1 Ket ita napasamak a kalpasan ti panaglabas ti sumagmamano a tawen, adda lalaki nga immay kadagiti tattao ni Nephi, nga agnagan iti Sherem.

2 Ket napasamak a rinugianna ti mangasaba kadagiti tattao, ken mangipakdaar kadakuada nga awan ti Cristo. Ken adu a banag ti inkasabana a nangpaspasablog kadagiti tattao; ket inaramidna daytoy tapno maparmekna ti doktrina ni Cristo.

3 Ket nagtrabaho a sireregta tapno mayadayona ti puspuso dagiti tattao, iti kasta naallilawna ti adu a puso; ket gapu ta ammona a siak, ni Jacob, addaan iti pammati a dumtengto ni Cristo, nagbirok isuna ti adu a gundaway tapno mabalinna a makipagkita kaniak.

4 Ket de adal isuna, isu nga addaan isuna iti naan-anay a pannakaammo iti pagsasao dagiti tattao; gapuna, mabalinna nga aramaten ti adu a pasablog, ken nabileg unay a panagsao, a mayannurot iti bileg ti sairo.

5 Ket addaan isuna iti namnama a baliwana ti pammatik, iti laksid ti adu a ^apaltiing ken dagiti adu a bambanag a nakitakon maipanggep kadagitoy a bambanag; agsipud ta pudno a nakakitaakon kadagiti anghel, ket nagserbida kaniak. Ken kasta met, nangngegkon ti timek ti Apo a makisasao kaniak iti mismo a balikas, iti sumagmamano a gundaway; gapuna, saanak a maisin.

6 Ket napasamak nga immay kaniak, ket iti kastoy a wagas a nagsao kaniak, a kunana: Kabsat a Jacob, binirbirokkon ti adu a gundaway tapno makisao kenka; agsipud ta nangngegko ken ammok met nga adayon ti nadanonmo, a mangikaskasaba ti aw-awagam iti ebanghelio, wenno ti doktrina ni Cristo.

7 Ket naallilawmo ti adun kadagitoy a tattao isu a ballikugenda ti pudno a wagas ti Dios, ken saanda a ^atungpalen ti linteg ni Moises nga isu ti pudno a wagas; ken binaliwanda ti linteg ni Moises iti panagdayaw iti maysa a tao a kunam nga umayto ginasut a tawen manipud ita. Ket ita kitaem, siak, ni Sherem, ipakdaarko kenka a panagtabbaaw daytoy; ta awan ti tao a makaammo iti kakasta a banag; agsipud ta awan ti makaammo kadagitoy a banag, agsipud ta ^bsaanna a kabaelan a mangibaga kadagiti banag nga umay. Ket kastoy a wagas ti panangsuppiat kaniak ni Sherem.

8 Ngem kitaen, imbukbok ti Apo a Dios ti ^aEspirituna iti kaunggak, agingga a nakiburko isuna iti isuamin a balikasna.

9 Ket kinunak kenkuana: Ilibakmo kadi ti Cristo nga umayto? Ket kinunana: No addaanto iti maysa a Cristo, saankonto ilibak isuna; ngem ammok nga awan ti Cristo, uray man idi, wenno uray kaano man.

10 Ket kinunak kenkuana: Mamatika kadi iti nasantuan a kasuratan? Ket kinunana, Wen.

11 Ket kinunak kenkuana: Saanmo ngarud maawatan ida; agsipud ta pundo nga ipaneknekda ni Cristo. Kitaem, kunak kenka nga awan kadagiti propeta ti nangisurat, wenno ^anangipadto, malaksid no nagsaoda ti maipanggep iti daytoy a Cristo.

12 Ket saan laeng a daytoy—naipakitan kaniak, ta nangngeg ken nakitakon; ken kasta met a naipakitan kaniak babaen ti ^abileg ti Espiritu Santo; gapuna, ammok a no awanto ti naaramid a pannubbot ti sangkataoan ket ^bmapukaw.

13 Ket napasamak a kinunana kaniak: Mangipakitaka kaniak iti ^atanda babaen iti bileg ti Espiritu Santo, ta adu ti ammom kadaytoy.

14 Ket kinunak kenkuana: Asinoak a mangsulisog iti Dios a mangipakita kenka iti tanda iti banag nga ammom a ^apudno? Ngem ilibakmonto daytoy, gapu ta adda kenka ti ^bsairo. Nupay kasta, saan a ti pagayatak ti matungpal; ngem no saplitennaka ti Dios, dayta koma ti agbalin a tanda para kenka nga adda bilegna, iti langit ken iti daga; kasta met, a dumtengto ni Cristo. Ket ti pagayatam, O Apo, ti maaramid, saan a ti pagayatak.

