1 Tan-awa, karon natabo ini nga sang nahambal ni Nefi ining mga pulong, may pila ka mga lalaki nga kaupod nila ang nagdalagan sa hukom-lingkuranan; huo, bisan may lima sa ila nga nagkadto, kag nagsiling sila sa isa kag isa samtang nagalakat sila:

2 Tan-awa, karon mahibal-an naton sing pat-od kon ini nga tawo isa ka propeta kag ang Dios nagsugo sa iya nga magpropesiya sang amo kadalayawon nga mga butang sa aton. Tan-awa, wala kita nagapati nga ginsugo sia; huo, wala kita nagapati nga isa sia ka propeta; apang, kon ining butang nga iya ginsiling parte sa puno nga hukom matuod, nga sia patay na, gani mapati kita nga ang iban pa nga mga pulong nga iya ginhambal matuod.

3 Kag natabo ini nga nagdalagan sila sa bug-os nila nga kusog, kag nagkadto pasulod sa hukom-lingkuranan; kag tan-awa, ang puno nga hukom yara sa duta, kag nagahigda sa iya kaugalingon nga dugo.

4 Kag karon tan-awa, sang nakita nila ini tuman sila nga nakibot, sa bagay nga nagkalatumba sila sa duta; kay wala sila nagpati sa mga pulong nga ginhambal ni Nefi parte sa puno nga hukom.

5 Apang karon, sang nakita nila nagpati sila, kag nagbatyag sila sing kahadlok kay basi ang tanan nga paghukom nga ginpanghambal ni Nefi magaabot sa katawhan; gani nagkurog sila, kag nagkalatumba sa duta.

6 Karon, sa gilayon pagkatapos nga ginpatay ang hukom—sia nga ginbuno sang iya utod nga lalaki nga napanaptan sa bagay nga indi sia makilal-an, kag nalagyo sia, kag ang mga alagad nagdinalagan kag ginsugiran ang katawhan, nga nagasininggit nga may ginpatay sa ila;

7 Kag tan-awa ang katawhan nagtililipon sang ila mga kaugalingon sa lugar sang hukom-lingkuranan—kag tan-awa, sa ila kakibot nakita nila yadtong lima ka lalaki nga natumba sa duta.

8 Kag karon tan-awa, ang katawhan wala nakahibalo parte sang kadam-an nga nagtililipon sa hardin ni Nefi; gani nagsiling sila sa isa kag isa: Ining mga lalaki amo sila ang nagpatay sa hukom; kag ginhampak sila sang Dios agud indi sila makapalagyo sa aton.

9 Kag natabo ini nga gindakop nila sila, kag gingapos sila kag ginpanghunong sila sa bilanggoan. Kag may pabantala nga ginpalapnag nga ang hukom ginpatay, kag ang mga nagpatay nadakpan kag ginhunong sa bilanggoan.

10 Kag natabo ini nga pagkaaga ang katawhan nagtililipon sang ila mga kaugalingon agud magpangalisud kag magpuasa, sa paglubong sang pinakapuno nga hukom nga ginpatay.

11 Kag gani inang mga hukom nga didto sa hardin ni Nefi, kag nakabati sang iya mga pulong, nagtililipon man sa paglubong.

12 Kag natabo ini nga namangkot sila sa katawhan nga nagasiling: Diin na ang lima nga ginpadala agud hibaluon ang parte sa puno nga hukom kon bala patay sia? Kag nagsabat sila kag nagsiling: Parte sining lima nga inyo ginasiling nga ginpadala ninyo, wala kami nakahibalo; apang may lima nga amo ang nagpatay nga amon ginpanghunong sa bilanggoan.

13 Kag natabo ini nga ang mga hukom nagpangabay nga dal-on sila; kag gindala sila, kag tan-awa sila amo ang lima nga ginpadala; kag tan-awa ang mga hukom namangkot sa ila agud mahibal-an ang parte sa hitabo, kag ginsugiran nila sila sang tanan nga ila ginhimo nga nagasiling:

14 Nagdalagan kami kag nag-abot sa lugar sang hukom-lingkuranan, kag sang nakita namon ang tanan nga butang bisan pareho sang ginpamatuod ni Nefi, nakibot kami sa bagay nga nagkalatumba kami sa duta; kag sang maulian kami halin sa amon kakibot, tan-awa ginhunong nila kami sa bilanggoan.

15 Karon, parte sa pagpatay sa sini nga tawo, wala kami nakahibalo kon sin-o ang naghimo sini; kag amo lamang ini ang amon nahibal-an, nagdalagan kami kag nakaabot suno sa inyo ginpangabay, kag tan-awa patay na sia suno sa mga pulong ni Nefi.

16 Kag karon natabo ini nga ang mga hukom nagpaathag sang hitabo sa katawhan, kag nagsinggit batok kay Nefi nga nagasiling: Tan-awa, nakahibalo kami nga ining si Nefi nakig-isa sa kay kon sin-o nga mapatay sang hukom, kag dayon mahimo niya nga ipahayag ini sa aton, agud nga basi mahaylo niya kita sa iya pagtuluohan, agud mabayaw niya ang iya kaugalingon nga mangin isa ka bantug nga tawo, nga pinili sang Dios, kag isa ka propeta.

17 Kag karon tan-awa, ilantad naton ini nga tawo, kag ikumpisar niya ang iya sala kag isugid sa aton ang matuod nga nagpatay sini nga hukom.

18 Kag natabo ini nga ang lima ginhilway sa adlaw sang paglubong. Apang, ginsaway nila ang mga hukom sa mga pulong nga ila ginhambal batok kay Nefi, kag nakigbais sa ila sing isa-isa, sa bagay nga napahipos nila sila.

