1 Ita kitaen, napasamak a siak, ni Jacob, kalpasan ti panangisurok iti adu a balikas kadagiti tattaok, (ket bassit laeng ti maisuratko kadagiti balikasko, gapu iti rikut iti panangikitikit dagiti balikasmi kadagiti pinanid) ken ammomi a nasken nga agtalinaed dagiti balikas nga insuratmi kadagiti pinanid;

2 Ngem nasken a madadael ken mapukaw ti ania man a balikas nga isuratmi malaksid no kadagiti pinanid ti nakaisuratan; ngem makaisuratkami iti sumagmamano a balikas kadagiti pinanid, a mangted kadagiti annakmi, ken kasta met kadagiti patpatgenmi a kakabsat, ti sangkabassit a pannakaammo maipanggep kadakami, wenno maipanggep kadagiti ammada—

3 Agrag-okami ita iti daytoy a banag; ket agtrabahokami a sipapasnek a mangikitikit kadagitoy a balikas kadagiti pinanid, a mangnamnama nga awatento dagiti patpatgenmi a kakabsat ken dagiti annakmi iti naimpusuan a panagyaman, ket basaenda a naimbag tapno maadalda nga addaan iti rag-o ket saan nga addaan iti ladingit, wenno addaan iti pananglais, maipanggep kadagiti immuna a nagannak kadakuada.

4 Agsipud ta, naisuratmi dagitoy a bambanag para iti daytoy a panggep, tapno maammuanda nga ^aammomi ni Cristo, ken adda namnamami iti dayagna ginasut a tawen sakbay ti yaayna; ken saan la a ti bagbagimi ti addaan iti namnama iti dayagna, ngem kasta met dagiti amin a nasantuan a ^bpropeta nga immun-una ngem dakami.

5 Kitaen, namatida ken ni Cristo ket ^anagdaydayawda iti Ama babaen ti naganna, ken kasta met a nagdaydayawkami iti Ama babaen ti naganna. Ket tungpalenmi ti ^blinteg ni Moises para iti daytoy a panggep, ^cipamaysana daytoy ti kararuami kenkuana; ket gapu kadaytoy a gagem a napasanto kadakami para iti kinalinteg, a kas iti pannakaipaayna ken ni Abraham iti langalang tapno agbalin a natallugod kadagiti bilin ti Dios iti panangidatonna iti anakna a ni Isaac, a mangibagi iti Dios ken ti ^dBugbugtong nga Anakna.

6 Gapuna, sukisokenmi dagiti propeta, ket adu ti paltiingmi ken espiritu ti ^apanangipadto; ket iti kinaadda amin dagitoy a ^bsaksi nakagun-odkami iti namnama, ket nagbalin a saanen a maisin ti pammatimi, isu a pudno a ^cmakapagbilinkami iti ^dnagan ni Jesus ket agtulnog kadakami uray mismo dagiti kayo, wenno dagiti bantay, wenno dagiti dalluyon iti baybay.

7 Nupay kasta, impakita kadakami ti Apo a Dios dagiti ^apagkapsutanmi tapno ammomi a babaen ti paraburna, ken ti naindaklan nga ikakanunongna kadagiti annak ti tattao, maaddaankami iti pannakabalin a mangaramid kadagitoy a bambanag.

8 Kitaen, naindaklan ken datdatlag dagiti aramid ti Apo. Anian a ^asaan a matukod ti kauneg dagiti ^bmisterio nga adda kenkuana; ket imposible daytoy a maammuan ti tao ti amin a wagasna. Ket awan ti tao a ^cmakaammo iti ^dwagasna malaksid no maipalgak kenkuana; gapuna, kakabsat, saanyo nga umsien dagiti paltiing ti Dios.

