bantfu lababitwa ngekutsi bantfu baNefi.
3 Ngoba watsi lomlandvo webantfu bakhe kufanele ucoshwe kulabanye bongcwengcwe bakhe, nekutsi kufanele ngibalondvolote laba bongcwengcwe futsi ngibendlulisele behlele entalelwaneni yami, titukulwane ngetitukulwane.
4 Futsi uma kukhona inshumayelo lengcwele, noma sembulo lesikhulu, noma siphrofetho, kufanele ngicophe tihloko taloko kubo labongcwengcwe, ngibhale ngako kakhulu, ngenca yaKhristu, nangenca yebantfu betfu.
5 Ngoba ngenca yelukholo kanye nekukhatsateka lokukhulu, ngempela kwembulwa kitsi mayelana nebanftu betfu, kutsi ngutiphi tintfo lebetitawukwenteka kubo.
6 Futsi ngetulu kwaloko saba netembulo letinyenti, kanye namoya wesiphrofetho lomnyenti; ngaloko-ke, sati ngaKhristu kanye nangembuso wakhe, lowawutawufika.
7 Ngaloko-ke sasebenta ngekukhutsala emkhatsini webantfu betfu, kute sibakhutsate kutsi bete kuKhristu, bahlanganyele ebuhleni baNkulunkulu, kute bangene ekuphumuleni kwakhe, funa ngandlela tsite ate afunge asentfukutselweni yakhe kutsi bangangeni kuyo, njengobe achukulutwa ngemalanga ekulingwa ngesikhatsi bantfwana baka-Israyeli basehlane.
8 Ngaloko-ke, siyacela kuNkulunkulu kutsi sikwati kubakhutsata bonkhe bantfu kutsi bangahlubuki kuNkulunkulu, bamchukulute ate atfukutsele, kodvwa kutsi bonkhe bantfu bakholwe kuKhristu, futsi bakubone kufa kwakhe, basivume siphambano sakhe baphindze babeketelele kuhlazwa ngumhlaba; ngaloko-ke, mine, Jakobe, ngikwenta kube ngumtfwalo wami kutsi ngiwugcwalise umyaleto wemnaketfu Nefi.
9 Manje Nefi wacala kuba mdzala, wabona kutsi masinyane bese atawukufa; ngaloko-ke, wagcoba indvodza kutsi ibe yinkhosi kanye nembusi ngetulu kwebantfu bakhe, njengekubusa kwemakhosi.
10 Bantfu bebamtsandza Nefi ngalokwendlulele, ngoba abengumvikeli wabo lomkhulu, wayisebentisa nenkemba yaLabani ekubavikeleni, wasebentela nenhlalakahle yabo ngawo onkhe emalanga akhe—
11 Ngaloko-ke, bantfu baba nesifiso sekuligcina libito lakhe njengesikhumbuto. Futsi labo labebatobusa esikhundleni sakhe babitwa bantfu, ngaNefi wesibili, Nefi wesitsatfu, njalonjalo, ngekwemibuso yemakhosi; futsi babitwa kanjalo bantfu, noma ngabe emabito abo bekabobani.
12 Futsi kwenteka kutsi Nefi wafa.
13 Manje bantfu labebangasiwo emaLamani bebangemaNefi; noko, bebabitwa ngemaNefi, emaJakobe, emaJosefa, emaZoramu, emaLamani, emaLemuweli, kanye nema-Ishmayeli.
14 Kodvwa mine, Jakobe, emvakwaloku angiyubehlukanisa ngalamabito, kodvwa ngiyawubabita ngemaLamani labo labafuna kubhubhisa bantfu baNefi, futsi labo labanebungani naNefi ngiyawubabita ngemaNefi, noma bantfu baNefi, ngekubusa kwemakhosi.
15 Manje kwenteka kutsi bantfu baNefi, ngaphansi kwekubusa kwenkhosi yesibili, bacala batenta taba lukhuni tinhlitiyo tabo, futsi batimbandzakanya ngandlela tsite ekwenteni tento tebubi, letinjengaleto taDavide wasendvulo tekufisa bafati labanyenti kanye netingani, kanjalo naSolomoni, indvodzana yakhe.
16 Yebo, ngetulu kwaloko bacala kufuna ligolide kanye nesiliva lelinyenti, futsi bacala kutsi ngandlela tsite baphakama ngenca yekutigcabha.
17 Ngaloko-ke mine, Jakobe, ngabanika lamavi ngesikhatsi ngibafundzisa ethempelini, sengitfole kucala kutfunywa kwami eNkhosini.
18 Ngoba mine, Jakobe, kanye nemnaketfu Josefa sasibekwe saba baphristi nebafundzisi balaba bantfu, ngesandla saNefi.
19 Futsi satikhulisa tikhundla tetfu eNkhosini, sakwenta umtfwalo wetfu, saba nesibopho setono talabantfu etikwetfu lucobo uma singabafundzisi livi laNkulunkulu ngekukhutsala konkhe; ngaloko-ke, ngekusebenta ngemandla etfu ingati yabo ngeke ite ngetulu kwetembatfo tetfu; ngaphandle kwaloko ingati yabo iyawuba etikwetembatfo tetfu, futsi asiyutfolakala singenabala ngelilanga lekugcina.