Ti Libro ni Jacob
ti lalaki a kabsat ni Nephi

1 Ta kitaen, napasamak a limmabas ti limapulo ket lima a tawen manipud idi pimmanaw ni Lehi iti Jerusalem; gapuna, inted kaniak ni Nephi, siak a ni ^aJacob, ti maysa a ^bbilin maipapan kadagiti ^cbabassit a pinanid, a nakaikitikitan dagitoy a bambanag.

2 Ket inikkannak, siak a ni Jacob, iti bilin a mangisurat kadagiti pinanid dagiti sumagmamano a bambanag nga ibilangko a kapatgan; a nasken a saanko dakamaten, malaksid no ababa, ti maipapan iti pakasaritaan dagitoy a tattao a maawagan a dagiti tattao ni Nephi.

3 Agsipud ta kinunana a nasken a maikitikitto ti pakasaritaan dagiti taona kadagiti dadduma a pinanidna, ket taginayonekto dagitoy a pinanid ken iyawatko kadagiti kaputotak, kadagiti agsasaruno a kaputotan.

4 Ket no addaan dagiti panangasaba a sagrado, wenno naindaklan a paltiing, wenno panangipadto, nasken nga ikitikitko kadagiti ^apauloda kadagitoy a pinanid, ket dakamatek ida agingga iti mabalin, para ken ni Cristo, ken para kadagiti tattaomi.

5 Ta gapu iti pammati ken nalaus a gagar, no pudno a naipakita kadakami ti maipanggep kadagiti tattaomi, no ania dagiti bambanag a ^amapasamakto kadakuada.

6 Ket naaddaankami met iti adu a paltiing, ken espiritu ti adu a padto; gapuna ammomi ni ^aCristo ken ti pagarianna, a dumtengto.

7 Gapu ta kasta sireregtakami a nagtrabaho kadagiti tattaomi, tapno mabalinmi a maallukoy ida a ^asuroten ni Cristo, ken makiraman iti kinaimbag ti Dios, tapno mabalinda a sumrek iti ^bpaginanaanna, ta amangan a no iti aniaman a pamay-an iti pungtotna ikarinanto a nasken a saanda a ^cmakastrek idiay, a kas iti ^dpannakarurod kadagiti aldaw ti pannulisog bayat ti kaadda dagiti annak ti Israel iti ^elangalang.

8 Gapu ta kasta, kayatmi iti Dios a maallukoymi amin a tattao a saanda nga ^aagrebelde maibusor iti Dios, a ^bmangrubrob kenkuana nga agpungtot, ngem ketdi patien amin a tattao ni Cristo, ket utobenda ti ipapatayna, ken baklayen ti ^ckrusna ket ibturanda ti pananglais iti lubong; gapuna, siak, ni Jacob, awatek ti pannakaipatungpal ti bilin ti kabsatko a ni Nephi.

9 Itan lumaklakayen ni Nephi, ket naamirisna nga asidegen ti ^aipapatayna; gapuna, ^btinudinganna ti maysa a lalaki nga agbalin nga ari ken agturay kadagiti taona, kas mayannurot iti panagturay dagiti ^cari.

10 Nakapalpalalo ti panangayat dagiti tattao ken ni Nephi, isu a nabileg a salaknibda, ta inusarna ti ^aespada ni Laban a pangsalaknib kadakuada, ken nagtrabaho iti amin a biagna para iti pagimbaganda—

11 Gapu ta kasta, tinarigagayan dagiti tattao ti panangtaginayon ti pakalaglagipan iti naganna. Ket naawagan dagiti tattao ti siasinoman nga agturay a kasublatna a, maikadua a Nephi, maikatlo a Nephi, ken dadduma pay, a mayannurot iti panagturay dagiti ari; ket kasta ti panangawag kadakuada dagiti tattao, naipalubos a maawaganda iti ania man ti mainagan kadakuada.

12 Ket napasamak a natay ni Nephi.

13 Ita dagiti tattao a saan a ^aLamanita isuda dagiti ^bNephita; ket iti kasta, naawaganda a dagiti Nephita, Jacobita, Josephita, ^cZoramita, Lamanita, Lemuelita, ken Ishmaelita.

14 Ngem siak, ni Jacob, saankonto a bigbigen ida kadagitoy a nagnagan manipud ita, ngem ^aawagak ida a Lamanita dagiti agkalikagum a mangdadael kadagiti tattao ni Nephi, ket awagak dagiti mannakigayyem ken ni Nephi iti ^bNephita, wenno ^cdagiti tattao ni Nephi, a mayannurot iti panagturay dagiti ari.

15 Ket ita napasamak a dagiti tattao ni Nephi, bayat ti panagturay ti maikadua nga ari, nangrugi a timmangken dagiti puspusoda, ket pinabus-oyanda ti bagbagida kadagiti dakes nga aramid, a kas ken ni David idi ugma a nagkalikagum iti adu nga ^aasawa ken kamalala, kasta met ni Solomon, nga anakna.

16 Wen, ket rinugianda met ti agbirok iti adu a balitok ken pirak, ket nangrugida nga agbalin a napalangguad.

17 Gapu ta kasta siak, ni Jacob, intedko kadakuada dagitoy a balikas bayat ti panangisurok kadakuada iti ^atemplo, ta naalak nga immuna ti ^bpakaibaonak manipud iti Apo.

18 Agsipud ta siak, ni Jacob, ken ti lalaki a kabsatko a ni Jose ^anaordenankami a saserdote ken mannursuro kadagitoy a tattao, babaen ti ima ni Nephi.

19 Ket sireregta a tinungpalmi ti ^aakemmi iti Apo, imbaklaymi dagiti ^bpagrebbengan, sungbatanmi ti basbasol dagiti tattao iti ulomi no saanmi nga isuro kadakuada ti balikas ti Dios nga addaan iti amin a kinaregta; gapuna, babaen iti panagtrabahomi iti amin a kabaelanmi saanto a mamansaan iti ^cdara dagiti pagan-anaymi; ta no saan, mamansaanto dagiti pagan-anaymi; ket saankami a maibilang nga awan mulitna iti maudi nga aldaw.