9 Ta kitaen, babaen ti bileg ti ^abalikasna immay ti ^btao ditoy rabaw ti daga, ti daga a pinarsuana babaen ti bileg ti balikasna. Gapuna, no nakapagsao ti Dios ket napaadda ti lubong, ken nagsao ket naparsua ti tao, O ngarud, apay ta saanna a kabaelan a bilinen ti ^cdaga, wenno dagiti pinarnuay dagiti imana iti rabawna, a mayannurot iti pagayatan ken pakaragsakanna?

10 Gapuna, kakabsat, saanyo a panggepen a ^abagbagaan ti Apo, ngem umawatkayo iti pammagbaga manipud kenkuana. Agsipud ta kitaen, ammoyo a mismo a mamagbaga isuna babaen iti ^bsirib, ken iti linteg, ken iti naindaklan nga asina, iti amin nga aramidna.

11 Gapuna, patpatgek a kakabsat, makikappiakayo kenkuana babaen ti ^apannubbot ni Cristo, ti ^bBugbugtong nga Anakna, ket magun-odyo ti ^cpanagungar, a mayannurot iti bileg ti panagungar nga adda ken ni Cristo, ket maidatag iti Dios a kas dagiti ^dumuna-a-bunga ni Cristo, nga addaan iti pammati, ken nakagun-od iti namnama iti ngayedna sakbay ti panangipakitana iti bagina iti lasag.

12 Ket ita, patpatgek, saankayo a masdaaw iti panangibagak kadakayo kadagitoy a bambanag; ta apay a saankayo ^aagsao iti pannubbot ni Cristo, ket gun-odenyo ti naan-anay a pannakaammo kenkuana, a kas iti pananggun-od iti pannakaammo iti panagungar ken ti dumteng a lubong?

13 Kitaen, kakabsatko, asinoman ti mangipadto, bay-anyo a mangipadto iti panakaawat dagiti tattao; ta agsasao ti ^aEspiritu iti pudno ket saan nga agulbod. Gapuna, agsaoda kadagiti bambanag a kas iti pudno a ^bkasasaadna, ken kadagiti napudno a pagbalinanto dagiti bambanag; gapuna, naipakita kadatayo dagitoy a bambanag a ^csilalawag, para iti pannakaisalakan dagiti kararuatayo. Ngem kitaen, saantayo laeng a saksi kadagitoy a bambanag; ta imbaga met ida ti Dios kadagiti nagkauna a propeta.

14 Ngem kitaen, ^anasukir a tattao dagiti Hudio; ket ^binumsida dagiti nalawag a balikas, ken pinatayda dagiti propeta, ket sinapulda dagiti bambanag a saanda a maawatan. Gapuna, gapu iti ^ckinabulsekda, a napasamak dayta a kinabulsek babaen ti ikikitada iti labes ti tun-oyen, nasken a matnagda; ta inikkaten ti Dios kadakuada ti kinalawagna, ket adu a banag ti intedna kadakuada a ^dsaanda a maawatan, agsipud ta kinalikagumanda. Ket inaramid ti Dios gapu ta kinalikagumanda, tapno maitiklebda.

15 Ket ita siak, ni Jacob, naparegtaananak ti Espiritu a mangipadto; ta malasinko babaen kadagiti aramid ti Espiritu nga adda kaniak, a babaen ti ^apannakaitibkol dagiti Hudio ^blaksidendanto ti ^cbato a mabalin a bangonenda ket maaddaanda iti natalged a pamuon.

16 Ngem kitaen, kas maibatay iti nasantuan a kasuratan, daytoy a ^abato ket dumakkelto, ket ti maudi, ken ti kakaisuna a pudno a ^bpamuon, a mabangon dagiti Hudio.

17 Ket ita, patpatgek, kasano a mabalin dagitoy, kalpasan a linaksidda ti pudno a pamuon, ^auray kaanoman a makaibangon kadaytoy, tapno agbalinto a pangulo ti panulida?

18 Kitaen, patpatgek a kakabsatko, ipalgakkonto kadakayo daytoy a misterio; ta no saan, iti aniaman a wagas, a maisin manipud iti kinatibkerko iti Espiritu, ken maitibkol gapu iti nalabes a gagarko kadakayo.