15 Ket napasamak nga idi siak, ni Jacob, naisaokon dagitoy a balikas, nagtignay kenkuana ti bileg ti Apo, uray la a nadalupo iti daga. Ket napasamak a nataraonan isuna iti las-ud ti adu nga aldaw.

16 Ket napasamak a kinunana kadagiti tattao: Agtitiponkayo amin inton bigat, gapu ta matayakto; gapuna, kalikagumak a kasarita amin dagiti tattao sakbay a matayak.

17 Ket napasamak a nagtitipon ti ummong iti kabigatanna; ket nagsao kadakuada a silalawag ket imbabawina dagiti banag nga insurona kadakuada, ken impudnona ni Cristo, ken ti bileg ti Espiritu Santo, ken dagiti agserserbi nga anghel.

18 Ket silalawag a nagsao kadakuada, a ^anaallilaw babaen iti bileg ti ^bsairo. Ket insaona ti maipapan iti impierno, ken ti agnanayon, ken ti awan patinggana a pannakadusa.

19 Ket kinunana: Mabutengak ta amangan ta nakaaramidak iti ^asaan a mapakawan a basol, ta nagulbodak iti Dios; ta inlibakko ni Cristo, ket imbagak a mamatiak iti nasantuan a kasuratan; ken agpayso a paneknekanda isuna. Ket gapu ta nagulbodak iti Dios mabutengak la unay ta amangan a ti kasok ket ^bnakaam-amakto; ngem agpudnoak iti Dios.

20 Ket napasamak nga idi naibagana dagitoy a balikas saanen a makasao, ket ^ainsukona ti biagna.

21 Ket idi mapaneknekan ti ummong ti panangisaona kadagitoy a banag kasla la a dandani a matay isuna, nasdaawda unay; ket iti kasta immay kadakuada ti bileg ti Dios, ket ^anaparmekda ket nadalupoda iti daga.

22 Ita, makaay-ayo kaniak daytoy a banag, siak a ni Jacob, ta kiniddawko iti Amak nga adda iti langit; ta dinengngegna ti ararawko ken sinungbatanna ti kararagko.

23 Ket napasamak a naisubli manen ti kappia ken ti ayat ti Dios kadagiti tattao; ket ^asinukisokda ti nasantuan a kasuratan, ket saandan a dinengngeg dagiti balikas daytoy dakes a tao.

24 Ket napasamak nga adu a wagas ti naaramid tapno maala ken ^amaisubli dagiti Lamanita iti pannakaammo iti kinapudno; ngem awan ti ^bnagmamaayanna, agsipud ta pagragsakanda dagiti ^cgubat ken ^dpanagayus ti dara, ket awan ti inggana ti ^egurada maibusor kadakami, a kakabsatda. Ket inkagumaanda babaen kadagiti armasda nga itultuloy a dadaelendakami.

25 Gapuna, Nagsarikedked dagiti tattao ni Nephi a maibusor kadakuada babaen iti panagaramatda kadagiti armasda, ken babaen iti amin a bilegda, nga agtalekda iti Dios ken ^apamuon ti pannakaisalakanda; gapuna, nagbalinda pay laeng, a dagiti konkistador kadagiti kabusorda.

26 Ket napasamak a siak, ni Jacob, lumaklakayakon; ket agsipud ta naisurat iti kasuratan dagitoy a tattao ^akadagiti sabali a pinanid ni Nephi, gapuna, gibusakon daytoy a kasuratan, ipakdaarko a naisuratkon a mayannurot iti kasayaatan a pannakaammok, babaen iti panagkunak a limmabas ti panawen kadakami, ket kasta met a limmabas dagiti ^bbiagmi a kas man la tagtagainep para kadakami, dakami a naliday ken naulimek a tattao, managallaalla, napatalaw manipud iti Jerusalem, nayanak iti panagrigrigat, adda iti langalang, ken kinagurgura dagiti kakabsatmi, a pakaigapuan dagiti gubgubat ken panagsusupanget; gapuna, pinagladingitanmi iti naan-anay a panagbiagmi.

27 Ket siak, ni Jacob, nakitak nga asidegen ti ipapanko iti tanemko; gapuna, kinunak iti lalaki nga anakko a ni ^aEnos: Alaem dagitoy a pinanid. Ket imbagak kenkuana dagiti bambanag nga ^bimbilin kaniak ti lalaki a kabsatko a ni Nephi, ket inkarina a tungpalenna dagiti bilin. Ket inggibusko ti panagsuratko kadagitoy a pinanid, a babassit ti naisuratna; ket agpakadaakon iti agbasbasa, a mangnamnama nga adunto kadagiti kakabsatko ti makabasa kadagiti balikasko. Kakabsat, agpakadakon.