19 Apang, ginpadakop nila si Nefi kag ginpagapos kag ginpadala sa atubang sang kadam-an, kag nagsugod sila sa pagpamangkot sa iya sa lain-lain nga mga paagi agud mabaisan nila sia, agud nga maakusahan nila sia padulong sa kamatayon—

20 Nga nagasiling sa iya: Kakonsabo ka; sin-o ini nga tawo nga naghimo sini nga pagpatay? Karon sugiri kami, kag akoa ang imo sala; nga nagasiling pa gid, Tan-awa, yari ang kwarta; kag amo man pabay-an ka namon nga mabuhi kon sugiran mo kami, kag akuon ang kaisahan nga imo ginhimo upod sa iya.

21 Apang si Nefi nagsiling sa ila: O kamo nga mga buang, kamo nga mga matig-a sing tagipusuon, kamo nga mga bulag, kag kamo nga batinggilan nga katawhan, kahibalo bala kamo kon daw ano kalawig ang Ginuo nga inyo Dios magatugot sa inyo nga magpadayon kamo sa sining inyo dalanon sang sala?

22 O dapat kamo nga magsugod sa pagtangis kag pagpangalisud, tungod sang dako nga kalaglagan nga sa sini nga tion nagahulat sa inyo, luwas lang nga maghinulsol kamo.

23 Tan-awa nagasiling kamo nga nakig-isa ako sa isa ka tawo nga patyon niya si Sezoram, ang aton puno nga hukom. Apang tan-awa, ginasiling ko sa inyo, nga ini tungod kay nagpamatuod ako sa inyo agud mahibal-an ninyo ang parte sini nga butang; huo, bisan bilang isa ka saksi sa inyo, nga nahibal-an ko ang kalainan kag mga kangil-aran nga yara sa inyo.

24 Kag tungod ginhimo ko ini, nagasiling kamo nga nakig-isa ako sa isa ka tawo agud himuon niya ini nga butang; huo, tungod ginpakita ko sa inyo ini nga tanda naakig kamo sa akon, kag nagatinguha nga patyon ako.

25 Kag karon tan-awa, ipakita ko sa inyo ang isa pa ka tanda, kag tan-awon ko kon kamo sa sini nga butang magatinguha sa pagpatay sa akon.

26 Tan-awa ginasiling ko sa inyo: Kadtoi sa balay ni Seantum, nga utod ni Sezoram, kag magsiling sa iya—

27 Si Nefi bala, ang nagapakunokuno nga propeta, nga nagapropesiya sang dako nga kalainan parte sining katawhan, nakig-isa sa imo, sa diin ginpatay mo si Sezoram nga imo utod?

28 Kag tan-awa, magasiling sia sa inyo, Wala.

29 Kag magasiling kamo sa iya: Ginpatay mo bala ang imo utod?

30 Kag magatindog sia nga may kahadlok, kag indi makahibalo kon ano ang isiling. Kag tan-awa, magapanghiwala sia sa inyo; kag himuon niya nga daw nakibot sia; apang, magapahayag sia sa inyo nga inosente sia.

31 Apang tan-awa, rikisahon ninyo sia, kag makakita kamo sang dugo sa mga sidsid sang iya kunop.

32 Kag kon makita ninyo ini, mamangkot kamo: Diin naghalin ini nga dugo? Wala bala kami nakahibalo nga dugo ini sang imo utod?

33 Kag dayon magakurog sia, kag magapalanglapsi, bisan nga daw nagtupa sa iya ang kamatayon.

34 Kag dayon magasiling kamo: Tungod sining kahadlok kag sining pagpalanglapsi nga makita sa imo nawong, tan-awa, nahibal-an namon nga may sala ka.

35 Kag dayon mas dako pa gid nga kahadlok ang magaabot sa iya; kag dayon magakumpisar sia sa inyo, kag indi na magpanghiwala pa nga ginhimo niya ini nga pagpatay.

36 Kag dayon magasiling sia sa inyo, nga ako, si Nefi, wala sing may nahibal-an parte sa hitabo luwas lang nga ini ginhatag sa akon paagi sa gahum sang Dios. Kag dayon mahibal-an ninyo nga isa ako ka tampad nga tawo, kag ginpadala ako sa inyo halin sa Dios.

37 Kag natabo ini nga nagpadayon sila kag ginhimo, bisan ang suno sa ginsiling ni Nefi sa ila. Kag tan-awa, ang mga pulong nga iya ginsiling matuod; kay suno sa mga pulong nagpanghiwala sia; kag amo man suno sa mga pulong nagkumpisar sia.

38 Kag gindala sia agud probahan nga sia mismo amo gid ang nagpatay, sa bagay nga ang lima ginhilway, kag amo man si Nefi.

39 Kag may pila sang mga Nefinhon nga nagpati sa mga pulong ni Nefi; kag may pila man nga nagpati tungod sang testimonya sang lima kay nahaylo sila samtang yara sila sa bilanggoan.

40 Kag karon may pila sa katawhan nga nagsiling nga si Nefi isa ka propeta.

41 Kag may iban pa nga nagsiling: Tan-awa, isa sia ka dios, kay kon indi sia isa ka dios indi sia makahibalo sang tanan nga butang. Kay tan-awa, ginsugiran niya kita sang mga panghunahuna sang aton mga tagipusuon, kag ginsugiran man kita sang mga butang; kag bisan pa gani gindala niya sa aton ihibalo ang matuod nga nagpatay sa aton puno nga hukom.